Bharuch: ભરૂચ જિલ્લાના વાગરા તાલુકામાં નવ મહિનાના બાળકના ગળામાં નાની મચ્છી ફસાતા ગંભીર પરિસ્થિતિ સર્જાઈ હતી. ગળામાં મચ્છી અટવાતા બાળકને શ્વાસ લેવામાં ભારે તકલીફ થવા લાગી હતી અને લોહીની ઉલટી પણ થવા લાગી હતી. પ્રાથમિક સારવાર બાદ બાળકને CHC વાગરાથી 108 એમ્બ્યુલન્સ મારફતે સિવિલ હોસ્પિટલ ભરૂચ ખાતે રીફર કરવામાં આવ્યો હતો.
રમતાં રમતાં બાળકના મોઢામાં મચ્છી ફસાઈ ગઈ હતી, જેના કારણે જીવન જોખમાયું હતું. આ ઘટનાની જાણ થતાં જ 108 એમ્બ્યુલન્સ ટીમ EMT સોનલબેન માલીવાડ અને પાઈલટ કૃષ્ણપાલસિંહ રાઠોડ તરત જ ઘટનાસ્થળે પહોંચી બાળકને સિવિલ હોસ્પિટલ લઈ જવા નીકળ્યા હતા.
આ દરમિયાન ડૉ. કુરેશીની સલાહ મુજબ EMT સોનલબેન માલીવાડે 108માં લીધેલી તાલીમનો ઉપયોગ કરતાં સતત 15 થી 20 મિનિટ સુધી બેક બ્લો (Back Blow) આપ્યા. અંતે બાળકના ગળામાં ફસાયેલી મચ્છી બહાર આવી ગઈ અને બાળકને શ્વાસમાં રાહત મળી હતી. જે બાદ તેને ઓક્સિજન સપોર્ટ અને વાયટલ મોનિટરિંગ સાથે સિવિલ હોસ્પિટલ ભરૂચ સુરક્ષિત પહોંચાડવામાં આવ્યો હતો.
108ની EMT સોનલબેન માલીવાડની કુશળતા અને તાત્કાલિક કાર્યવાહીથી નવ મહિનાના બાળકનો જીવ બચી ગયો. આ પ્રશંસનીય કામગીરી બદલ સિવિલ હોસ્પિટલના તબીબો તથા બાળકના પરિવારજનો દ્વારા સોનલબેનને અભિનંદન આપવામાં આવ્યા.