Vadodara News: વડોદરા શહેરમાં તાજેતરમાં પડેલા વરસાદ બાદ વાતાવરણમાં આવેલા પલટાને કારણે મોસમી રોગચાળાના કેસોમાં વધારો જોવા મળી રહ્યો છે. વરસાદી સીઝન પૂર્ણ થયા બાદ શહેરમાં તાવ, કમળો અને ટાઇફોઇડ જેવા પાણીજન્ય તથા વાયરસજન્ય રોગોના દર્દીઓની સંખ્યામાં સામાન્ય વધારો નોંધાયો છે.
જો કે આરોગ્ય તંત્રના જણાવ્યા અનુસાર, હાલમાં પરિસ્થિતિ સંપૂર્ણપણે નિયંત્રણ હેઠળ છે અને નાગરિકોએ ગભરાવાની કોઈ જરૂર નથી. વડોદરાની સરકારી તેમજ ખાનગી હોસ્પિટલોમાં તાવ અને પાચનતંત્રને લગતી તકલીફો ધરાવતા દર્દીઓની સંખ્યામાં નજીવો વધારો જોવા મળ્યો છે.
રાહતની વાત એ છે કે, ચોમાસા બાદ ચોક્કસ વિસ્તારમાં ફેલાતા ડેન્ગ્યુ અને ચિકનગુનિયા જેવા જીવલેણ મચ્છરજન્ય રોગોના કેસમાં આ વખતે કોઈ મોટો કે ચિંતાજનક ઉછાળો જોવા મળ્યો નથી. આ સિવાય આ કેસો કોઈ એક ચોક્કસ વિસ્તાર પૂરતા મર્યાદિત ન રહેતાં શહેરના જુદા જુદા વિસ્તારોમાંથી છૂટાછવાયા સામાન્ય કેસ તરીકે સામે આવી રહ્યા છે.
પરિસ્થિતિને પહોંચી વળવા માટે વડોદરા મહાનગરપાલિકાનું આરોગ્ય વિભાગ અને હોસ્પિટલ તંત્ર સંપૂર્ણપણે સજ્જ છે. તમામ પ્રાથમિક આરોગ્ય કેન્દ્રો અને હોસ્પિટલોમાં જરૂરી દવાઓ, ટેસ્ટિંગ કીટ અને જરૂરી તબીબી સ્ટાફની પૂરતી વ્યવસ્થા સુનિશ્ચિત કરવામાં આવી છે, જેથી દર્દીઓને સમયસર અને યોગ્ય સારવાર મળી રહે.
હવામાનમાં થતા ફેરફારો અને રોગચાળાના સંભવિત ખતરાને ધ્યાનમાં રાખીને આરોગ્ય નિષ્ણાતો અને તબીબોએ નાગરિકોને વિશેષ સાવચેતી રાખવા અપીલ કરી છે.
તબીબોના જણાવ્યા મુજબ, આ દિવસોમાં ઉકાળેલું ચોખ્ખું પાણી પીવું, બહારનો ખુલ્લો કે વાસી ખોરાક ખાવાનું ટાળવું અને ઘરની આસપાસ પાણી ભરાવા ન દેવું ખૂબ જરૂરી છે. ઘરની આજુબાજુ પાણી ભરાઈ રહેવાના સ્થળોએ મચ્છરનો ઉપદ્રવ ન વધે તે માટે જરૂરી દવાઓનો છંટકાવ કરવા અને તકેદારી રાખવા પણ નાગરિકોને અનુરોધ કરવામાં આવ્યો છે.