Vice President Election 2025 Date Announced: ચૂંટણી પંચ (ECI) દ્વારા ઉપરાષ્ટ્રપતિ પદ માટેની ચૂંટણીનો કાર્યક્રમ જાહેર કરી દેવામાં આવ્યો છે. ગૃહ મંત્રાલયની અધિસૂચના ક્રમાંક S.O. 3354(E) તારીખ 22.07.2025 અનુસાર, ઉપરાષ્ટ્રપતિનું પદ ખાલી પડ્યું હોવાથી આ પદ ભરવા માટે ચૂંટણી યોજવી જરૂરી છે. ઉપરાષ્ટ્રપતિ જગદીપ ધનખડે સ્વાસ્થ્ય કારણોસર રાજીનામું આપતા આ પદ ખાલી પડ્યું છે.
બંધારણીય જોગવાઈઓ અને ચૂંટણી પ્રક્રિયા
બંધારણના અનુચ્છેદ 67 મુજબ, ઉપરાષ્ટ્રપતિનો કાર્યકાળ પાંચ વર્ષનો હોય છે. આ ચૂંટણી બંધારણના અનુચ્છેદ 66 હેઠળ સંસદના બંને ગૃહોના સભ્યોના બનેલા ઇલેક્ટોરલ કોલેજ દ્વારા કરવામાં આવે છે. આ ચૂંટણીમાં સિંગલ ટ્રાન્સફરેબલ વોટ દ્વારા પ્રમાણસર પ્રતિનિધિત્વ પ્રણાલીનો ઉપયોગ થાય છે અને મતદાન ગુપ્ત મતપત્ર દ્વારા થાય છે.
ઇલેક્ટોરલ કોલેજની રચના (2025)
વર્ષ 2025 માટે, ઉપરાષ્ટ્રપતિની 17મી ચૂંટણી માટેનું ઇલેક્ટોરલ કોલેજ કુલ 788 સભ્યોનું બનેલું છે. જેમાં રાજ્યસભાના 233 ચૂંટાયેલા સભ્યો (5 બેઠકો ખાલી), રાજ્યસભાના 12 નોમિનેટેડ સભ્યો, અને લોકસભાના 543 ચૂંટાયેલા સભ્યો (1 બેઠક ખાલી)નો સમાવેશ થાય છે. દરેક સભ્યના મતનું મૂલ્ય એક સમાન (1) રહેશે.
ચૂંટણીનું સમયપત્રક
- અધિસૂચના જાહેર કરવાની તારીખ: 07 ઓગસ્ટ, 2025 (ગુરુવાર)
- નોમિનેશન (નામાંકન) ભરવાની છેલ્લી તારીખ: 21 ઓગસ્ટ, 2025 (ગુરુવાર)
- નોમિનેશનની ચકાસણીની તારીખ: 22 ઓગસ્ટ, 2025 (શુક્રવાર)
- ઉમેદવારી પાછી ખેંચવાની છેલ્લી તારીખ: 25 ઓગસ્ટ, 2025 (સોમવાર)
- મતદાનની તારીખ (જો જરૂરી હોય તો): 09 સપ્ટેમ્બર, 2025 (મંગળવાર)
- મતદાનનો સમય: સવારે 10:00 વાગ્યાથી સાંજે 05:00 વાગ્યા સુધી
- મતગણતરીની તારીખ (જો જરૂરી હોય તો): 09 સપ્ટેમ્બર, 2025 (મંગળવાર)