Vadodara News: વડોદરા મહાનગરપાલિકા દ્વારા કારેલીબાગ પાણીની ટાંકી હેઠળ આવતા વિવિધ વિસ્તારોના નાગરિકો માટે એક મહત્વની જાહેરાત કરવામાં આવી છે. આગામી તારીખ 29 મે, 2026 શુક્રવારના રોજ કારેલીબાગ વિસ્તારમાં પાણી પુરવઠો ખોરવાશે અથવા નિર્ધારિત સમય કરતાં ઘણો વિલંબથી મળશે. ઉનાળાની કાળઝાળ ગરમી વચ્ચે પાણી પુરવઠો પ્રભાવિત થવાનો હોવાથી, પાલિકા તંત્ર દ્વારા નાગરિકોને અગાઉથી જ પાણીનો યોગ્ય સંગ્રહ કરી રાખવા, વહીવટી તંત્રને સહકાર આપવા માટે ખાસ અપીલ કરવામાં આવી છે.
શટડાઉનને કારણે પમ્પિંગ મશીનરી બંધ રહેશે
પાલિકાના સત્તાવાર સૂત્રો પાસેથી મળતી માહિતી મુજબ, 29 મેના રોજ મધ્ય ગુજરાત વીજ કંપની લિમિટેડ (MGVCL) દ્વારા કારેલીબાગ રસ/ડી સબ-સ્ટેશન ખાતે પૂર્વ આયોજિત વીજ શટડાઉન રાખવામાં આવ્યું છે. આ શટડાઉનને કારણે કારેલીબાગ પાણીની ટાંકી ખાતે સવારે 7:00 વાગ્યાથી સવારના 11:00 વાગ્યા સુધી વીજ પુરવઠો સંપૂર્ણપણે બંધ રહેશે. વીજળી ન હોવાના કારણે ટાંકી ખાતે આવેલી હાઈપ્રેશર પમ્પિંગ મશીનરીઓ ચલાવી શકાય તેમ નથી. પરિણામે, કારેલીબાગ ટાંકીમાંથી સવાર અને સાંજના સમયે વહેંચાતા પાણી પુરવઠાના સમયપત્રક પર તેની સીધી અસર પડશે.
આ વિસ્તારો થશે અસરગ્રસ્ત
આ વીજ શટડાઉનના કારણે સવારના ઝોનમાં પાણી મેળવતા વિસ્તારો જેવા કે, કલાકુંજ સોસાયટી, વૃંદાવન, કૃષ્ણલીલા સોસાયટી, આમ્રપાલી, મુખ્યમંત્રી આવાસ, ફતેપુરા, અમિતનગર, અજિતાનગર અને ભાવનાપાર્ક વગેરે વિસ્તારોમાં પાણી વિતરણ સમયસર થઈ શકશે નહીં.
આ ઉપરાંત, સાંજના ઝોનમાં પાણી મેળવતા વિસ્તારો જેવા કે જ્યોતીપાર્ક, આનંદનગર, સુવિધાપાર્ક, બ્રાઈટ સ્કૂલવાળો ખાંચો, દીપિકા સોસાયટી, શાંતિપાર્ક, અંબાલાલપાર્ક, આર્યકન્યા, રણછોડપાર્ક, સોનલપાર્ક, જયગાયત્રીનગર અને અયોધ્યાનગર જેવા તમામ વિસ્તારોમાં પણ પાણી નિર્ધારિત સમય કરતાં ઘણું મોડું મળશે.
નાગરિકોને પાણીનો સંગ્રહ કરવા અપીલ
હાલમાં ઉનાળાની ઋતુ ચાલી રહી હોવાથી નાગરિકોમાં પાણીની જરૂરિયાત અને વપરાશ વધુ હોય છે. પાલિકાની યાદીમાં જણાવ્યા અનુસાર, શુક્રવારે આ તમામ વિસ્તારોમાં પાણી ખૂબ જ હળવા (ઓછા) દબાણથી અને મર્યાદિત સમય માટે આપવામાં આવશે. તેથી, સ્થાનિક રહીશોને દૈનિક કાર્યોમાં કોઈ મુશ્કેલી ન પડે તે માટે ગુરુવારથી જ પાણીનો પૂરતો સંગ્રહ કરી રાખવા વિનંતી કરવામાં આવી છે.