Ahmedabad News: અમદાવાદ મ્યુનિસિપલ કોર્પોરેશન (AMC) સંચાલિત અમદાવાદ મ્યુનિસિપલ ટ્રાન્સપોર્ટ કોર્પોરેશન (AMTS)ની ગંભીર બેદરકારી સામે આવી છે. જેમાં અમદાવાદ શહેરના રોડ પર એક જ નંબરની બે AMTS બસો દોડતી હોવાનું ધ્યાને આવ્યું છે. આ મામલે AMTS દ્વારા કોન્ટ્રાક્ટર સામે કાર્યવાહી કરવામાં આવી છે.
મેઘાણીનગરના રૂટ પર એક જ નંબરની બે ઈ-બસો દોડતી હતી
અમદાવાદના મેઘાણીનગર વિસ્તારમાં એક જ નંબર ધરાવતી બે ઈ-બસો દોડતી જોવા મળી હતી. જે પૈકી એક બસમાં હાઈ સિક્યુરિટી રજિસ્ટ્રેશન પ્લેટ (HSRP) આધારિત નંબર પ્લેટ હતી. જ્યારે બીજી ઈ-બસમાં સાદી નંબર પ્લેટ હતી.
બીજી બસની નંબર પ્લેટ નવી બસમાં લગાવી દેવામાં આવી હતી
આ અંગે AMTSના અધિકારી દ્વારા ભૂલ સ્વીકારવામાં આવી છે. આ સંદર્ભે ઈલેક્ટ્રિક બસના કોન્ટ્રાક્ટર એરો ઈગલ મોબિલિટી પ્રાઈવેટ લિમિટેડને નોટિસ ફટકારવામાં આવી છે.
જ્યારે કોન્ટ્રાક્ટરે લેખિતમાં કરેલા ખુલાસા મુજબ, RTO તરફથી માન્ય નંબર પ્લેટ મળવામાં વાર લાગી રહી હતી. આ સમયે બસમાં ટેમ્પરરી નંબર પ્લેટ લગાવવાની જગ્યાએ બીજી બસની નંબર પ્લેટ નવી બસમાં લગાવી દેવામાં આવી હોવાનું જણાવવામાં આવ્યું છે. હાલ તો આ સમગ્ર મામલે AMTS દ્વારા કોન્ટ્રાક્ટર સામે દંડાત્મક કાર્યવાહી કરવામાં આવી હોવાનું જણાવાઈ રહ્યું છે.