Glenn Maxwell Injury: ગ્લેન મેક્સવેલને થયેલી એક આશ્ચર્યજનક ઈજાએ ઓસ્ટ્રેલિયાની મુશ્કેલીઓ બમણી કરી દીધી છે. ન્યુઝીલેન્ડમાં નેટ્સ પ્રેક્ટિસ દરમિયાન ઈજા થઈ હતી. આ ઈજાને કારણે 36 વર્ષીય ઓલરાઉન્ડર ન્યુઝીલેન્ડ સામેની સીરિઝમાંથી બહાર થઈ ગયો છે. એટલું જ નહીં ત્યારપછી ભારત સામેની શ્રેણીમાં પણ તેના રમવાની શક્યતા ઓછી દેખાઈ રહી છે. ઓસ્ટ્રેલિયન ટીમ હાલમાં ન્યુઝીલેન્ડના પ્રવાસે છે, જ્યાં તેને 1 ઓક્ટોબરથી T20 શ્રેણી રમવાની છે. પરંતુ તે પહેલાં જ ગ્લેન મેક્સવેલ ઈજાગ્રસ્ત થયો છે.
ગ્લેન મેક્સવેલને ઈજા કેવી રીતે થઈ
આ ઘટના ત્યારે બની જ્યારે તે નેટ્સમાં મિચેલ ઓવેનને બોલિંગ કરી રહ્યો હતો. તેના એક બોલ પર મિસેલ ઓવેને શોટ માર્યો, જે સીધો તેના હાથના નીચલા ભાગમાં વાગ્યો. ઈજા પછી તેનું સ્કેન કરવામાં આવ્યું, જેમાં ફ્રેક્ચર હોવાનું જાણવા મળ્યું. રિપોર્ટ આવ્યા બાદ ઓસ્ટ્રેલિયન પસંદગીકારોએ તેને ન્યુઝીલેન્ડ સામેની 3 T20 મેચોની શ્રેણીમાંથી બહાર રાખવાનો નિર્ણય કર્યો અને તેની જગ્યાએ જોશ ફિલિપને તક આપી.
ભારત સામેની મેચ રમવા પર શંકા
ગ્લેન મેક્સવેલની ઈજા પછી ઓસ્ટ્રેલિયાની મુશ્કેલી માત્ર એટલા માટે નથી વધી કે તે ન્યુઝીલેન્ડ સામેની T20 શ્રેણીમાંથી બહાર થઈ ગયો છે. પરંતુ એવી પણ આશંકા છે કે 29 ઓક્ટોબરથી શરૂ થનારી ભારત સામેની T20 શ્રેણીમાં પણ તેનું રમવું શંકાસ્પદ છે. એવું કહેવામાં આવી રહ્યું છે કે સમય ઓછો હોવાને કારણે ભારત સામેની સીરિઝ પહેલા ગ્લેન મેક્સવેલનું સ્વસ્થ થવું મુશ્કેલ જણાઈ રહ્યું છે.
ઓસ્ટ્રેલિયાએ 1 ઓક્ટોબરથી 4 ઓક્ટોબર દરમિયાન 3 T20 મેચોની શ્રેણી રમવાની છે. ત્યારબાદ 29 ઓક્ટોબરથી 8 નવેમ્બર દરમિયાન ઓસ્ટ્રેલિયન ટીમ પોતાની યજમાનીમાં ભારત સાથે 5 T20 મેચોની શ્રેણી રમશે.