Paneer Kheer Recipe: નવરાત્રીના નવ દિવસના ઉપવાસ દરમિયાન મોટાભાગના લોકો ફળ, સાબુદાણા અને બટાકામાંથી બનેલી વાનગીઓનું સેવન કરે છે. જોકે, લાંબા સમય સુધી શરીરમાં ઊર્જા જળવાઈ રહે અને જરૂરી પોષક તત્ત્વોની કમી ન થાય તે માટે પ્રોટીનયુક્ત ખોરાક પણ એટલો જ જરૂરી છે. આવી સ્થિતિમાં પનીર ખીર તમારા માટે એક પરફેક્ટ વિકલ્પ બની શકે છે.
પનીર અને દૂધથી બનતી આ ખીર સ્વાદિષ્ટ હોવા સાથે પોષક તત્ત્વોથી ભરપૂર હોય છે. ખાસ વાત એ છે કે તેને બનાવવામાં વધુ સમય પણ લાગતો નથી અને ઘરમાં ઉપલબ્ધ સામગ્રીથી જ તૈયાર થઈ જાય છે. જો તમે આ નવરાત્રીમાં કંઈક નવું અને હેલ્ધી ટ્રાય કરવા માંગતા હોવ તો આ પનીર ખીરની રેસીપી જરૂર અજમાવો.
પનીર ખીર બનાવવાની સામગ્રી
- 250 ગ્રામ પનીર
- 1 લિટર ફુલ ફેટ દૂધ
- 4 થી 5 ચમચી ખાંડ
- 1/2 ચમચી એલચી પાવડર
- 10 થી 12 બદામ
- 8 થી 10 કાજુ
- થોડા પિસ્તા
- થોડા કેસરના તાંતણા
- 1 ચમચી ઘી
પનીર ખીર બનાવવાની રીત
સૌપ્રથમ પનીરને ખમણીની મદદથી બારીક છીણી લો. જો પનીર ફ્રિજમાં રાખેલું હોય તો તેને થોડા સમય માટે રૂમ ટેમ્પરેચર પર રાખી દો જેથી તેનો ટેક્સ્ચર સોફ્ટ થઈ જાય. હવે બદામ, કાજુ અને પિસ્તાને બારીક સમારીને અલગ રાખો.
એક જાડા તળિયાવાળા વાસણમાં દૂધ ઉકાળવા મૂકો. દૂધમાં એક ઉકળો આવે પછી ગેસ ધીમો કરી દો અને સતત હલાવતા રહો. લગભગ 10 થી 15 મિનિટ સુધી દૂધને ધીમા તાપે ચઢવા દો જેથી તે થોડું ઘટ્ટ બને અને ખીરનો સ્વાદ વધુ મલાઈદાર આવે.
હવે એક નાની કડાઈમાં થોડું ઘી ગરમ કરો અને તેમાં છીણેલું પનીર 2 થી 3 મિનિટ સુધી હળવેથી સાંતળો. આ સ્ટેપ કરવાથી પનીરમાંથી આવતી કાચી સુગંધ દૂર થઈ જાય છે અને ખીરનો સ્વાદ વધુ સારો બને છે.
ત્યારબાદ સાંતળેલું પનીર ઉકળતા દૂધમાં ઉમેરો અને સારી રીતે મિક્સ કરો. હવે તેમાં ખાંડ ઉમેરો અને સતત હલાવતા રહો જેથી ખાંડ સંપૂર્ણ રીતે ઓગળી જાય. મિશ્રણને 8 થી 10 મિનિટ સુધી ધીમા તાપે ચઢવા દો.
જ્યારે ખીર ઘટ્ટ થવા લાગે ત્યારે તેમાં એલચી પાવડર, કેસર અને સમારેલા ડ્રાયફ્રૂટ્સ ઉમેરો. ફરીથી 4 થી 5 મિનિટ સુધી ચઢવા દો જેથી તમામ સામગ્રીનો સ્વાદ ખીરમાં સારી રીતે ભળી જાય.
હવે ગેસ બંધ કરી ખીરને થોડું ઠંડુ થવા દો. તમે તેને ગરમ-ગરમ પણ પીરસી શકો છો અથવા ફ્રિજમાં રાખીને ઠંડી પણ સર્વ કરી શકો છો. ઉપરથી થોડા ડ્રાયફ્રૂટ્સ અને કેસરથી ગાર્નિશ કરવાથી તેની સુંદરતા અને સ્વાદ બંને વધી જાય છે.
ટિપ્સ
- વધુ મલાઈદાર ટેક્સ્ચર માટે ફુલ ફેટ દૂધનો ઉપયોગ કરો.
- ખાંડની જગ્યાએ મિસરી અથવા ગોળનો પણ ઉપયોગ કરી શકાય છે.
- ખીરને વધુ રિચ બનાવવા માટે થોડું માવો પણ ઉમેરી શકાય.
- સર્વ કરતા પહેલા 30 મિનિટ ફ્રિજમાં રાખશો તો તેનો સ્વાદ વધુ સારો લાગશે.