Sardar Sarovar Dam: સરદાર સરોવર ડેમમાં પાણીનું સ્તર વધતા ભરૂચ, નર્મદા અને વડોદરા જિલ્લાના નદી કાંઠાના 27 ગામોને એલર્ટ કરાયા

સરદાર સરોવર ડેમ 94 ટકા ભરાયો છે. હાલમાં ડેમનું લેવલ 136.74 મીટર પર પહોચ્યું છે. 2.45 લાખ ક્યુસેક પાણી નદીમાં છોડાતા નદીકાંઠાના વિસ્તારોમાં એલર્ટ જાહેર કરાયું છે.

By: Mukesh JoshiEdited By: Mukesh Joshi Publish Date: Sat 30 Aug 2025 12:27 PM (IST)Updated: Sat 30 Aug 2025 12:27 PM (IST)
alert-issued-to-riverside-villages-in-bharuch-narmada-and-vadodara-districts-as-water-level-rises-in-sardar-sarovar-dam-594165

Sardar Sarovar Dam News: નર્મદા નદી પર આવેલ સરદાર સરોવર ડેમમાં પાણીનું સ્તર સતત વધી રહ્યું છે. ઉપરવાસમાંથી ભારે વરસાદ અને પાણી છોડવાના કારણે આજે ડેમમાં 1,67,113 ક્યુસેક પાણીની આવક થઈ છે. હાલ ડેમની સપાટી 136.74 મીટર પર પહોંચી છે, જે તેની કુલ ક્ષમતા (138.68 મીટર)નો 94 ટકા થાય છે. છેલ્લા 24 કલાકમાં ડેમના લેવલમાં 24 સેન્ટીમીટરનો વધારો થયો છે.

સરદાર સરોવર ડેમમાં પાણીનું સ્તર વધ્યું

જળાશયમાં વધતા પાણીના સ્તરને નિયંત્રિત કરવા માટે ડેમના 15 રેડિયલ ગેટ ખોલવામાં આવ્યા છે. આ ગેટો 1.85 મીટર સુધી ખોલી દેવામાં આવ્યા છે, જેના કારણે નર્મદા નદીમાં 2,45,000 ક્યુસેક પાણી છોડવામાં આવી રહ્યું છે. તંત્ર દ્વારા જણાવવામાં આવ્યું છે કે, પાણી છોડવાનો પ્રવાહ પરિસ્થિતિ મુજબ એડજસ્ટ કરવામાં આવશે જેથી ડેમની સુરક્ષા જાળવાઈ શકે.

કાંઠાના ગામોને એલર્ટ કરાયા

પરિસ્થિતિને ધ્યાનમાં રાખીને ભરૂચ, નર્મદા અને વડોદરા જિલ્લાના નદી કાંઠાના 27 ગામોને એલર્ટ આપવામાં આવ્યું છે. લોકોને નદી કિનારા પરથી દૂર રહેવા સૂચના આપવામાં આવી છે, કારણ કે નદીમાં પાણીનો પ્રવાહ વધારે તીવ્ર બનવાની શક્યતા છે. તંત્ર દ્વારા ચેતવણી આપવામાં આવી છે કે પાણી છોડવાથી નીચાણવાળા વિસ્તારોમાં પાણી ભરાવાની સંભાવના છે.

તંત્ર સતત નજર રાખી રહ્યું છે

સરદાર સરોવર ડેમમાં હાલની પરિસ્થિતિ પર તંત્ર સતત નજર રાખી રહ્યું છે અને જરૂરી પગલાં માટે તૈયારી રાખવામાં આવી છે. વરસાદની આગાહી અને ઉપરવાસના જળપ્રવાહને ધ્યાનમાં રાખીને આગળના કલાકોમાં વધુ ગેટ ખોલવાની શક્યતા નકારી શકાય તેમ નથી. નાગરિકોને સાવચેતી રાખવાની અને તંત્રના સૂચનોનું પાલન કરવાની અપીલ કરવામાં આવી છે.