Moong Dal Halwa Recipe: ગણેશ ચતુર્થીના પાવન પર્વ પર ગણપતિ બાપ્પાને અલગ-અલગ મીઠાઈઓનો ભોગ ધરાવવામાં આવે છે. જો આ વખતે ઘરે જ કંઈક ખાસ અને સ્વાદિષ્ટ બનાવવાનું વિચારી રહ્યા છો, તો મગની દાળનો હલવો બેસ્ટ વિકલ્પ છે. ઘી, દૂધ, ખાંડ અને ડ્રાયફ્રૂટ્સથી તૈયાર થતો આ હલવો સ્વાદમાં એકદમ રિચ લાગે છે. યોગ્ય રીતે મગની દાળ શેકવામાં આવે તો ઘરે બનાવેલો હલવો પણ બજાર જેવો સ્વાદિષ્ટ બની શકે છે.
મગની દાળનો હલવો બનાવવાની સામગ્રી
આ પણ વાંચો
- મગની દાળ – 1 કપ
- ઘી – ½ કપ
- દૂધ – 2 કપ
- ખાંડ – ¾ કપ
- પાણી – 1 કપ
- માવો – ½ કપ
- એલચી પાવડર – ½ ચમચી
- કાજુ – 2 ચમચી
- બદામ – 2 ચમચી
- પિસ્તા – 1 ચમચી
- કેસર – થોડા તાંતણા
મગની દાળનો હલવો બનાવવાની રીત
સૌ પ્રથમ મગની દાળને સારી રીતે ધોઈને થોડા કલાક માટે પાણીમાં પલાળી રાખો. ત્યારબાદ તેનું વધારાનું પાણી કાઢી દાળને મિક્સરમાં થોડું કરકરું પીસી લો. દાળને એકદમ સ્મૂધ પેસ્ટ ન બનાવવી, કારણ કે હલવામાં તેનો ટેક્સચર સારું રહે તે માટે દાળ થોડી દાણેદાર હોવી જરૂરી છે.
હવે એક જાડા તળિયાવાળી કડાઈમાં ઘી ગરમ કરો અને તેમાં પીસેલી મગની દાળ ઉમેરો. દાળને ધીમીથી મધ્યમ આંચ પર સતત હલાવતા શેકો. આ સ્ટેપ સૌથી મહત્વનો છે, કારણ કે દાળ સારી રીતે શેકાશે તો હલવામાં કાચી દાળની ગંધ નહીં આવે અને સ્વાદ પણ સરસ આવશે.
જ્યારે દાળનો રંગ થોડો બદલાઈ જાય અને ઘી અલગ થવા લાગે ત્યારે તેમાં ગરમ દૂધ અને પાણી ધીમે-ધીમે ઉમેરો. આ દરમિયાન સતત હલાવતા રહો જેથી ગઠ્ઠા ન પડે. દાળ નરમ થઈ જાય અને મિશ્રણ ઘટ્ટ થવા લાગે ત્યાં સુધી તેને પકાવો.
હવે તેમાં ખાંડ અને માવો ઉમેરો અને ફરીથી સારી રીતે મિક્સ કરો. ખાંડ ઓગળ્યા પછી હલવો થોડો ઢીલો થશે, પરંતુ તેને ધીમી આંચ પર હલાવતા રહેવાથી ફરી ઘટ્ટ થવા લાગશે. જ્યારે હલવો કડાઈ છોડવા લાગે ત્યારે તેમાં એલચી પાવડર અને કેસર ઉમેરો.
છેલ્લે તેમાં સમારેલા કાજુ, બદામ અને પિસ્તા નાખીને મિક્સ કરો. તૈયાર મગની દાળના હલવાને ગરમાગરમ પીરસો અને ઉપરથી થોડા ડ્રાયફ્રૂટ્સથી ગાર્નિશ કરો. ગણેશ ચતુર્થીના ભોગ માટે આ હલવો ખૂબ જ સરસ રહેશે.
ટિપ્સ
મગની દાળને ધીમી આંચ પર સારી રીતે શેકવી એ હલવો સ્વાદિષ્ટ બનાવવાનું સૌથી મહત્વનું રહસ્ય છે. દાળ શેકવામાં ઉતાવળ ન કરવી. માવો ઉમેરવાથી હલવો વધુ રિચ અને બજાર જેવો સ્વાદ આપે છે.