પ્રશાંત ગજ્જર, Bharuch News: ભરૂચ જિલ્લાના અંકલેશ્વર અને હાંસોટ પંથકના ખેડૂતો દ્વારા પાવરગ્રીડ લાઇન માટે થતા જમીન સંપાદનના વિરોધમાં આજે એક વિશાળ ટ્રેક્ટર રેલી યોજવામાં આવી હતી.
આ રેલી દ્વારા ખેડૂતો પોતાની પડતર માંગણીઓ અંગે ભરૂચ કલેક્ટરને રજૂઆત કરવા જઈ રહ્યા હતા, તે દરમિયાન પોલીસે વચ્ચે જ રેલીને અટકાવતા ખેડૂતો અને પોલીસ વચ્ચે ઘર્ષણ સર્જાયું હતું. આ ઘટનાને પગલે ખેડૂતો રસ્તા પર બેસી જતાં વાહનવ્યવહાર ઠપ્પ થઈ ગયો હતો, જેણે સમગ્ર વિસ્તારમાં ભારે વિરોધ અને ઉત્તેજનાનો માહોલ ઊભો કર્યો હતો.
પોલીસ દ્વારા ટ્રેક્ટર રેલી આગળ વધતી રોકવામાં આવતાં રોષે ભરાયેલા ખેડૂતો માર્ગ પર જ ધરણાં પર બેસી ગયા હતા. આ ચક્કાજામના કારણે અંકલેશ્વર-ભરૂચ રોડ પર આશરે 2થી 3 કિલોમીટર સુધી વાહનોની લાંબી કતારો લાગી ગઈ હતી. કલાકો સુધી વાહનવ્યવહાર ખોરવાઈ જતાં સામાન્ય વાહનચાલકો અને મુસાફરોને ભારે હાલાકી ભોગવવાનો વારો આવ્યો હતો.
આ આંદોલન કરી રહેલા ખેડૂતોની મુખ્ય માંગ પાવરગ્રીડ લાઇન માટે સંપાદિત કરવામાં આવતી જમીનનું યોગ્ય અને પૂરતું વળતર મેળવવાની છે. ખેડૂતોનો ગંભીર આક્ષેપ છે કે સરકારે અગાઉ વળતર આપવા અંગે જાહેરાતો કરી હોવા છતાં વાસ્તવમાં તેમની માંગણીઓનું કોઈ સંતોષકારક નિરાકરણ લાવવામાં આવ્યું નથી. જમીન સંપાદનના પ્રશ્ને અન્નદાતાઓમાં વ્યાપેલો આ રોષ હવે ઉગ્ર સ્વરૂપ ધારણ કરી રહ્યો છે.
ખેડૂતોએ વહીવટી તંત્ર સામે સ્પષ્ટ માંગ કરી છે કે, પાવરગ્રીડ લાઇન માટે લેવાતી જમીનનું વ્યાજબી મૂલ્યાંકન કરીને યોગ્ય ન્યાય આપવામાં આવે. તેઓએ ચીમકી પણ ઉચ્ચારી છે કે જો આગામી દિવસોમાં તેમની વળતર બાબતની માંગણીઓનો ઉકેલ નહીં આવે, તો આ વિરોધ પ્રદર્શન અને આંદોલનને વધુ ઉગ્ર બનાવવામાં આવશે. સ્થાનિક તંત્ર દ્વારા આ મામલે યોગ્ય મધ્યસ્થી કરીને ટૂંક સમયમાં કોઈ સકારાત્મક ઉકેલ લાવવામાં આવે તેવી લોકમાં ચર્ચા ચાલી રહી છે.