Air Fryer French Fries Recipe: ફ્રેન્ચ ફ્રાઇઝનું નામ સાંભળતા જ બાળકો હોય કે મોટા, સૌના મોઢામાં પાણી આવી જાય છે. સામાન્ય રીતે ફ્રાઇઝને વધારે તેલમાં તળવામાં આવે છે, પરંતુ જો તમારી પાસે એર ફ્રાયર હોય તો તમે ઘરે પણ ઓછા તેલમાં સ્વાદિષ્ટ અને ક્રિસ્પી ફ્રેન્ચ ફ્રાઇઝ બનાવી શકો છો. ખાસ વાત એ છે કે તેને બનાવવાની રીત પણ એકદમ સરળ છે.
ફ્રેન્ચ ફ્રાઇઝ બનાવવાની સામગ્રી
- બટાકા – 4 મોટા
- તેલ – 2 ચમચી
- મીઠું – સ્વાદ અનુસાર
- લાલ મરચું પાઉડર – ½ ચમચી
- ચાટ મસાલો – ½ ચમચી
- કાળા મરીનો પાઉડર – સ્વાદ અનુસાર
ફ્રેન્ચ ફ્રાઇઝ બનાવવાની રીત
સૌથી પહેલા બટાકાને છોલીને સારી રીતે ધોઈ લો. હવે બટાકાને લાંબા અને પાતળા ટુકડામાં કાપો. કોશિશ કરો કે તમામ ટુકડા લગભગ સરખા કદના હોય, જેથી એર ફ્રાયરમાં તે સરખી રીતે પાકી શકે.
કાપેલા બટાકાને ઠંડા પાણીમાં લગભગ 20થી 30 મિનિટ માટે પલાળી રાખો. આ દરમિયાન બટાકામાં રહેલો વધારાનો સ્ટાર્ચ બહાર નીકળે છે, જેના કારણે ફ્રાઇઝ વધુ ક્રિસ્પી બનવામાં મદદ મળે છે.
હવે બટાકાને પાણીમાંથી કાઢીને સ્વચ્છ કોટનના કપડા અથવા કિચન ટુવાલથી એકદમ સારી રીતે લૂછીને સૂકવી લો. બટાકામાં પાણી રહી જશે તો ફ્રાઇઝ ઇચ્છિત રીતે ક્રિસ્પી નહીં બને, તેથી આ સ્ટેપ ખાસ ધ્યાનથી કરવો.
સૂકવેલા બટાકાને એક બાઉલમાં લો. તેમાં 2 ચમચી તેલ, મીઠું, લાલ મરચું પાઉડર અને કાળા મરીનો પાઉડર ઉમેરીને બધું સારી રીતે મિક્સ કરી લો.
હવે એર ફ્રાયરને 180થી 200 ડિગ્રી સેલ્સિયસ પર પ્રીહીટ કરો. ત્યારબાદ બટાકાની સ્ટિક્સને બાસ્કેટમાં એકસરખા પ્રમાણમાં ફેલાવો. બાસ્કેટને ખૂબ વધારે ભરશો નહીં. જરૂર લાગે તો ફ્રાઇઝને બે બેચમાં બનાવો.
ફ્રાઇઝને લગભગ 15થી 20 મિનિટ સુધી એર ફ્રાય કરો. વચ્ચે એકથી બે વખત બાસ્કેટ બહાર કાઢીને હળવેથી શેક કરો, જેથી તમામ બાજુથી ફ્રાઇઝ સરખી રીતે ક્રિસ્પી થાય.
જ્યારે ફ્રાઇઝનો રંગ હળવો ગોલ્ડન થઈ જાય અને તે બહારથી ક્રિસ્પી દેખાય ત્યારે તેને બહાર કાઢી લો. ઉપરથી ચાટ મસાલો છાંટીને ગરમાગરમ સર્વ કરો.
ટિપ્સ
ફ્રાઇઝને વધુ ક્રિસ્પી બનાવવા માટે બટાકાને પાણીમાં પલાળ્યા બાદ સારી રીતે સૂકવવા ખૂબ જરૂરી છે. સાથે જ એર ફ્રાયર બાસ્કેટમાં બટાકાને એકસાથે વધારે ન ભરવાથી ફ્રાઇઝ વધુ સારી રીતે ક્રિસ્પી થાય છે. એર ફ્રાયરના મોડલ અને બટાકાના ટુકડાના કદ પ્રમાણે સમય થોડો ઓછો-વધુ થઈ શકે છે.