Pavagadh Mahakali Temple Navratri: માતાજીની આરાધનાના પર્વ નવરાત્રીની શરૂઆતને હવે માંડ ગણતરીના દિવસો બાકી રહ્યા છે, ત્યારે પંચમહાલ જિલ્લામાં આવેલા જગવિખ્યાત યાત્રાધામ પાવાગઢ ખાતે માઈભક્તોનો ભારે ઉત્સાહ જોવા મળી રહ્યો છે.
મહાકાળી માતાજીના દર્શનાર્થે ગુજરાત ઉપરાંત મધ્ય પ્રદેશ અને રાજસ્થાન જેવા પાડોશી રાજ્યોમાંથી પણ હજારોની સંખ્યામાં શ્રદ્ધાળુઓ પાવાગઢના ડુંગર પર પહોંચી રહ્યા છે. વહેલી સવારથી જ મંદિરના કપાટ ખુલતાની સાથે જ સમગ્ર પરિસર ‘જય માતાજી’ના નાદ અને ભક્તિમય ઘોષથી ગુંજી ઊઠ્યું હતું.
નવરાત્રી દરમિયાન ઘરમાં માતાજીની આરાધના અને ઘટ સ્થાપન કરવાનો વિશેષ મહિમા છે. આ માટે નવરાત્રી પૂર્વે જ પાવાગઢ સ્થિત માઁ મહાકાળીના ધામમાંથી પવિત્ર અખંડ જ્યોત પોતાના ઘરે લઈ જવાની વર્ષો જૂની ધાર્મિક પરંપરા છે. આ પ્રાચીન સંસ્કૃતિ અને શ્રદ્ધાને નિભાવવા માટે જ દૂર-દૂરના વિસ્તારોમાંથી ભક્તો મોટી સંખ્યામાં શ્રદ્ધાપૂર્વક પાવાગઢ આવી રહ્યા છે.
શ્રદ્ધાળુઓ મહાકાળી માતાજીના શીશ નમાવી આશીર્વાદ મેળવ્યા બાદ પરંપરાગત રીતે જ્યોત પ્રાપ્ત કરીને પોતાના નિવાસસ્થાને પ્રસ્થાન કરે છે. સંસ્કૃતિ અને આસ્થાના સંગમસમી આ પરંપરાએ યાત્રાધામ પાવાગઢના ધાર્મિક મહત્વને વધુ ઉજાગર કર્યું છે. નવરાત્રી પૂર્વે જ ઉમટેલા માઈભક્તોના આ ઘોડાપૂરને કારણે સમગ્ર પંચમહાલ વિસ્તારમાં એક અનોખો અને પવિત્ર ભક્તિમય માહોલ સર્જાયો છે.