Khajur Pak Recipe: શિયાળાની ઋતુમાં ખજૂર અને ડ્રાયફ્રૂટ્સમાંથી બનતી મીઠાઈ ખાવાની મજા જ કંઈક અલગ હોય છે. ખાસ કરીને ખજૂર પાક એક એવી પરંપરાગત મીઠાઈ છે, જેનો સ્વાદ બાળકો અને મોટાઓ બંનેને પસંદ આવે છે. તેમાં ગોળની જગ્યાએ ખજૂરની કુદરતી મીઠાશનો ઉપયોગ કરી શકાય છે. જો તમે પણ ઘરે કંઈક અલગ અને સ્વાદિષ્ટ મીઠાઈ બનાવવા માંગો છો, તો આ રીતે બનાવો ટેસ્ટી ખજૂર પાક.
ખજૂર પાક બનાવવા માટેની સામગ્રી
આ પણ વાંચો
- બી કાઢેલા ખજૂર – 2 કપ
- બદામ – અડધો કપ
- કાજુ – અડધો કપ
- પિસ્તા – 2 ચમચી
- અખરોટ – 2 ચમચી
- સૂકું કોપરું – 2 ચમચી
- ઘી – 3થી 4 ચમચી
- ખસખસ – 2 ચમચી
- એલચી પાઉડર – અડધી ચમચી
- જાયફળ પાઉડર – એક ચપટી
ખજૂર પાક બનાવવાની રીત
સૌથી પહેલાં ખજૂરમાંથી બી કાઢી લો. જો ખજૂર વધારે કઠણ હોય તો તેને થોડા સમય માટે ગરમ દૂધમાં પલાળી શકો છો. ત્યારબાદ ખજૂરને મિક્સરમાં નાખીને અધકચરી પેસ્ટ બનાવી લો. ધ્યાન રાખો કે પેસ્ટ એકદમ પાણી જેવી પાતળી ન થાય. ખજૂરમાં નાના ટુકડા રહે તો પણ ચાલે છે.
હવે બદામ, કાજુ, પિસ્તા અને અખરોટને નાના ટુકડામાં સમારી લો. એક કડાઈમાં એક ચમચી ઘી ગરમ કરી તેમાં સમારેલા ડ્રાયફ્રૂટ્સ નાખો. તેને ધીમા તાપે બેથી ત્રણ મિનિટ સુધી શેકો. ડ્રાયફ્રૂટ્સમાંથી સરસ સુગંધ આવવા લાગે એટલે તેને એક વાસણમાં કાઢી લો.
હવે એ જ કડાઈમાં થોડું ઘી નાખીને ખસખસ અને સૂકું કોપરું હળવું શેકી લો. ત્યારબાદ તેમાં તૈયાર કરેલી ખજૂરની પેસ્ટ ઉમેરો. ગેસ ધીમો રાખીને ખજૂરની પેસ્ટને સતત હલાવતા રહો. શરૂઆતમાં ખજૂર કડાઈમાં ચોંટશે, પરંતુ ધીમે ધીમે ઘી છૂટવા લાગશે અને મિશ્રણ નરમ બનશે.
ખજૂરની પેસ્ટ થોડી શેકાઈ જાય એટલે તેમાં અગાઉથી શેકેલા બદામ, કાજુ, પિસ્તા અને અખરોટ ઉમેરો. હવે એલચી પાઉડર અને જાયફળ પાઉડર નાખીને બધી સામગ્રીને સારી રીતે મિક્સ કરો. ધીમા તાપે થોડો સમય હલાવતા રહો, જેથી ડ્રાયફ્રૂટ્સ અને ખજૂર એકબીજા સાથે બરાબર ભળી જાય.
હવે એક થાળીમાં અથવા ટ્રેમાં ઘી લગાવી લો. તૈયાર કરેલું ખજૂરનું મિશ્રણ તેમાં નાખીને ચમચી અથવા વાટકીની મદદથી સરખી રીતે પાથરી દો. ઉપરથી થોડા સમારેલા પિસ્તા અને બદામ નાખીને હળવા હાથે દબાવી દો.
મિશ્રણ થોડું ઠંડું થાય એટલે તેને ફ્રિજમાં 1થી 2 કલાક માટે સેટ થવા મૂકો. ત્યારબાદ તેને બહાર કાઢીને ચાકુની મદદથી ચોરસ અથવા મનપસંદ આકારમાં કાપી લો. તૈયાર છે સ્વાદિષ્ટ અને દાણેદાર ખજૂર પાક. તેને એરટાઇટ ડબ્બામાં ભરીને રાખી શકો છો.