Virat Kohli Debut Today: 18 ઓગસ્ટ, 2008… આ તારીખ ભલે સામાન્ય લાગતી હોય, પરંતુ ભારતીય ક્રિકેટ માટે તે એક ઐતિહાસિક દિવસ હતો. આ દિવસે એક 19 વર્ષીય યુવા ક્રિકેટર આંતરરાષ્ટ્રીય ક્રિકેટમાં પ્રવેશ્યો, જે આવનારા વર્ષોમાં 'કિંગ' કોહલી તરીકે દુનિયાભરમાં છવાઈ ગયો. આપણે વાત કરી રહ્યા છીએ વિરાટ કોહલીની, જેણે આંતરરાષ્ટ્રીય ક્રિકેટમાં પોતાની 17 વર્ષની કારકિર્દી દરમિયાન અનેક રેકોર્ડ સ્થાપિત કર્યા.
આંતરરાષ્ટ્રીય ક્રિકેટમાં કોહલીનો પ્રવેશ
વિરાટ કોહલી (Virat Kohli) એ 18 ઓગસ્ટ, 2008ના રોજ શ્રીલંકા સામે ODI મેચથી આંતરરાષ્ટ્રીય ક્રિકેટમાં પદાર્પણ કર્યું હતું. જોકે, આ ડેબ્યુ મેચ તેના માટે કે ભારતીય ટીમ માટે ખાસ નહોતી રહી. મહેન્દ્ર સિંહ ધોનીની કેપ્ટનશીપ હેઠળ રમાયેલી આ મેચમાં ભારતે ટોસ જીતીને બેટિંગ પસંદ કરી હતી.
કોહલીએ ગૌતમ ગંભીર સાથે ઓપનિંગ કર્યું, પરંતુ ભારતની શરૂઆત સારી નહોતી રહી. ગંભીર ઝડપથી આઉટ થયા બાદ કોહલી પર દબાણ આવ્યું. તેણે 12 રન બનાવ્યા હતા અને એક ચોગ્ગો પણ ફટકાર્યો હતો, પરંતુ નુવાન કુલશેખરાના બોલ પર તે LBW આઉટ થયો. આ મેચમાં ભારત 8 વિકેટથી હારી ગયું હતું અને કોહલીનું ડેબ્યુ નિરાશાજનક રહ્યું હતું.
આ પણ વાંચો
શરૂઆતની નિષ્ફળતા બાદ સફળતાનો પથ
જોકે, આ નિષ્ફળતાથી કોહલીના જુસ્સા પર કોઈ અસર ન થઈ. તેને સતત તકો મળતી રહી અને તેની પહેલી જ ODI સિરીઝમાં તેણે એક અડધી સદી ફટકારીને સિલેક્ટર્સનો ભરોસો જીત્યો. તેની કારકિર્દીનો મોટો વળાંક 2009માં આવ્યો, જ્યારે શ્રીલંકાની ટીમ ભારત પ્રવાસે આવી હતી. ડિસેમ્બર 2009માં કોલકાતામાં તેણે પોતાની પહેલી આંતરરાષ્ટ્રીય સદી ફટકારી. આ પછી તેણે ક્યારેય પાછળ વળીને જોયું નથી.
કિંગ કોહલીના રેકોર્ડ્સ
આંતરરાષ્ટ્રીય ક્રિકેટમાં 17 વર્ષ પૂરા કરી ચૂકેલા કોહલીએ અત્યાર સુધીમાં 550 મેચ રમી છે અને 27599 રન બનાવ્યા છે. કોહલીએ T20 અને ટેસ્ટ ક્રિકેટમાંથી નિવૃત્તિ જાહેર કરી છે, પરંતુ તેને ODI ફોર્મેટમાં રમવાનું ચાલુ રાખ્યું છે. કોહલીએ અત્યાર સુધીમાં આંતરરાષ્ટ્રીય ક્રિકેટમાં ઘણા મોટા રેકોર્ડ્સ પોતાના નામે કર્યા છે અને તેને આધુનિક ક્રિકેટના મહાન બેટ્સમેનોમાંનો એક ગણવામાં આવે છે.
Virat Kohli કારકિર્દી ટાઈમલાઈન
- વર્ષ 2002- ઘરેલુ ક્રિકેટમાં પ્રવેશ
- વર્ષ 2006- લિસ્ટ-એ કારકિર્દી શરૂ કરી
- વર્ષ 2008- કેપ્ટન તરીકે અંડર-19 ચેમ્પિયન બન્યા
- વર્ષ 2008- શ્રીલંકા સામે આંતરરાષ્ટ્રીય કારકિર્દી શરૂ કરી
- વર્ષ 2010- ઝિમ્બાબ્વે સામે T20 આંતરરાષ્ટ્રીય ક્રિકેટમાં પ્રવેશ
- વર્ષ 2011- ODI વર્લ્ડ કપ જીત્યો અને ટેસ્ટ ક્રિકેટમાં પ્રવેશ કર્યો
- વર્ષ 2012- ઓસ્ટ્રેલિયા સામે પ્રથમ ટેસ્ટ સદી
- વર્ષ 2013- ભારતને ચેમ્પિયન્સ ટ્રોફીનો ખિતાબ અપાવ્યો
- વર્ષ 2014- ધોનીની નિવૃત્તિ પછી ટેસ્ટ કેપ્ટન બન્યો
- વર્ષ 2017- ત્રણેય ફોર્મેટમાં ભારતીય ટીમનો કેપ્ટન બન્યો
- વર્ષ 2018- ઓસ્ટ્રેલિયામાં ભારત માટે પહેલી વાર ટેસ્ટ સિરીઝ જીતી
- વર્ષ 2021- ભારતને WTC ફાઇનલમાં પહોંચાડ્યું અને T20 ટીમની કેપ્ટનશીપ છોડી દીધી
- વર્ષ 2022- અફઘાનિસ્તાન સામે પ્રથમ T20 સદી. 2022 માં ટેસ્ટ અને ODI કેપ્ટનશીપ છોડી દીધી
- વર્ષ 2023- ODI વર્લ્ડ કપમાં સૌથી વધુ રન બનાવ્યા (કુલ 765 રન)
- વર્ષ 2024- T20 વર્લ્ડ કપનો ખિતાબ જીત્યો, પછી T20 ક્રિકેટમાંથી નિવૃત્તિ લીધી
- વર્ષ 2025- બીજી ચેમ્પિયન્સ ટ્રોફીનો ખિતાબ જીત્યો, ટેસ્ટ ક્રિકેટમાંથી નિવૃત્તિ લીધી
કિંગ કોહલીની સિદ્ધિઓ
- ODI ક્રિકેટમાં સૌથી વધુ સદી (51) ફટકારનાર બેટ્સમેન.
- ટેસ્ટમાં કેપ્ટન તરીકે, કોહલી સૌથી વધુ બેવડી સદી (7 વખત) ફટકારનાર ખેલાડી છે.
- કોહલી ODI ક્રિકેટમાં 10,000 રન પૂર્ણ કરનાર સૌથી ઝડપી બેટ્સમેન છે.
- કોહલી T20 ક્રિકેટમાં 10,000 રન પૂર્ણ કરનાર પ્રથમ ભારતીય બેટ્સમેન છે.
- કોહલી બે બોક્સિંગ-ડે ટેસ્ટ મેચ જીતનાર એકમાત્ર ભારતીય કેપ્ટન છે.
- તે બે વાર સર ગારફિલ્ડ સોબર્સ એવોર્ડ જીતનાર ક્રિકેટર છે.
વિરાટ કોહલીની આંતરરાષ્ટ્રીય ક્રિકેટ કારકિર્દી
વિરાટ કોહલી (Virat Kohli International Career) ના આંતરરાષ્ટ્રીય ક્રિકેટ કારકિર્દી વિશે વાત કરીએ તો, તેણે કુલ 27,599 રન બનાવ્યા છે. અત્યાર સુધીમાં, તેણે 550 આંતરરાષ્ટ્રીય મેચ રમીને 82 સદી ફટકારી છે, જ્યારે તેના નામે 143 અડધી સદી પણ છે. કિંગ કોહલી હાલમાં ODI ક્રિકેટ રમી રહ્યો છે, જેમાં તેણે 302 મેચોમાં 14181 રન બનાવ્યા છે.