ગાંધીનગર.
વિજ્ઞાન અને ટેક્નોલોજીના ઉભરતા ક્ષેત્રોમાં સંશોધન અને શૈક્ષણિક શ્રેષ્ઠતાને આગળ વધારવા અને મજબૂત સંશોધન-સમર્થિત નવીનતાઓને પ્રોત્સાહન આપવાના ધ્યેયને આગળ ધપાવતા, ભારતીય પ્રૌદ્યોગિકી સંસ્થાન ગાંધીનગર (IITGN)એ તેના કેમ્પસમાં બે અદ્યતન પ્રયોગશાળાઓનું ઉદ્ઘાટન કર્યું. આજે IITGNના ઉદાર સપોર્ટર સ્વર્ગસ્થ ગોરધનભાઈ બી ગેલોતના પત્ની સરિતા જી ગેલોત દ્વારા તેમના પરિવારના સભ્યોની હાજરીમાં 'આર્ટિફિશિયલ ઈન્ટેલિજન્સ એન્ડ ડેટા સાયન્સ' અને 'સરિતા જી ગેલોટ લેબોરેટરી ફોર ઈન્ટેલિજન્ટ રિહેબિલિટેશન એન્ડ ઈફેક્ટિવ કોમ્પ્યુટિંગ સિસ્ટમ્સ'નું ઉદ્ઘાટન કરવામાં આવ્યું હતું.
‘ગોરધનભાઈ બી ગેલોત લેબોરેટરી ફોર આર્ટિફિશિયલ ઈન્ટેલિજન્સ એન્ડ ડેટા સાયન્સ’ અત્યાધુનિક સંશોધનને પ્રોત્સાહિત કરવા માટે ડેટા સાયન્સ, મશીન લર્નિંગ, આર્ટિફિશિયલ ઈન્ટેલિજન્સ, એપ્લાઇડ મેથેમેટિક્સ અને અન્ય વિદ્યાશાખાના પ્રગતિશીલ ક્ષેત્રોના નિષ્ણાતોને એકસાથે લાવીને વૈવિધ્યસભર અને સહયોગી ઇકોસિસ્ટમને પ્રોત્સાહન આપશે. તે બહુમુખી, આંતરશાખાકીય વાર્તાલાપને સરળ બનાવશે, જે સંસ્થાના અસાધારણ સંશોધકોને આ ઝડપથી વિકસતા ક્ષેત્રમાં પ્રગતિ માટે નવા ઉકેલો માટે ઇનોવેટ કરવા અને સહયોગ કરવાની તક આપશે.
‘સરિતા જી ગેલોત લેબોરેટરી ફોર ઇન્ટેલિજન્ટ રિહેબિલિટેશન એન્ડ ઇફેક્ટિવ કમ્પ્યુટિંગ સિસ્ટમ્સ’ નવીન, ગ્રાઉન્ડ બ્રેકિંગ રિસર્ચ સોલ્યુશન્સ બનાવીને તેને સમાજમાં પહોંચાડવા માટે કોસ્ટ-ઇફેક્ટિવ, હાઇ-ટેક સાધનોનો ઉપયોગ કરીને અદ્યતન, અનુકૂલનશીલ, શરીરવિજ્ઞાન-સંવેદનશીલ વર્ચ્યુઅલ રિયાલિટી તકનીકો બનાવવા માટે સમર્પિત છે. આ લેબમાં વિકસિત આંતરશાખાકીય સંશોધન પોસ્ટ-સ્ટ્રોક હેમીપ્લેજિયા, પાર્કિન્સન રોગ, જ્ઞાનાત્મક ક્ષતિ, ઓટીઝમ અને અન્ય સંબંધિત પરિસ્થિતિઓથી પીડાતા દર્દીઓના પુનર્વસનમાં મદદ કરશે.
અગાઉ ગોરધનભાઈએ અસાધારણ શૈક્ષણિક સિદ્ધિઓને સન્માનવા અને ગ્રાઉન્ડ બ્રેકિંગ સંશોધનને પુરસ્કૃત કરવા માટે તેમના માતા-પિતાના માનમાં સંસ્થામાં બે ચેર્સ, 'બીએસ ગેલોત ચેર' અને 'કંકુબેન બક્ષીરામભાઈ ગેલોત ચેર'ની પણ સ્થાપના કરી હતી.
ગુજરાતના ઉમરગામના વતની ગોરધનભાઈ બી ગેલોતને તેમના પિતા બક્ષીરામભાઈ એસ ગેલોત, જે એક સેલ્ફ-મેડ અને કુશળ ઉદ્યોગસાહસિક હતા, પાસેથી શિક્ષણ પ્રત્યે ઊંડી પ્રશંસા અને જ્ઞાનની તરસ વારસામાં મળી હતી. શ્રી ગોરધનભાઈએ ગુજરાત યુનિવર્સિટીમાંથી ઔદ્યોગિક માઇક્રોબાયોલોજીમાં અનુસ્નાતકની ડિગ્રી મેળવી હતી અને ઉમરગામની GIDC ઔદ્યોગિક વસાહતમાં તૈયાર ક્લિનિકલ માઇક્રોબાયલ એનાલિટીકલ ટૂલ્સ માટે સ્મોલ સ્કેલ ઇન્ડસ્ટ્રીયલ (SSI) યુનિટની સ્થાપના પહેલાં અમેરિકન અને ફ્રેન્ચ ફાર્મા મલ્ટિનેશનલ કોર્પોરેશનો સાથે પણ કામ કર્યું હતું. અને લગભગ 50 વર્ષ સુધી સફળતાપૂર્વક તેનું નેતૃત્વ કર્યું હતું.
આજે યોજાયેલ આ કાર્યક્રમમાં ગોરધનભાઈના IITGN સાથેના લાંબા ગાળાના સંબંધો અને શૈક્ષણિક શ્રેષ્ઠતા તરફની સંસ્થાની સફરમાં ભાગીદાર તરીકે સંસ્થા સાથેના તેમના અતૂટ વિશ્વાસની યાદ અપાઈ હતી. ફેકલ્ટી સભ્યો, જેમને બે ચેર એનાયત કરવામાં આવ્યા છે, તેઓએ ચેર દ્વારા સર્જાયેલી પ્રવૃત્તિઓ અને પ્રભાવની ઝાંખી પણ આપી હતી.
તેમના પિતા અને તેમના વિઝનને યાદ કરતાં, સ્વર્ગસ્થ ગોરધનભાઈ બી ગેલોતના પુત્ર નીતિન ગેલોતે કહ્યું, “આજનો પ્રસંગ અમારા માટે આનંદની સાથે સાથે ભાવનાત્મક ક્ષણ છે કારણ કે મારા પિતાએ જે ઈચ્છ્યું હતું તે થઈ રહ્યું છે, પરંતુ તેને જોવા માટે તેઓ હવે અમારી સાથે નથી. તેઓ ઉચ્ચ શિક્ષણ પ્રત્યે ખૂબ જ ઉત્સાહિત હતા અને તેમના જીવનકાળમાં ચાર દાન આપ્યા હતા, જે તમામ IITGNમાં હતા. અસાધારણ સંશોધન અને નવીનતાના રૂપમાં તેમના યોગદાનનું ફળ જોઈને આનંદ થાય છે. IITGN ખાતે પર્યાવરણ અને ઈન્ફ્રાસ્ટ્રક્ચર વિશ્વ-કક્ષાના છે, અને અમે ખૂબ જ ખુશ છીએ કે અમારા પરિવારનું યોગદાન યોગ્ય સ્થાને છે અને આ કાર્યો કેવી રીતે આગળ વધે છે તે જોવા માટે ઉત્સાહિત છીએ.
સ્વર્ગસ્થ ગોરધનભાઈ અને તેમના પરિવારના સભ્યો દ્વારા ઉદાર અને સતત સપોર્ટની પ્રશંસા કરતા, પ્રોફેસર રજત મૂના, ડાયરેક્ટર, IITGN, જણાવ્યું કે, “આવનારા સમયમાં વિજ્ઞાન અને ટેકનોલોજીના આ ઉભરતા ક્ષેત્રોમાં એક મહત્વપૂર્ણ બળ સાબિત થશે તેવી બે લેબના ઉદ્ઘાટન માટે તમારી યજમાની કરવી એ સન્માનની વાત છે. શ્રી ગોરધનભાઈ આજે આપણી વચ્ચે નથી, પણ તેઓ જે પદચિહ્નો છોડી ગયા છે એ આ શૂન્યતા ભરી દે છે. ભારતમાં પ્રતિભાની કોઈ કમી નથી, પરંતુ વિજ્ઞાન અને ટેકનોલોજી સંશોધનને આગળ વધારવા માટે આપણને વધુ સંસાધનોની જરૂર છે. શ્રી ગોરધનભાઈ જેવા પરોપકારીઓ દ્વારા અદ્યતન સંશોધન માટે આપવામાં આવેલ ઉદાર સપોર્ટ સંસ્થાને અને છેવટે આપણા સમાજને આગળ વધારવામાં ખરેખર મદદરૂપ સાબિત થશે.”