Electricity Bill Saving Tips: આજના સમયમાં મોંઘવારીના યુગમાં વધતું જતું વીજળીનું બિલ દરેક ઘરનું બજેટ ખોરવી નાખે છે. ખાસ કરીને ઈલેક્ટ્રોનિક ઉપકરણોના વધુ પડતા ઉપયોગને કારણે મહિને મોટો ખર્ચ થાય છે. પરંતુ કેટલીક નાની અને સમજુ આદતો કેળવીને તમે તમારા ઘરના લાઈટ બિલમાં નોંધપાત્ર ઘટાડો કરી શકો છો. અહીં આવી જ 5 સરળ અને અત્યંત અસરકારક ટિપ્સ દર્શાવવામાં આવી છે:
1) ACનો સાચો અને સમજદારીપૂર્વક ઉપયોગ કરો
- AC ને હંમેશા 24 થી 26 ડિગ્રી તાપમાનની વચ્ચે જ ચલાવવું જોઈએ.
- જો તમે તાપમાન 1 ડિગ્રી પણ વધારશો, તો લગભગ 6 ટકા જેટલી વીજળી બચે છે.
- AC ની સાથે છતનો પંખો પણ ધીમો ચાલુ રાખવો જોઈએ, જેથી આખો રૂમ જલ્દી ઠંડો થાય અને AC પર વધારે ભાર ન પડે.
- AC નું ફિલ્ટર દર 15 દિવસે કાઢીને સાફ કરવું ખૂબ જરૂરી છે. જો ફિલ્ટર ગંદુ હશે તો તે રૂમને ઠંડો કરવામાં વધારે સમય લેશે અને વીજળી પણ વધારે વપરાશે.
2) 5-સ્ટાર રેટિંગવાળાં જ સાધનો ખરીદો
- જ્યારે પણ તમે ઘરમાં નવું ફ્રિજ, AC કે વોશિંગ મશીન ખરીદવા જાઓ, ત્યારે તેના પર 5-સ્ટાર રેટિંગનું લેબલ ચોક્કસ જુઓ.
- 3-સ્ટાર વાળા સાધનો કરતાં 5-સ્ટાર વાળા સાધનો ઘણી ઓછી વીજળી વાપરે છે.
- આ ઉપરાંત, ઘરમાં પડેલા વર્ષો જૂના સાધનો હવે વધારે વીજળી ખેંચતા હોય છે, તેથી તેમને સમયસર નવા સાધનોથી બદલી નાખવા જોઈએ.
3) LED બલ્બ અને આધુનિક BLDC પંખાનો ઉપયોગ કરો
- જો ઘરમાં હજુ પણ જૂના સાદા બલ્બ કે CFL ટ્યુબલાઈટ વપરાતા હોય, તો તેને બદલીને તરત જ LED બલ્બ લગાવી દો. LED બલ્બ જૂના બલ્બની સરખામણીમાં 80 ટકા જેટલી વીજળી બચાવે છે.
- સાદા પંખાની જગ્યાએ હવે બજારમાં મળતા નવા આધુનિક BLDC ટેકનોલોજી વાળા પંખા લગાવો. આ પંખા સામાન્ય પંખા કરતા 40 થી 50 ટકા જેટલી ઓછી વીજળી ખર્ચે છે.
4) મેઈન સ્વીચ બંધ કરવાની આદત પાડો
- આપણે ઘણીવાર ટીવી, સેટઅપ બોક્સ, વોશિંગ મશીન કે મોબાઈલ ચાર્જરને માત્ર રિમોટથી બંધ કરીને છોડી દઈએ છીએ અને પ્લગની મેઈન સ્વીચ ચાલુ જ રાખીએ છીએ.
- આ રીતે ચાલુ રહેલા પાવરને 'સ્ટેન્ડબાય મોડ' કે 'ફેન્ટમ લોડ' કહેવાય છે.
- જ્યારે સાધનનો ઉપયોગ ન થતો હોય ત્યારે તેનો પ્લગ સ્વીચથી બંધ કરવાની આદત પાડો, કારણ કે માત્ર પ્લગ ભરાવેલો રાખવાથી અને સ્વીચ ચાલુ રાખવાથી પણ આ સાધનો 10 ટકા જેટલી વીજળી વાપરતા રહે છે.
5) ફ્રિજનો ઉપયોગ સ્માર્ટ રીતે કરો
- ફ્રિજને ક્યારેય દીવાલને એકદમ અડાડીને ન રાખવું જોઈએ. દીવાલ અને ફ્રિજની પાછળ ઓછામાં ઓછી 12 ઈંચની જગ્યા ખાલી રાખવી જોઈએ જેથી હવાની અવરજવર બરાબર થઈ શકે.
- ફ્રિજનો દરવાજો વારંવાર ખોલ-બંધ ન કરો અને 30 સેકન્ડથી વધારે સમય માટે ખુલ્લો પણ ન રાખો.
- કોઈપણ ગરમ દૂધ કે જમવાનું સીધું જ ફ્રિજમાં મૂકવાનું ટાળો. તેને પહેલા બહાર સામાન્ય તાપમાને ઠંડુ થવા દો અને ત્યારબાદ જ ફ્રિજમાં મૂકો.