Gujarati Patra Recipe: ગુજરાતી નાસ્તાની વાત આવે ત્યારે પાત્રાનું નામ ચોક્કસ આવે છે. અળવીના પાનમાં બેસનનું મસાલેદાર ખીરું લગાવીને બનાવવામાં આવતા પાત્રા સ્વાદમાં ખાટો-મીઠો અને ચટપટો હોય છે. જો તમને ઘરે પાત્રા બનાવવામાં વધુ સમય લાગતો હોય, તો આ ઇન્સ્ટન્ટ રીતથી સરળતાથી સ્વાદિષ્ટ પાત્રા બનાવી શકાય છે.
પાત્રા બનાવવાની સામગ્રી
આ પણ વાંચો
- અળવીના તાજા પાન – 8 થી 10
- બેસન – 1 કપ
- આદુ-મરચાંની પેસ્ટ – 1 ચમચી
- હળદર – ¼ ચમચી
- લાલ મરચું – ½ ચમચી
- ધાણાજીરું – 1 ચમચી
- તલ – 1 ચમચી
- ખાંડ – 1 ચમચી
- આંબલીની પેસ્ટ – 1 ચમચી
- મીઠું – સ્વાદ મુજબ
- પાણી – જરૂર મુજબ
- તેલ – જરૂર મુજબ
વઘાર માટે
- તેલ – 1 ચમચી
- રાઈ – ½ ચમચી
- તલ – 1 ચમચી
- હીંગ – ચપટી
- લીલા મરચાં – 2 સમારેલા
- કોથમીર – સજાવટ માટે
પાત્રા બનાવવાની રીત
સૌથી પહેલાં અળવીના પાનને સારી રીતે ધોઈને સાફ કરી લો અને તેના જાડા ડાંઠા થોડા કાપી લો. હવે એક વાસણમાં બેસન, આદુ-મરચાંની પેસ્ટ, હળદર, લાલ મરચું, ધાણાજીરું, તલ, ખાંડ, આંબલીની પેસ્ટ અને મીઠું ઉમેરો.
તેમાં થોડું-થોડું પાણી નાખીને ગઠ્ઠા વગરનું ઘટ્ટ ખીરું તૈયાર કરો. ખીરું ન તો ખૂબ પાતળું હોવું જોઈએ કે ન તો વધારે ઘટ્ટ. હવે એક પાનની પાછળની બાજુ ખીરાનું પાતળું સ્તર લગાવો અને તેના ઉપર બીજું પાન મૂકી ફરી ખીરું લગાવો. આ રીતે બધા પાન તૈયાર કરી લો.
હવે પાનને કાળજીપૂર્વક વાળી રોલ બનાવી લો. તૈયાર રોલને સ્ટીમરમાં મૂકી મધ્યમ તાપે આશરે 20થી 25 મિનિટ સુધી બાફો. રોલ ઠંડો થાય પછી તેને નાના ટુકડામાં કાપી લો.
કડાઈમાં તેલ ગરમ કરીને રાઈ, તલ, હીંગ અને લીલા મરચાંનો વઘાર કરો. તેમાં કાપેલા પાત્રા નાખીને હળવા હાથે મિક્સ કરો. ઉપરથી કોથમીર નાખીને ગરમાગરમ સર્વ કરો. ઇચ્છો તો ઉપર થોડું છીણેલું નાળિયેર પણ ઉમેરી શકો છો.
ટિપ્સ: પાત્રા નરમ અને સ્વાદિષ્ટ બનાવવા માટે અળવીના કોમળ પાન લો અને બેસનનું ખીરું સરખી જાડાઈનું લગાવો. વધુ ખીરું લગાવવાથી પાત્રા અંદરથી કાચા રહી શકે છે.