Gopal Italia News: ગત શનિવાર, 16 ઓગસ્ટ, 2025ના રોજ શ્રીકૃષ્ણ જન્માષ્ટમીના પવિત્ર તહેવાર નિમિત્તે બગડુ ખાતે ધારાસભ્ય ગોપાલ ઈટાલિયા દ્વારા ભવ્ય જન્મોત્સવ અને મહારાસનું આયોજન કરવામાં આવ્યું હતું. લેઉવા પટેલ સમાજ, મેંદરડા રોડ ખાતે યોજાયેલા આ કાર્યક્રમમાં સર્વ સમાજના લોકોએ ઉત્સાહભેર ભાગ લીધો હતો. આ પ્રસંગે નંદ ઘેર આનંદ ભયો, જય કનૈયા લાલ કીના નાદથી સમગ્ર વાતાવરણ ભક્તિમય બની ગયું હતું.
આ પણ વાંચો
કાર્યક્રમની શરૂઆત સાંજે મહેમાનોના આગમનથી થઈ હતી, ત્યારબાદ રાત્રે 8.30થી 10.00 દરમિયાન ધ્રુવ આહિરની રાસ મંડળી દ્વારા મનમોહક રાસની રજૂઆત કરવામાં આવી હતી. આ પછી વિવિધ ગામોની રાસ મંડળીઓએ પણ પોતાની કલાનું પ્રદર્શન કર્યું હતું. ત્યારબાદ, મહાનુભાવોએ પ્રવચન આપ્યું હતું અને રાત્રે 11.40 વાગ્યે શ્રીકૃષ્ણ જન્મોત્સવની ધામધૂમપૂર્વક ઉજવણી કરવામાં આવી હતી. આ પછી આયોજિત મહારાસમાં ધારાસભ્ય ગોપાલ ઈટાલિયા પણ સ્થાનિક લોકો સાથે મન મૂકીને ગરબે ઘૂમ્યા હતા, જે સમગ્ર કાર્યક્રમનું મુખ્ય આકર્ષણ બન્યું હતું.
આ ભવ્ય કાર્યક્રમનું આયોજન વિસાવદર વિધાનસભાના ધારાસભ્ય ગોપાલ ઈટાલિયા દ્વારા કરવામાં આવ્યું હતું. આ કાર્યક્રમને સફળ બનાવવા માટે રાજુભાઈ બોરખતરિયા, હરેશભાઈ સાવલિયા અને કૈલાશ સાવલિયા સહિતના અનેક આગેવાનોએ મહત્વપૂર્ણ ભૂમિકા ભજવી હતી. આ પ્રસંગે રાજુભાઈ કરપડા, રાજુભાઈ સોલંકી, પ્રવીણભાઈ રામ, સામતભાઈ ગઢવી જેવા અનેક આગેવાનો પણ ઉપસ્થિત રહ્યા હતા. સમગ્ર સમાજે સાથે મળીને આ પવિત્ર તહેવારની ભવ્ય ઉજવણી કરી હતી, જેણે ભાઈચારા અને સાંસ્કૃતિક એકતાનો અનોખો સંદેશ આપ્યો હતો.