Doodh Pak Recipe for Shradh: પિતૃ પક્ષ દરમિયાન પૂર્વજોની યાદમાં ભોગ તૈયાર કરવાની પરંપરા છે. આ સમયે ઘરમાં સાદગીથી અનેક પરંપરાગત વાનગીઓ બનાવવામાં આવે છે. તેમાં મીઠાઈ તરીકે દૂધપાક પણ બનાવી શકાય છે. દૂધ અને ચોખાથી બનતો આ દૂધપાક સ્વાદમાં રિચ અને બનાવવામાં પણ સરળ છે. જો તમે પિતૃ પક્ષના ભોગ માટે ઘરે કંઈક પરંપરાગત મીઠાઈ બનાવવાનું વિચારી રહ્યા છો, તો આ Doodh Pak Recipe અજમાવી શકો છો.
દૂધપાક બનાવવાની સામગ્રી
- દૂધ – 1 લિટર
- ચોખા – 2 ટેબલસ્પૂન
- ખાંડ – 100થી 120 ગ્રામ
- એલચી પાવડર – ½ ચમચી
- કેસર – થોડા તાંતણા
- બદામ – 8થી 10
- પિસ્તા – 8થી 10
- ચારોળી – 1 ચમચી
- જાયફળ પાવડર – ચપટી
દૂધપાક બનાવવાની રીત
સૌથી પહેલા ચોખાને સારી રીતે ધોઈને 15થી 20 મિનિટ માટે પાણીમાં પલાળી દો. ત્યારબાદ ચોખાને પાણીમાંથી કાઢીને થોડા ક્રશ કરી લો. તેનાથી દૂધપાકમાં ચોખાનો સ્વાદ અને ટેક્સચર સરસ આવશે.
હવે એક જાડા તળિયાવાળા વાસણમાં દૂધ ગરમ કરવા મૂકો. દૂધમાં ઉકળાટ આવે ત્યારબાદ તેમાં તૈયાર કરેલા ચોખા ઉમેરો. ગેસ ધીમો રાખીને સતત વચ્ચે વચ્ચે હલાવતા રહો, જેથી દૂધ નીચે ચોંટે નહીં.
ચોખા સારી રીતે બફાઈ જાય અને દૂધ થોડું ઘટ્ટ થવા લાગે ત્યારે તેમાં ખાંડ ઉમેરો. ત્યારબાદ કેસર અને એલચી પાવડર નાખીને ફરીથી થોડીવાર ધીમા ગેસ પર પકાવો.
હવે તેમાં સમારેલા બદામ, પિસ્તા, ચારોળી અને ચપટી જાયફળ પાવડર ઉમેરો. દૂધપાક મનગમતી ઘટ્ટતા સુધી આવી જાય એટલે ગેસ બંધ કરી દો. તેને ગરમ અથવા ઠંડો કરીને પીરસી શકાય છે.
ટિપ્સ
દૂધપાક બનાવતી વખતે ગેસ ધીમો રાખવો અને દૂધને વચ્ચે વચ્ચે હલાવતા રહેવું જરૂરી છે. વધુ રિચ સ્વાદ માટે ફુલ-ફેટ દૂધનો ઉપયોગ કરી શકાય.