Methi Ladoo Recipe: શિયાળાની શરૂઆત થતાં જ ઘરોમાં અડદિયા પાક, ગુંદરના લાડુ અને મેથીના લાડુ જેવી પરંપરાગત વાનગીઓ બનવા લાગે છે. મેથીના લાડુ સ્વાદમાં થોડા કડવા, મીઠા અને સુગંધિત હોય છે. તેમાં ગોળ, ઘી અને ડ્રાયફ્રૂટ્સ ઉમેરવાથી તેનો સ્વાદ વધુ સારો બને છે. તો આ શિયાળામાં ઘરે જ બનાવો પરંપરાગત ગુજરાતી મેથીના લાડુ.
મેથીના લાડુ બનાવવા માટેની સામગ્રી
- મેથીનો લોટ – 1 કપ
- ઘઉંનો લોટ – અડધો કપ
- ગોળ – 1 કપ
- ઘી – 1 કપ
- ગુંદર – અડધો કપ
- ગુંદર ગમ – જરૂર મુજબ
- બદામ – ¼ કપ
- કાજુ – ¼ કપ
- સૂકું કોપરું – ¼ કપ
- સૂંઠનો પાઉડર – 1 ચમચી
- ગંઠોડાનો પાઉડર – અડધી ચમચી
- એલચી પાઉડર – અડધી ચમચી
- ખસખસ – 2 ચમચી
મેથીના લાડુ બનાવવાની રીત
સૌથી પહેલાં મેથીના લોટને એક વાસણમાં લઈ તેમાં થોડું ગરમ ઘી ઉમેરી બરાબર મિક્સ કરી લો. તેને થોડા સમય માટે ઢાંકીને રાખો, જેથી લોટમાં ઘી બરાબર ભળી જાય અને તેની કડવાશ પણ થોડી ઓછી થાય.
હવે એક કડાઈમાં ઘી ગરમ કરો. તેમાં ગુંદર નાખીને ધીમા તાપે તળી લો. ગુંદર ફૂલી જાય એટલે તેને કાઢીને ઠંડો થવા દો અને પછી તેનો ભૂકો કરી લો. આ જ કડાઈમાં બદામ અને કાજુને હળવા શેકી લો. ત્યારબાદ સૂકું કોપરું અને ખસખસ પણ શેકી લો.
હવે કડાઈમાં થોડું ઘી નાખીને મેથીનો લોટ ધીમા તાપે શેકો. લોટમાંથી સરસ સુગંધ આવવા લાગે અને તેનો રંગ બદલાય ત્યાં સુધી તેને સતત હલાવતા રહો. ત્યારબાદ તેમાં ઘઉંનો લોટ ઉમેરીને થોડીવાર શેકી લો.
હવે શેકેલા લોટમાં ગુંદરનો ભૂકો, ડ્રાયફ્રૂટ્સ, સૂંઠ પાઉડર, ગંઠોડાનો પાઉડર અને એલચી પાઉડર ઉમેરીને બરાબર મિક્સ કરો.
અંતમાં ગોળને થોડા ઘીમાં ધીમા તાપે ઓગાળી લો. ગોળ ઓગળી જાય એટલે તેને ગેસ પરથી ઉતારીને લોટના મિશ્રણમાં ઉમેરો. બધી સામગ્રી સારી રીતે મિક્સ કરી લો. મિશ્રણ થોડું ગરમ હોય ત્યારે હાથમાં ઘી લગાવીને તેના સરખા ભાગ કરી ગોળ લાડુ વાળી લો.
તૈયાર છે શિયાળામાં ખાવા માટે સ્વાદિષ્ટ અને પરંપરાગત મેથીના લાડુ. તેને એરટાઇટ ડબ્બામાં ભરીને રાખી શકો છો.