Nadiad News: ભાદરવી પૂનમનો પાવન અવસર અને ખગ્રાસ ચંદ્રગ્રહણનો અદ્ભુત સંયોગ આવતા 7 સપ્ટેમ્બર રવિવારે સર્જાઈ રહ્યો છે. આ વિશેષ દિવસે ડાકોરના શ્રી રણછોડરાયજી મંદિરમાં અનોખી તૈયારીઓ કરવામાં આવી છે, જેથી શ્રદ્ધાળુઓને સુવ્યવસ્થિત રીતે દર્શનનો લાભ મળી શકે.
રણછોડરાયજી મંદિરમાં દર્શનના સમયમાં ફેરફાર
મંદિર વહેલી સવારે 3 વાગ્યે ખુલશે, જ્યારે મંગળા આરતી 3:15 વાગ્યે યોજાશે. ત્યારબાદ 4:30 વાગ્યા સુધી દર્શન ખુલ્લા રહેશે. શ્રીજીમહારાજના ભોગ માટે થોડો વિરામ આપ્યા બાદ સવારે 5થી 6:30 વાગ્યા સુધી ફરી દર્શનનો અવસર મળશે.
રાજભોગ આરતીને પગલે 6:30થી 7 વાગ્યા સુધી મંદિર બંધ રહેશે, પરંતુ બાદમાં 7 વાગ્યાથી 10 વાગ્યા સુધી શ્રદ્ધાળુઓ ઠાકોરજીના દર્શન કરી શકશે. આ સમયગાળા બાદ ઠાકોરજી પોઢશે અને 10:10 વાગ્યે મંદિર ફરી ખુલશે, જ્યાં ઉત્થાપન આરતી યોજાશે.
દર્શનનો સમય બપોરે 12 વાગ્યા સુધી ચાલુ રહેશે. પછી શયનભોગ અને સખડીભોગ માટે બપોરે 12થી 12:30 સુધી મંદિર બંધ રહેશે. અંતિમ અવસર તરીકે 12:30થી 2 વાગ્યા સુધી દર્શનનો લાભ મળશે. ત્યારબાદ, ચંદ્રગ્રહણને કારણે બપોરે 2 વાગ્યાથી મંદિર સંપૂર્ણપણે બંધ થઈ જશે.
મંદિર ફરી બીજા દિવસે, 8 સપ્ટેમ્બરે સવારે 6:30 વાગ્યે મંગળા આરતી સાથે ખુલશે. આ આયોજનને કારણે ડાકોરમાં શ્રદ્ધાળુઓની ભારે ભીડ ઉમટવાની સંભાવના છે. મંદિર સંચાલન સમિતિએ ભક્તોને અનુરોધ કર્યો છે કે સૂચિત સમય અનુસાર દર્શનનો લાભ લે અને ગ્રહણ દરમિયાન દર્શન માટે આગ્રહ ન કરે.
સાથે જ સુરક્ષા અને સુવિધા માટે વધારાની વ્યવસ્થાઓ પણ ગોઠવાઈ છે. આ દુર્લભ સંયોગને લઈને શ્રદ્ધાળુઓમાં ઉત્સાહનો માહોલ છે. ભાદરવી પૂનમના પાવન પ્રસંગે અને ચંદ્રગ્રહણના આધ્યાત્મિક મહત્વને ધ્યાનમાં રાખીને ડાકોરમાં ધાર્મિક ભાવના સાથે ઉત્સવની છટા જોવા મળશે.