Palak Pakoda Recipe: વરસાદી કે ઠંડા વાતાવરણમાં ગરમાગરમ પકોડા ખાવાની મજા જ અલગ હોય છે. જો તમે સામાન્ય પકોડાથી કંઈક અલગ બનાવવા માંગતા હોવ તો પાલક પકોડા એક સારો વિકલ્પ છે. પાલક, બેસન અને થોડા મસાલાથી સરળતાથી બનતા આ પકોડા બહારથી એકદમ ક્રિસ્પી અને અંદરથી નરમ બને છે. તેને ચા, લીલી ચટણી અથવા ટમેટાની ચટણી સાથે સર્વ કરી શકાય છે.
પાલક પકોડા બનાવવાની સામગ્રી
- પાલક – 2 કપ બારીક સમારેલો
- બેસન – 1 કપ
- ચોખાનો લોટ – 2 ચમચી
- લીલા મરચાં – 2 બારીક સમારેલા
- આદુ – 1 ચમચી છીણેલું
- લાલ મરચું પાઉડર – ½ ચમચી
- હળદર – ¼ ચમચી
- અજમો – ½ ચમચી
- ચાટ મસાલો – ½ ચમચી
- મીઠું – સ્વાદ મુજબ
- પાણી – જરૂર મુજબ
- તેલ – તળવા માટે
પાલક પકોડા બનાવવાની રીત
સૌ પ્રથમ પાલકને સારી રીતે ધોઈને તેનું પાણી નિતારી લો અને તેને બારીક સમારી લો. હવે એક વાસણમાં પાલક, બેસન, ચોખાનો લોટ, લીલા મરચાં, આદુ, લાલ મરચું, હળદર, અજમો, ચાટ મસાલો અને મીઠું નાખીને બરાબર મિક્સ કરો.
આ મિશ્રણમાં થોડું-થોડું પાણી ઉમેરીને ઘટ્ટ ખીરું તૈયાર કરો. ખીરું વધારે પાતળું ન રાખવું, નહીં તો પકોડા તેલમાં ફેલાઈ શકે છે. બીજી તરફ કડાઈમાં તેલ ગરમ કરવા મૂકો.
તેલ ગરમ થાય ત્યારે હાથ અથવા ચમચાની મદદથી નાના-નાના પકોડા તેલમાં નાખો. પકોડાને મધ્યમ આંચ પર ફેરવતા રહીને ગોલ્ડન બ્રાઉન અને ક્રિસ્પી થાય ત્યાં સુધી તળો. તૈયાર પાલક પકોડાને ટિશ્યૂ પેપર પર કાઢી લો અને ગરમાગરમ લીલી ચટણી અથવા ચા સાથે સર્વ કરો.
પાલક પકોડા ક્રિસ્પી બનાવવાની ટિપ્સ
પકોડાને વધુ ક્રિસ્પી બનાવવા માટે ખીરામાં થોડો ચોખાનો લોટ ઉમેરવો. પાલકમાં પહેલેથી પાણી હોય છે, તેથી ખીરું બનાવતી વખતે પાણી બહુ ઓછું ઉમેરવું. પકોડા હંમેશા મધ્યમ આંચ પર તળવાથી તે અંદરથી પણ સારી રીતે પાકે છે અને બહારથી કરકરા રહે છે.