Mumbai Vada Pav Recipe: મુંબઈનું નામ આવે અને ત્યાંના ફેમસ વડા પાવની વાત ન થાય એવું કેવી રીતે બને! બટાકાના મસાલેદાર વડા, લસણ અને લાલ મરચાંની તીખી ચટણી તથા નરમ પાવનો સ્વાદ દરેકને પસંદ આવે છે. સાંજના નાસ્તામાં કંઈક ચટપટું ખાવાનું મન થાય ત્યારે તમે ઘરે પણ મુંબઈ સ્ટાઇલ વડા પાવ બનાવી શકો છો. તેને બનાવવામાં ખાસ મુશ્કેલી પડતી નથી. તો ચાલો, જાણીએ બટાકાના વડાથી લઈને તીખી ચટણી અને બેસનના ખીરા સુધીની સંપૂર્ણ રેસીપી.
મુંબઈના ફેમસ વડા પાવ બનાવવાની સામગ્રી
બટાકાનું મિશ્રણ બનાવવા માટે
- 2 ટેબલસ્પૂન તેલ
- ¼ ટીસ્પૂન હિંગ
- 1 ટીસ્પૂન રાઈ
- 2 ટીસ્પૂન વરિયાળી
- 1 ઝીણી સમારેલી ડુંગળી
- 2 ટીસ્પૂન લીલા મરચાં-આદુની પેસ્ટ
- 2 બાફેલા અને મેશ કરેલા બટાકા
- 1 ટીસ્પૂન હળદર પાવડર
- 1 ટીસ્પૂન મીઠું
- 2 ટીસ્પૂન લાલ મરચું પાવડર
- 2 ટીસ્પૂન ઝીણી સમારેલી કોથમીર
- 2 ટીસ્પૂન લીંબુનો રસ
તીખી લસણની ચટણી બનાવવા માટે
- લસણની 9 કળી
- 5 આખાં લાલ મરચાં
- 2 ટીસ્પૂન સફેદ તલ
- 1 કપ છીણેલું નારિયેળ
- 1 ટીસ્પૂન મીઠું
- ½ ટીસ્પૂન લાલ મરચું પાવડર
- ½ ટીસ્પૂન આમલી
બેસનનો ખીરું બનાવવા માટે
- 1 કપ બેસન
- ¼ કપ સોડા વોટર
- 1 ટીસ્પૂન મીઠું
- 1 ટીસ્પૂન લાલ મરચું પાવડર
- 4 લીલાં મરચાં
વડા પાવ બનાવવા માટે
- જરૂર મુજબ પાવ
- વડા તળવા માટે તેલ
મુંબઈના ફેમસ વડા પાવ બનાવવાની રીત
બટાકાનો મસાલો તૈયાર કરો
સૌપ્રથમ એક કડાઈમાં તેલ ગરમ કરો. તેમાં હિંગ, રાઈ અને વરિયાળી નાખીને બરાબર વઘારો. ત્યારબાદ ઝીણી સમારેલી ડુંગળી અને લીલા મરચાં-આદુની પેસ્ટ ઉમેરીને થોડીવાર સાંતળો. હવે તેમાં બાફેલા અને મેશ કરેલા બટાકા, હળદર, મીઠું અને લાલ મરચું પાવડર ઉમેરો. બધી સામગ્રીને સારી રીતે મિક્સ કરો. ત્યારબાદ તેમાં કોથમીર અને લીંબુનો રસ નાખીને મિશ્રણને બરાબર હલાવો. ગેસ બંધ કરીને મસાલાને ઠંડો થવા દો. હવે આ મિશ્રણમાંથી મધ્યમ કદના ગોળ વડા બનાવી લો.
તીખી લસણની ચટણી બનાવો
ચટણી બનાવવા માટે લસણ, આખાં લાલ મરચાં, સફેદ તલ, છીણેલું નારિયેળ, મીઠું, લાલ મરચું પાવડર અને આમલીને મિક્સરમાં લો. જરૂર મુજબ થોડું પાણી ઉમેરીને પીસી લો. મુંબઈ સ્ટાઇલ વડા પાવમાં તીખી લસણની ચટણી સ્વાદમાં ખાસ વધારો કરે છે.
બેસનનું ખીરું તૈયાર કરો
એક વાસણમાં બેસન, મીઠું અને લાલ મરચું પાવડર લો. તેમાં થોડું-થોડું સોડા વોટર ઉમેરીને ગાંઠો ન રહે એ રીતે ખીરું તૈયાર કરો. ખીરું બહુ પાતળું કે બહુ ઘટ્ટ ન હોવું જોઈએ. લીલાં મરચાંને વચ્ચે ચીરો પાડી આ જ ખીરામાં બોળી શકો છો અને વડા સાથે તળી શકો છો.
બટાકાના વડા તળો
કડાઈમાં તેલ ગરમ કરવા મૂકો. હવે તૈયાર કરેલા બટાકાના ગોળાને બેસનના ખીરામાં બોળીને ગરમ તેલમાં ધીમે-મધ્યમ તાપે તળો. વડાને વચ્ચે-વચ્ચે ફેરવતા રહો, જેથી તે બધી બાજુથી સોનેરી અને ક્રિસ્પી બને. વડા બરાબર તળાઈ જાય એટલે તેને બહાર કાઢીને વધારાનું તેલ નિતરવા દો.
મુંબઈ સ્ટાઇલ વડા પાવ તૈયાર કરો
હવે પાવને વચ્ચેથી કાપો. તેની અંદરની બંને બાજુ તીખી લસણની ચટણી લગાવો. વચ્ચે ગરમાગરમ બટાકાનો વડો મૂકો. ઇચ્છા હોય તો સાથે તળેલું લીલું મરચું પણ પીરસો. તૈયાર છે મુંબઈનો ફેમસ વડા પાવ, જેનો સ્વાદ તમે ઘરે જ માણી શકો છો.
ટિપ્સ
વડા વધુ સ્વાદિષ્ટ બનાવવા માટે બટાકાના મિશ્રણને વડા બનાવતાં પહેલાં ઠંડું થવા દો. બેસનના ખીરામાં ગાંઠો ન રહે તેનું ધ્યાન રાખો અને વડાને મધ્યમ તાપે તળો, જેથી તે અંદરથી બરાબર પાકે અને બહારથી ક્રિસ્પી બને.