Gujarat Weather Warning: આજે વહેલી સવારથી ગુજરાતના 209 તાલુકામાં વરસાદી માહોલ જામ્યો છે. જે પૈકી વલસાડ જિલ્લાના કપરાડા તાલુકામાં સૌથી વધુ 182 મિ.મી (7.17 ઈંચ) ધોધમાર વરસાદ વરસ્યો છે. એવામાં હવામાન વિભાગ દ્વારા આગામી 3 કલાકને લઈને ગુજરાતના અલગ-અલગ જિલ્લાઓમાં વરસાદની શક્યતાને જોતા અલગ-અલગ એલર્ટ જારી કરવામાં આવ્યું છે.
હવામાન વિભાગના લેટેસ્ટ બુલેટિનમાં જણાવ્યા મુજબ, આગામી 3 કલાક સુધી એટલે કે રાતના 10 વાગ્યા સુધી ગુજરાતના કચ્છ અને બનાસકાંઠા જિલ્લાના કેટલાક ભાગોમાં ગાજવીજ અને ભારે પવન સાથે ધોધમાર વરસાદ પડી શકે છે. આ 3 કલાક દરમિયાન 41 થી 61 કિમી પ્રતિકલાકની ઝડપે પવન ફૂંકાઈ શકે છે.
આ સિવાય રાજ્યના પાટણ, મહેસાણા, સાબરકાંઠા, અરવલ્લી, મહીસાગર, દાહોદ, પંચમહાલ, ગાંધીનગર, ખેડા, આણંદ, અમદાવાદ, સુરેન્દ્રનગર, મોરબી, જામનગર, દેવભૂમિ દ્વારકા, પોરબંદર, રાજકોટ, જૂનાગઢ અને બોટાદ જેવા જિલ્લાઓમાં ગાજવીજ સાથે હળવા થી મધ્યમ વરસાદી ઝાપટા પડવાની શક્યતાને જોતા હવામાન વિભાગ દ્વારા ઓરેન્જ એલર્ટ જારી કરવામાં આવ્યું છે. આ દરમિયાન પવનની ગતિ 40 કિમી પ્રતિકલાકની રહી શકે છે.
જ્યારે વડોદરા, ભરૂચ, છોટા ઉદેપુર, નર્મદા, તાપી, સુરત, નવસારી, ડાંગ, વલસાડ, ભાવનગર, અમરેલી અને ગીર સોમનાથમાં હળવો વરસાદ પડવાની શક્યતાને જોતા હવામાન વિભાગે યેલો એલર્ટ આપ્યું છે.
છેલ્લા 2 કલાકમાં 111 તાલુકામાં મેઘમહેર
બપોરે 4 થી સાંજે 6 વાગ્યા સુધીના 2 કલાકના સમયગાળા દરમિયાન ગુજરાતના 111 તાલુકામાં નોંધપાત્ર વરસાદ વરસ્યો છે. જે પૈકી સૌથી વધુ 48 મિ.મી (1.8 ઈંચ) વરસાદ અમદાવાદ જિલ્લાના દસ્ક્રોઈ તાલુકામાં નોંધાયો છે. આ સિવાય કચ્છના ભચાઉમાં 36 મિ.મી, વલસાડના ધરમપુરમાં 33 મિ.મી., બનાસકાંઠાના પાલનપુર અને કચ્છના રાપરમાં 24-24 મિ.મી, બનાસકાંઠાના વડગામમાં 20 મિ.મી., દાંતામાં 18 મિ.મી તેમજ સાબરકાંઠાના ઈડરમાં 18 મિ.મી વરસાદ નોંધાયો છે. જ્યારે આજે આખા દિવસ દરમિયાન 50 તાલુકામાં 1 ઈંચથી વધુ, 16 તાલુકામાં 2 ઈંચથી વધુ તેમજ 6 તાલુકામાં 3 ઈંચથી વધુ વરસાદ વરસ્યો છે.