Besan Ladoo Recipe: ગણેશ ચતુર્થીના પાવન અવસરે ભગવાન ગણેશને વિવિધ મીઠાઈઓનો ભોગ ચઢાવવામાં આવે છે. તેમાં બેસનના લાડુ સૌથી લોકપ્રિય અને સ્વાદિષ્ટ પ્રસાદ માનવામાં આવે છે. દાણાદાર ટેક્સ્ચર અને ઘીથી ભરપૂર સુગંધવાળા બેસનના લાડુ માત્ર ભોગ માટે જ નહીં પરંતુ આખા પરિવાર માટે પણ ખાસ મીઠાઈ બની શકે છે. જો તમે ઘરે બજાર જેવા પરફેક્ટ બેસનના લાડુ બનાવવા માંગતા હોવ તો આ સરળ રેસીપી જરૂર અજમાવો.
બેસનના લાડુ બનાવવા માટેની સામગ્રી
- 2 કપ જાડું બેસન
- 1 કપ દેશી ઘી
- 1 કપ પીસેલી ખાંડ
- 2 ચમચી રવો
- 1/2 ચમચી એલચી પાઉડર
- 10-12 બદામ સમારેલા
- 10-12 કાજુ સમારેલા
- 1 ચમચી પિસ્તા સમારેલા
દાણાદાર બેસનના લાડુ બનાવવાની રીત
સૌપ્રથમ એક ભારે તળિયાવાળી કડાઈમાં ઘી ગરમ કરો. હવે તેમાં બેસન અને રવો ઉમેરો. ધીમી આંચ પર સતત હલાવતા રહો જેથી બેસન સરખી રીતે શેકાય. લગભગ 15થી 20 મિનિટ સુધી બેસનને શેકો. બેસનનો રંગ હળવો ગોલ્ડન થઈ જાય અને તેમાંમાંથી સરસ સુગંધ આવવા લાગે ત્યારે ગેસ બંધ કરી દો.
હવે આ મિશ્રણને સંપૂર્ણપણે ઠંડું થવા દો. મિશ્રણ ઠંડું થઈ જાય પછી તેમાં પીસેલી ખાંડ, એલચી પાઉડર અને સમારેલા ડ્રાયફ્રૂટ્સ ઉમેરો. બધી સામગ્રીને સારી રીતે મિક્સ કરો. હવે હાથમાં થોડું મિશ્રણ લઈને ગોળ આકારના લાડુ વાળો. જો મિશ્રણ સૂકું લાગે તો તેમાં થોડું ઓગાળેલું ઘી ઉમેરી શકો છો.
તૈયાર લાડુ પર પિસ્તાની સજાવટ કરો અને ભગવાન ગણેશને ભોગ તરીકે અર્પણ કરો.
પરફેક્ટ બેસનના લાડુ માટે ખાસ ટીપ્સ
- દાણાદાર ટેક્સ્ચર માટે જાડું બેસન અને થોડો રવો જરૂર ઉમેરો.
- બેસનને હંમેશા ધીમી આંચ પર જ શેકવું.
- ખાંડ હંમેશા મિશ્રણ ઠંડું થયા પછી જ ઉમેરવી.
- વધુ સ્વાદ માટે દેશી ઘીનો ઉપયોગ કરો.
- લાડુને એરટાઇટ ડબ્બામાં રાખવાથી તે ઘણા દિવસો સુધી તાજા રહે છે.
ઘરે બનાવેલા દાણાદાર બેસનના લાડુ ગણેશ ચતુર્થીના પ્રસાદ માટે એક ઉત્તમ વિકલ્પ છે. આ સરળ રેસીપીથી તમે ઓછા સમયમાં સ્વાદિષ્ટ અને સુગંધિત લાડુ તૈયાર કરી શકો છો. આ વર્ષે ગણપતિ બાપ્પાના ભોગમાં આ ખાસ મીઠાઈ જરૂર સામેલ કરો.