Vadodara Mayor: વડોદરા મહાનગરપાલિકાના નવનિયુક્ત પદાધિકારીઓએ સત્તાવાર રીતે પોતાનો પદભાર સંભાળી લીધો છે. વડોદરાના મેયર ગીતાબેન મકવાણાની વરણી થઈ છે. પદભાર સંભાળ્યા બાદ પ્રથમ દિવસે જ પાલિકા કચેરી ખાતે પદાધિકારીઓની અલગ-અલગ શૈલી જોવા મળી હતી, જે હાલ શહેરમાં ભારે ચર્ચાનો વિષય બની છે.
એક તરફ નવનિયુક્ત મેયર ગીતાબેન મકવાણા પોતાની સાદગીનો પરિચય આપતા ટુ-વ્હીલર પર પાલિકા કચેરી પહોંચ્યા હતા, તો બીજી તરફ ડેપ્યુટી મેયર આદિત્ય પટેલ સરકારી પ્રોટોકોલ મુજબ ફાળવવામાં આવેલા વાહનમાં કચેરીએ આવ્યા હતા.
ઘર નજીક હોવાથી ટુ-વ્હીલરનો ઉપયોગ કરીશ: મેયર ગીતા મકવાણા
પાલિકા કચેરી ખાતે પોતાના અંગત ટુ-વ્હીલર (સ્કૂટર) પર આવીને મેયર ગીતા મકવાણાએ સૌને આશ્ચર્યમાં મૂકી દીધા હતા. પ્રથમ દિવસે જ કચેરીએ પહોંચ્યા બાદ તેમણે પત્રકારો સાથે વાતચીતમાં જણાવ્યું હતું કે, "મારું ઘર પાલિકા કચેરીથી ખૂબ જ નજીક આવેલું છે, તેથી હું રોજિંદા કામકાજ માટે મારા ટુ-વ્હીલર પર જ કચેરીએ આવીશ." સરકારી લક્ઝરી કારના ઉપયોગ અંગે તેમણે સ્પષ્ટતા કરી હતી કે, "મને ફાળવવામાં આવેલ સરકારી વાહનનો ઉપયોગ ચોક્કસ કરવામાં આવશે, પરંતુ જ્યારે ખરેખર જરૂર હશે ત્યારે જ તેનો વિવેકપૂર્ણ ઉપયોગ કરીશ." તેમની આ સાદગીએ સામાન્ય જનતામાં ભારે આકર્ષણ જગાવ્યું છે.
પ્રોટોકોલ મુજબ સુવિધાનો વિવેકપૂર્ણ ઉપયોગ કરીશ: ડે. મેયર આદિત્ય પટેલ
બીજી તરફ, વડોદરાના નવનિયુક્ત ડેપ્યુટી મેયર આદિત્ય પટેલ સરકારી વાહનમાં પાલિકા કચેરી ખાતે આવી પહોંચ્યા હતા. તેમણે સરકારી પ્રોટોકોલને પ્રાધાન્ય આપ્યું હતું. મીડિયા સાથેની વાતચીતમાં તેમણે જણાવ્યું હતું કે, "સરકારી પ્રોટોકોલ અને હોદ્દાના નિયમો પ્રમાણે જે પણ સુવિધાઓ ફાળવવામાં આવી છે, તેનો ઉપયોગ કરવામાં આવશે. જો કે, આ તમામ સરકારી સુવિધાઓ અને વાહનનો ઉપયોગ ખૂબ જ જવાબદારીપૂર્વક અને વિવેકપૂર્ણ રીતે કરવામાં આવશે જેથી સરકારી સંસાધનોનો બગાડ ન થાય."
એક જ દિવસે પાલિકાના બે સર્વોચ્ચ હોદ્દેદારોમાં જોવા મળેલો આ પરસ્પર વિરોધાભાસી અભિગમ કચેરીમાં આકર્ષણનું કેન્દ્ર બન્યો હતો. મેયરની સાદગીપૂર્ણ કચેરી યાત્રા અને ડેપ્યુટી મેયરનો પ્રોટોકોલ પ્રત્યેનો આદર, બંને પોતાની જગ્યાએ વડોદરાના વિકાસ માટે કટિબદ્ધ હોવાનો સંદેશ આપે છે.