Effective Remedies For White Teeth: જેમ જેમ ઉંમર વધતી જાય છે તેમ આપણા સ્વાસ્થ્ય અને સ્કિનની સાથે સાથે દાંત પર પણ તેની અસર દેખાય છે. સમય જતાં, દાંતનો કુદરતી રંગ ઝાંખો થવા લાગે છે અને તેમાં પીળાશ આવી જાય છે. બજારમાં અનેક ટૂથપેસ્ટ અને પ્રોડક્ટ્સ ઉપલબ્ધ છે, જે દાંત સફેદ કરવાનો દાવો કરે છે, પરંતુ આયુર્વેદિક ઉપચાર આડઅસર વિના દાંતને ચમકદાર બનાવવામાં શ્રેષ્ઠ સાબિત થઈ શકે છે. આયુર્વેદિક નિષ્ણાત મુજબ, જો તમે બેકિંગ સોડા, લીંબુ અને મીઠા જેવા ઘરેલું નુસખાઓથી કંટાળી ગયા હોવ તો, આ પાંચ સરળ અને કુદરતી ઉપાયો અપનાવી શકો છો. જોકે, આ માટે તમારે બે નિયમોનું પાલન કરવું પડશે: ધીરજ રાખવી અને નિયમિતતા જાળવવી.
દાંતની સંભાળ માટે આયુર્વેદિક ટિપ્સ
તેલ (Oil Pulling):
આ એક પ્રાચીન આયુર્વેદિક પ્રક્રિયા છે, જેમાં મોઢામાં તેલ ભરીને ફેરવવામાં આવે છે. આનાથી પેઢા અને દાંતમાં રહેલા બેક્ટેરિયા દૂર થાય છે, મોઢાના ચાંદા મટે છે અને મોઢાના સ્નાયુઓને કસરત મળવાથી તે મજબૂત બને છે.
કેવી રીતે કરવું: તલ, સરસવ અથવા નાળિયેર તેલનો ઉપયોગ કરો. તેને 15-20 મિનિટ સુધી મોઢામાં ફેરવીને થૂંકી દો.
લીમડા અને બાવળની ડાળીઓ:
દાંત સાફ કરવા માટે લીમડા અને બાવળની ડાળીઓનો ઉપયોગ ખૂબ જ ફાયદાકારક છે. આ જડીબુટ્ટીઓ એન્ટિ-માઈક્રોબાયલ ગુણધર્મો ધરાવે છે. તેને ચાવવાથી એન્ટિ-બેક્ટેરિયલ એજન્ટો મુક્ત થાય છે જે મોઢાના આરોગ્યને જાળવવામાં મદદ કરે છે.
કેવી રીતે કરવું: તમારી નાની આંગળી જેટલી જાડી ડાળી પસંદ કરો. એક છેડાને બ્રશ જેવું બનાવવા માટે ચાવો અને પછી લાળને થૂંકી દો. આ બ્રશથી દાંત અને પેઢા સાફ કરો.
જીભ સાફ કરવી (Tongue Scraping):
મોઢાના પોલાણને સાફ કરવા અને બેક્ટેરિયાના કારણે બનતી પ્લેકને દૂર કરવા માટે જીભ સાફ કરવી ખૂબ જ જરૂરી છે.
કેવી રીતે કરવું: તાંબા અથવા સ્ટેનલેસ સ્ટીલના જીભ ખરણીનો ઉપયોગ કરીને જીભને ઘણી વખત સાફ કરો.
હર્બલ માઉથ રિન્સ:
ત્રિફળા અથવા યષ્ટિમધુનો ઉકાળો મોઢાને સ્વચ્છ રાખવા માટે ઉત્તમ માઉથવોશનું કામ કરે છે. તે મોઢાની સ્વચ્છતા જાળવવા ઉપરાંત મોઢાના ચાંદા ઘટાડવામાં પણ મદદ કરે છે.
કેવી રીતે કરવું: ત્રિફળા અથવા યષ્ટિમધુને પાણીમાં ઉકાળો, જ્યાં સુધી પાણી અડધું ન થઈ જાય. તેને ઠંડુ થવા દઈને મોઢામાં કોગળા કરો.
દિવસમાં બે વાર બ્રશ કરો:
દરેક ભોજન પછી બ્રશ કરવું મહત્વનું છે, ખાસ કરીને ચોકલેટ જેવા ચીકણા ખોરાક ખાધા પછી. જોકે, દિવસમાં 4-5 વખત બ્રશ કરવું દરેક માટે શક્ય નથી, પરંતુ આપણે ઓછામાં ઓછા બે વાર બ્રશ કરવું જોઈએ. સવારે ઉઠ્યા પછી અને રાત્રે સૂતા પહેલા. આ નિયમિતતાથી દાંતનું સ્વાસ્થ્ય જળવાઈ રહે છે અને પીળાશ ઓછી થાય છે.