Vadodara News: સંસ્કારી નગરી તરીકે ઓળખાતા વડોદરા શહેરમાં ગત મોડી રાત્રે ફરી એકવાર શાંતિ ભંગ કરવાનો પ્રયાસ થયો હતો. ન્યાય મંદિર વિસ્તારમાં આવેલા ભગતસિંહ ચોક નજીક દુધવાલા મોહલ્લામાં હોર્ન વગાડવાની નજીવી બાબતે બે કોમના લોકો આમને-સામને આવતા ભારે બબાલ સર્જાઈ હતી. રાત્રે લગભગ સાડા અગિયાર વાગ્યે બનેલી આ ઘટનાથી સમગ્ર વિસ્તારમાં તણાવનું વાતાવરણ ફેલાયું અને લોકટોળાં એકઠાં થયા હતા.
બાઈક પર ફરવા નીકળેલા સ્થાનિક રહેવાસી યશ હરેશભાઈ પટણી અને તેમની પત્ની સાથે હોર્ન વગાડવા અંગે બે વ્યક્તિઓ સાથે શાબ્દિક બોલાચાલી થઈ હતી. યશે તેમને કહ્યું હતું કે, ભાઈ, આગળ ટ્રાફિક છે, જગ્યા થાય એટલે હું ખસી જઈશ. આ વાતથી ગુસ્સે થઈને બંને વ્યક્તિઓએ ગાડીમાંથી ઉતરીને યશ પર હુમલો કર્યો. બાદમાં તેમણે પોતાના સાથીદારોને બોલાવીને વધુ 10 જેટલા લોકો સાથે મળીને મારપીટ કરી હતી. ભોગ બનનારની બહેનના જણાવ્યા અનુસાર, જો આ ઘટના સુમસામ વિસ્તારમાં થઈ હોત, તો વધુ મોટી ઘટના સર્જાઈ શકી હોત.
ઘટનાની જાણ થતાં જ રાવપુરા પોલીસ સ્ટેશનની ટીમ સહિત ઉચ્ચ પોલીસ અધિકારીઓ ઘટનાસ્થળે દોડી આવ્યા હતા. જોકે ભોગ બનનાર પરિવારનું આક્ષેપ છે કે, પોલીસે પૂરતો સહકાર આપ્યો નથી અને માત્ર ફરિયાદ લખાવો અને જાઓ એવી વાત કરી હતી. ઘટનાસ્થળે લગભગ 100 જેટલા પોલીસકર્મીઓ હાજર હોવા છતાં, પ્રારંભિક તબક્કામાં કોઈ કડક પગલાં લેવાયા નહોતા, એવું પરિવારનું કહેવું છે.
આ મામલે યશ પટણીએ રાવપુરા પોલીસ સ્ટેશનમાં ફરિયાદ નોંધાવી છે. ફરિયાદના આધારે પોલીસે તાત્કાલિક કાર્યવાહી હાથ ધરી અને ત્રણ આરોપી સાબિર અજબભાઈ સતાવાલા, જાવેદ અજબભાઈ સબલવાલા અને જૈનુલ સાબિર સકાવાલાને ઝડપી પાડ્યા છે. પોલીસે જણાવ્યું છે કે, ઝઘડો હોર્ન વગાડવાની બાબતે શરૂ થયો હતો, પરંતુ ઝડપથી ઉગ્ર બની ગયો હતો. હાલ આરોપીઓ સામે કાયદેસર કાર્યવાહી શરૂ કરી દેવામાં આવી છે અને વધુ તપાસ હાથ ધરવામાં આવી રહી છે.
ઝઘડાની ઘટનાથી વિસ્તારના વાતાવરણમાં તણાવ સર્જાતા પોલીસે વધારાનો બંદોબસ્ત તહેનાત કર્યો છે. સ્થાનિક કોર્પોરેટરો સહિત સમાજના આગેવાનો ઘટના સ્થળે પહોંચી લોકોને શાંતિ જાળવવા અપીલ કરી રહ્યા છે. પોલીસે શહેરમાં શાંતિ જાળવવા પેટ્રોલિંગ વધાર્યું છે અને આવી ઘટનાઓ ફરી ન બને તે માટે પગલાં લેવામાં આવશે, એવી ખાતરી આપી છે. આ ઘટનાએ વડોદરા જેવી સંસ્કારી નગરીની છબિ પર ફરી એકવાર પ્રશ્નાર્થ ઉભો કર્યો છે અને કાયદો-સુવ્યવસ્થાની બાબતે ચર્ચા શરૂ થઈ છે.