Tikha Shakarpara Recipe: સાંજની ચા સાથે જો તમને કંઈક ચટપટું અને ક્રિસ્પી ખાવાનું મન થાય તો તીખા શક્કરપારા એકદમ પરફેક્ટ નાસ્તો છે. સામાન્ય રીતે શક્કરપારા મીઠા બનાવવામાં આવે છે, પરંતુ તીખા શક્કરપારાનો મસાલેદાર સ્વાદ પણ ખૂબ જ ટેસ્ટી લાગે છે. તેને ઘરે બનાવવું પણ ખૂબ જ સરળ છે. મેંદો, સોજી અને થોડા મસાલાની મદદથી તમે સ્વાદિષ્ટ શક્કરપારા બનાવી શકો છો. તો ચાલો જાણીએ તેની સરળ રેસીપી.
તીખા શક્કરપારા બનાવવા માટેની સામગ્રી
- 2 કપ મેંદો
- 2 ચમચી સોજી
- 2 ચમચી તેલ અથવા ઘી
- 1 ચમચી લાલ મરચું પાવડર
- ½ ચમચી હળદર
- ½ ચમચી અજમો
- ½ ચમચી મરી પાવડર
- ½ ચમચી ધાણાજીરું
- સ્વાદ અનુસાર મીઠું
- જરૂર મુજબ પાણી
- તળવા માટે તેલ
તીખા શક્કરપારા બનાવવાની રીત
સૌથી પહેલા એક મોટા વાસણમાં મેંદો અને સોજી લો. તેમાં લાલ મરચું પાવડર, હળદર, અજમો, મરી પાવડર, ધાણાજીરું અને સ્વાદ અનુસાર મીઠું ઉમેરો. બધી સામગ્રીને સારી રીતે મિક્સ કરી લો. હવે તેમાં 2 ચમચી તેલ અથવા ઘી ઉમેરો. હાથની મદદથી તેલને મેંદામાં સારી રીતે મિક્સ કરો. આ રીતે મોણ બરાબર મિક્સ કરવાથી શક્કરપારા તળ્યા પછી ક્રિસ્પી બનશે. ત્યારબાદ થોડું-થોડું પાણી ઉમેરીને કઠણ લોટ બાંધી લો. લોટ વધારે નરમ ન હોવો જોઈએ. લોટ તૈયાર થઈ જાય પછી તેને ઢાંકીને 10થી 15 મિનિટ માટે રાખી દો.
હવે લોટને ફરી એકવાર હળવા હાથે મસળી લો અને તેના નાના-નાના લૂઆ બનાવી લો. એક લૂઓ લઈને તેને વેલણથી થોડો જાડો વણી લો. ત્યારબાદ છરી અથવા પિઝા કટરની મદદથી તેને નાના ચોરસ અથવા ડાયમંડ આકારમાં કાપી લો.
હવે કડાઈમાં તેલ ગરમ કરવા મૂકો. તેલ ગરમ થઈ જાય ત્યારે તેમાં શક્કરપારાના થોડા ટુકડા નાખો. એકસાથે વધારે ટુકડા ન નાખવા, જેથી તે સરખી રીતે તળાઈ શકે. શક્કરપારાને મધ્યમથી ધીમી આંચ પર તળો. વચ્ચે-વચ્ચે તેને હલાવતા રહો. જ્યારે શક્કરપારા ગોલ્ડન બ્રાઉન અને ક્રિસ્પી થઈ જાય ત્યારે તેને બહાર કાઢીને ટિશ્યૂ પેપર પર મૂકી દો. આ જ રીતે બધા શક્કરપારા તળી લો. તે સંપૂર્ણપણે ઠંડા થઈ જાય પછી એરટાઇટ ડબ્બામાં ભરીને રાખી શકો છો.
શક્કરપારા ક્રિસ્પી બનાવવા માટેની ટિપ્સ
- શક્કરપારા ક્રિસ્પી બનાવવા માટે લોટ કઠણ બાંધવો ખૂબ જરૂરી છે. લોટ નરમ હશે તો શક્કરપારા વધારે તેલ શોષી શકે છે.
- તળતી વખતે ગેસની આંચ ખૂબ વધારે ન રાખો. મધ્યમથી ધીમી આંચ પર તળવાથી શક્કરપારા અંદરથી પણ સારી રીતે ક્રિસ્પી થશે.
- કડાઈમાં એકસાથે વધારે શક્કરપારા નાખવાનું ટાળો. વધારે ટુકડા નાખવાથી તેલનું તાપમાન ઘટી શકે છે અને શક્કરપારા ક્રિસ્પી નહીં બને.
ચા સાથે સર્વ કરો
તીખા શક્કરપારા ગરમાગરમ ચા સાથે સર્વ કરવામાં ખૂબ જ સ્વાદિષ્ટ લાગે છે. સાંજના નાસ્તા ઉપરાંત તમે તેને મહેમાનોને પણ સર્વ કરી શકો છો. જો તમને વધારે ચટપટો સ્વાદ પસંદ હોય તો સર્વ કરતી વખતે તેના પર થોડો ચાટ મસાલો પણ છાંટી શકો છો.