Fada Lapsi Recipe: નવરાત્રી દરમિયાન માતાજીની પૂજા અને આરતીની સાથે પ્રસાદનું પણ વિશેષ મહત્ત્વ હોય છે. આ પ્રસંગે ઘરે કંઈક પરંપરાગત અને મીઠું બનાવવાનું વિચારી રહ્યા હોવ તો ગુજરાતી ફાડા લાપસી એક સારો વિકલ્પ છે. ઘી, ગોળ અને ઘઉંના ફાડામાંથી બનતી આ વાનગી સ્વાદિષ્ટ હોવાની સાથે તહેવારની ખુશી પણ વધારે છે. ખાસ વાત એ છે કે તેને કુકરમાં સરળતાથી બનાવી શકાય છે, જેથી લાંબા સમય સુધી ગેસ પર ઊભા રહેવાની જરૂર પડતી નથી.
ફાડા લાપસી બનાવવા માટેની સામગ્રી
- ઘઉંના ફાડા – 1 કપ
- ઘી – 4થી 5 ચમચી
- ગોળ – ¾ કપ (મીઠાશ પ્રમાણે)
- પાણી – 2થી 2½ કપ
- એલચી પાઉડર – ¼ ચમચી
- સમારેલા બદામ – 1 ચમચી
- સમારેલા કાજુ – 1 ચમચી
- કિસમિસ – 1 ચમચી
કુકરમાં ફાડા લાપસી બનાવવાની રીત
સૌથી પહેલાં એક કુકરમાં ઘી ગરમ કરો. તેમાં ઘઉંના ફાડા ઉમેરીને ધીમા મધ્યમ તાપે શેકો. ફાડા શેકતી વખતે સતત હલાવતા રહો, જેથી તે કુકરના તળિયે ચોંટી ન જાય. ફાડામાંથી સરસ સુગંધ આવવા લાગે અને તેનો રંગ થોડો બદલાય એટલે સમજી જવું કે તે બરાબર શેકાઈ ગયા છે.
હવે તેમાં પાણી ઉમેરીને બરાબર હલાવો. કુકરનું ઢાંકણ બંધ કરીને મધ્યમ તાપે આશરે 3થી 4 સીટી થાય ત્યાં સુધી પકાવો. ફાડા બરાબર બફાઈ જાય પછી ગેસ બંધ કરો અને કુકરનું પ્રેશર પોતાની મેળે નીકળી જાય ત્યાં સુધી રાહ જુઓ. ફાડા નરમ થયા છે કે નહીં તે ચકાસી લો. જરૂર જણાય તો થોડું વધુ પાણી ઉમેરીને પકાવી શકો છો.
બીજી તરફ, ગોળને થોડા ગરમ પાણીમાં ઓગાળી લો અને ગાળી લો, જેથી તેમાં રહેલી અશુદ્ધિઓ દૂર થઈ જાય. હવે કુકર ખોલીને બફાયેલા ફાડામાં ગોળનું પાણી ઉમેરો. તેમાં એલચી પાઉડર, કાજુ, બદામ અને કિસમિસ નાખીને બરાબર મિક્સ કરો. ધીમા તાપે થોડી મિનિટ સુધી હલાવતા રહો, જેથી ગોળની મીઠાશ ફાડામાં સારી રીતે ભળી જાય અને લાપસી ઘટ્ટ થવા લાગે.
છેલ્લે તેમાં એક ચમચી ઘી ઉમેરીને બરાબર મિક્સ કરો. તૈયાર છે માતાજીના પ્રસાદ માટે સ્વાદિષ્ટ અને સુગંધિત ફાડા લાપસી. તેને ગરમાગરમ અથવા હૂંફાળી માતાજીને ધરાવી શકાય છે.