Farali Aloo Bhajiya: ગુરુ પૂર્ણિમા વ્રત માટે બનાવો ક્રિસ્પી ફરાળી આલુ ભજીયા, જાણો સ્ટેપ બાય સ્ટેપ રેસીપી

Farali Aloo Bhajiya Recipe: ગુરુ પૂર્ણિમાના પાવન અવસર પર ઘણા લોકો વ્રત કે ઉપવાસ કરતા હોય છે. ઉપવાસ દરમિયાન જ્યારે કંઈક ગરમાગરમ, ક્રિસ્પી અને ચટપટું ખાવાનું મન થાય, ત્યારે આ ફરાળી બટાકાના ભજીયા અને લીલી ચટણી એક ઉત્તમ વિકલ્પ છે.

રાજગરાના લોટ અને ચટપટા મસાલાઓમાંથી બનતા આ ભજીયા બહારથી એકદમ કરકરા અને અંદરથી નરમ હોય છે. તેની સાથે પીરસાતી ફુદીના અને ધાણાની ફરાળી ચટણી ભજીયાના સ્વાદને બમણો કરી દે છે. આ વાનગી બનાવવામાં ખૂબ જ સરળ છે અને તે તમને વ્રતમાં પણ સ્વાદ સાથે પૂરો સંતોષ આપશે. તો ચાલો, જાણીએ આ સ્વાદિષ્ટ ફરાળી ભજીયા અને ચટણી બનાવવાની સરળ રીત.

ફરાળી ચટણી રેસીપી (Farali Chutney Recipe) 

સામગ્રી:

• તાજા લીલા ધાણા - ૧ કપ
• તાજા ફુદીનાના પાન - ૧/૪ કપ
• અનારદાના (દાડમના દાણાનો) પાવડર - ૧ નાની ચમચી
• લીલું મરચું - ૧ નંગ (ઝીણું સમારેલું)
• સંચળ - ૧ નાની ચમચી

ફરાળી ચટણી બનાવવાની રીત 

1. એક મિક્સર જારમાં તાજા લીલા ધાણા, ફુદીનાના પાન, અનારદાના પાવડર, લીલું મરચું અને સંચળ ઉમેરો. તેને સારી રીતે પીસીને ચટણી તૈયાર કરો.
2. ટણીને યોગ્ય પ્રમાણમાં જાડી કે પાતળી કરવા માટે જરૂર મુજબ પાણી ઉમેરો.

ફરાળી બટાકા ના ભજીયા રેસીપી (Farali Aloo Bhajiya Recipe) 

સામગ્રી:

• કાચા બટાકા - ૫ થી ૬ નંગ
• લીલા મરચાં - ૧ થી ૨ નંગ (ઝીણા સમારેલા)
• અજમો - ૧ નાની ચમચી
• અનારદાના પાવડર - ૧ નાની ચમચી
• કાળા મરીનો પાવડર - એક ચપટી
• શેકેલા જીરુંનો પાવડર - ૧ નાની ચમચી
• સિંધવ મીઠું - સ્વાદ મુજબ
• રાજગરાનો લોટ - ૧ કપ
• અજમો (ખીરા માટે) - ૧ નાની ચમચી
• સંચળ - સ્વાદ મુજબ
• પાણી - જરૂર મુજબ
• તેલ - તળવા માટે

ફરાળી બટાકા ના ભજીયા બનાવવાની રીત 

1. બટાકાની છાલ કાઢી લો અને તેને ગોળ અને પાતળી સ્લાઈસમાં કાપી લો.
2. એક મોટા વાસણમાં બટાકાની સ્લાઈસ, સમારેલા લીલા મરચાં, ૧ ચમચી અજમો, અનારદાના પાવડર, કાળા મરીનો પાવડર, જીરું પાવડર અને સ્વાદ મુજબ સિંધવ મીઠું ઉમેરીને બરાબર મિક્સ કરો.
3. બીજા એક વાસણમાં રાજગરાનો લોટ લો, તેમાં બાકી બચેલો અજમો અને થોડું સિંધવ મીઠું નાખો. હવે તેમાં જરૂર મુજબ પાણી ઉમેરીને ભજિયા માટેનું ખીરું (બેટર) તૈયાર કરો. આ ખીરાને ૧૫ મિનિટ માટે ઢાંકીને રહેવા દો.
4. એક કડાઈમાં તેલ ગરમ કરો. મસાલાવાળી બટાકાની સ્લાઈસને રાજગરાના ખીરામાં બોળીને મધ્યમ તાપ પર ગોલ્ડન બ્રાઉન અને ક્રિસ્પી (કરકરા) થાય ત્યાં સુધી તળી લો.
5. આ ગરમાગરમ ફરાળી ક્રિસ્પી ભજિયાને તાજી બનાવેલી ફરાળી ચટણી સાથે સર્વ કરો અને માણો!