Water Drinking Mistakes: આપણે સૌ જાણીએ છીએ કે પાણી આપણા જીવન માટે ખૂબ જ મહત્વપૂર્ણ છે અને તેના વિના જીવન શક્ય નથી. પરંતુ શું તમે જાણો છો કે મોટાભાગના લોકો પાણી ખોટી રીતે પીવે છે? હા નિષ્ણાતોના મતે લગભગ 90 ટકા લોકો પાણી પીવાની આદતમાં એક નાની ભૂલ કરે છે. જેના કારણે તેમને પૂરો ફાયદો મળતો નથી, પરંતુ ક્યારેક નુકસાન પણ થઈ શકે છે. જો તમે પણ ફક્ત તરસ લાગે અને પાણી પી લેતા હોવ એમ વિચારતા હોવ તો હવે આ વિચાર બદલવાનો સમય આવી ગયો છે. ચાલો પાણી પીવાની સાચી રીત અને તેના ફાયદા વિશે વિગતવાર જાણીએ.
ઝડપથી અને ઊભા રહીને પાણી પીવાની ભૂલ આજના ભાગદોડ ભરેલા જીવનમાં, લોકો પાણી પીવા માટે પણ યોગ્ય સમય નથી કાઢતા. મોટાભાગના લોકો ઊભા રહીને ઝડપથી અને ગટ ગટ કરીને પાણી પી લે છે. આનાથી શરીરને પાણી તો મળે છે, પરંતુ તેનો સાચો ફાયદો થઈ શકતો નથી. ઝડપથી પાણી પીવાથી કિડની અને પાચનતંત્ર પર દબાણ આવે છે અને શરીર ડિહાઇડ્રેટેડ પણ અનુભવી શકે છે.
પાણી પીવાની સાચી રીત
આયુર્વેદ અને વિજ્ઞાન બંને માને છે કે પાણી હંમેશા બેસીને અને ધીમે ધીમે ઘૂંટડે ઘૂંટડે પીવું જોઈએ. જ્યારે તમે આરામથી પાણી પીવો છો, ત્યારે શરીર તેને સારી રીતે શોષી લે છે. ધીમે ધીમે પાણી પીવાથી પાચનતંત્ર સુધરે છે, રક્ત પરિભ્રમણ વધુ સારું થાય છે અને શરીરને ઠંડક પણ મળે છે.
ખાલી પેટે હુંફાળું પાણી પીવો
સવારે ઉઠીને ખાલી પેટે હુંફાળું પાણી પીવું એ તમારા શરીરની સફાઈ કરવાનો સૌથી સરળ અને અસરકારક રસ્તો છે. આ શરીરમાંથી ઝેરી તત્વો બહાર કાઢે છે, મેટાબોલિઝમને સક્રિય કરે છે અને વજન ઘટાડવામાં પણ મદદ કરે છે. એટલું જ નહીં, તે ત્વચાને પણ સ્વસ્થ અને ચમકદાર બનાવે છે.
જમ્યા પછી તરત પાણી પીવું હાનિકારક
ઘણા લોકો જમ્યા પછી તરત જ પાણી પી લે છે. આ આદત પાચનતંત્રને નબળું પાડે છે. જમવાની સાથે અથવા તરત જ પાણી પીવાથી પેટના પાચક રસો (digestive juices) પાતળા થઈ જાય છે અને ખોરાક સારી રીતે પચી શકતો નથી. જો તમે તમારા સ્વાસ્થ્ય અને પાચનને સુધારવા માંગતા હો તો તમારે જમ્યાના 30 મિનિટ પછી પાણી પીવું જોઈએ.
યોગ્ય રીતે પાણી પીવાના ફાયદા
- પાચનતંત્ર મજબૂત થાય છે અને કબજિયાતની સમસ્યામાંથી છુટકારો મળી શકે છે.
- ત્વચા ચમકદાર બને છે અને ભેજ જળવાઈ રહે છે.
- શરીરમાંથી ઝેરી તત્વો બહાર નીકળે છે અને રોગપ્રતિકારક શક્તિ મજબૂત થાય છે.
- થાક અને નબળાઈ દૂર થાય છે, સાથે જ ઊર્જાનું સ્તર પણ વધે છે.
- તમારી કિડની સ્વસ્થ રહે છે અને પથરી થવાનું જોખમ ઓછું થાય છે.