રવા ઉપમા નાસ્તા માટે સૌથી બેસ્ટ વિકલ્પ છે. ફાઈબરથી ભરપૂર રવા ઉપમા આપણા પાચનતંત્રને સારી રીતે જાળવવામાં મદદ કરે છે. આ સિવાય તે લાંબા સમય સુધી એનર્જી જાળવી રાખવામાં પણ મદદ કરે છે. રવા ઉપમા એક સ્વાદિષ્ટ વાનગી છે જે પુખ્ત વયના અને બાળકો બંનેને પસંદ આવશે. રવા ઉપમા ઘણી બધી શાકભાજી ઉમેરીને બનાવવામાં આવે છે. સવારની વ્યસ્ત લાઈફસ્ટાઈલ વચ્ચે તમે બાળકોના ટિફિનમાં રવા ઉપમા પણ રાખી શકો છો. રવા ઉપમા બનાવવો ખૂબ જ સરળ છે અને થોડા જ સમયમાં તૈયાર થઈ જાય છે. જો તમે આ વખતે નાસ્તામાં રવા ઉપમાને ટ્રાય કરવા માંગો છો, તો અમારા દ્વારા આપવામાં આવેલી રેસિપી તમારા માટે ખૂબ જ ઉપયોગી સાબિત થઈ શકે છે. ચાલો જાણીએ રવા ઉપમા બનાવવાની સરળ રેસિપી…
રવા ઉપમા બનાવવા માટે સામગ્રી
સોજી - 1 કપ, અડદની દાળ- 1 ચમચી, બારીક સમારેલી ડુંગળી - 1/2 કપ, રાઈ - 1/2 ચમચી, કઢી પત્તા- 8-10, લીલા મરચા - 2-3, ગાજર સમારેલા - 1-2, સમારેલા ટામેટાં - 2-3, વટાણા - 1-2 ચમચી, ખાંડ - 2 ચમચી, લીંબુનો રસ - 2 ચમચી, લીલા ધાણા સમારેલા - 1 ચમચી, તેલ- 2 ચમચી (જરૂર મુજબ), મીઠું - સ્વાદ મુજબ
બનાવવાની રીત
રવા ઉપમા બનાવવા માટે સૌથી પહેલા એક કડાઈમાં રવા (સોજી)ને નાખો અને મીડિયમ આંચ પર તેને ડ્રાઈ રોસ્ટ કરો. 4-5 મિનિટ સુધી શેક્યા બાદ રવો આછો ગુલાબી થઈ જશે, જે બાદ ગેસ બંધ કરીને રવાને એક બાઉલમાં કાઢીને અલગ રાખી દો.
આ પણ વાંચો
હવે કડાઈમાં 2 ટેબલસ્પૂન તેલ નાખીને મીડિયમ આંચ પર ગરમ કરો. તેલ ગરમ થયા બાદ તેમાં રાઈના દાણા નાખીને તતડાવો. ત્યારબાદ તેમાં અડદની દાળ, કઢી પત્તા અને લીલાં મરચાં નાખીને થોડી સેકન્ડ માટે સાંતળો. ત્યાર બાદ તેમાં બારીક સમારેલી ડુંગળી, ગાજર, ટામેટા અને વટાણા નાખીને વચ્ચે-વચ્ચે હલાવતા રહીને ડુંગળીનો રંગ આછો બ્રાઉન થાય ત્યાં સુધી સાંતળો.
આ પછી કડાઈમાં રવો ઉમેરો અને મિક્સ કરો. મિશ્રણને બે મિનિટ હલાવ્યા પછી કડાઈમાં 3 કપ નવશેકું પાણી અને સ્વાદ મુજબ મીઠું નાખીને ચમચા વડે હલાવો. આ પછી કડાઈને ઢાંકી દો અને ઉપમાને 4-5 મિનિટ સુધી પાકવા દો. વચ્ચે વચ્ચે ઉપમાને હલાવતા રહો.
આ પછી તેમાં લીંબુનો રસ અને ખાંડ નાખીને મિક્સ કરો. ઉપમાને વધુ એક મિનિટ સુધી પકાવો અને પછી ગેસ બંધ કરી દો. હવે આ ઉપમાને કાચના બાઉલમાં કાઢી લો. આ પછી લીલા ધાણા નાખીને રવા ઉપમાને ગાર્નિશ કરો. નાસ્તા માટે સ્વાદિષ્ટ ઉપમા બનીને તૈયાર છે.
ઝડપી અને વિશ્વસનીય સમાચારો માટે ડાઉનલોડ કરો ગુજરાતી જાગરણની ન્યૂઝ એપ.