Sugar Free Moong Dal Halwa Recipe | Halwai Style Moong Dal Halwa Recipe: હાલમાં ખાંડના ભાવમાં વધારો જોવા મળી રહ્યો છે, ત્યારે મીઠાઈ બનાવતી વખતે ખાંડનો વિકલ્પ શોધતા હોવ તો આ રેસીપી તમારા માટે છે. આજે આપણે બનાવીશું હલવાઈ સ્ટાઈલ ખાંડ વગરનો મગ દાળનો હલવો, જેમાં ખાંડની જગ્યાએ ગોળનો ઉપયોગ કરવામાં આવશે. આ રીતે બનાવેલો હલવો સ્વાદિષ્ટ, સુગંધિત અને એકદમ મોઢામાં ઓગળી જાય એવો બને છે. ઘરે સરળતાથી આ રેસીપી ટ્રાય કરી શકો છો.
મગ દાળનો હલવો બનાવવા માટેની સામગ્રી
- 1 કપ પીળી મગની દાળ
- ½ કપ ઘી
- ½ કપ ગોળનો પાવડર
- 2 કપ દૂધ
- ½ કપ માવો
- ½ ચમચી એલચી પાવડર
- 1-2 ચમચી સમારેલા કાજુ-બદામ
- 1 ચમચી કિસમિસ
- 2 ચમચી ગરમ પાણી
મગ દાળનો હલવો બનાવવાની રીત
સૌપ્રથમ મગની દાળને સારી રીતે ધોઈને 3થી 4 કલાક માટે પાણીમાં પલાળી રાખો. ત્યારબાદ દાળમાંથી પાણી કાઢીને તેને મિક્સરમાં થોડું દરદરું પીસી લો. દાળને એકદમ સ્મૂથ પેસ્ટ ન બનાવવી.
હવે એક ભારે તળિયાવાળી કડાઈમાં ઘી ગરમ કરો. તેમાં પીસેલી મગની દાળ ઉમેરીને ધીમા તાપે સતત હલાવતા રહો. દાળને સારી રીતે શેકવી ખૂબ જ જરૂરી છે. જ્યાં સુધી દાળમાંથી સરસ સુગંધ આવવા લાગે અને તેનો રંગ થોડો સોનેરી થાય ત્યાં સુધી શેકો.
હવે તેમાં ગરમ દૂધ ધીમે ધીમે ઉમેરો અને સતત હલાવતા રહો. દાળ દૂધને શોષી લે ત્યાં સુધી તેને મધ્યમ તાપે પકાવો. ત્યારબાદ માવો ઉમેરીને સારી રીતે મિક્સ કરો.
હવે ગેસ ધીમો કરીને તેમાં ગોળનો પાવડર ઉમેરો. ગોળ ઉમેર્યા બાદ હલવો થોડો ઢીલો થઈ શકે છે, તેથી તેને ફરીથી સતત હલાવતા રહો. હલવો ઘી છોડવા લાગે અને કડાઈની કિનારી છોડવા લાગે ત્યારે તેમાં એલચી પાવડર, કાજુ, બદામ અને કિસમિસ ઉમેરો.
ગરમાગરમ ખાંડ વગરનો મગ દાળનો હલવો સર્વ કરો. ઉપરથી થોડા ડ્રાયફ્રૂટ્સ નાખવાથી તેનો સ્વાદ અને દેખાવ બંને વધુ સરસ લાગે છે.
હલવો સ્વાદિષ્ટ બનાવવા માટેની ટિપ્સ
- મગની દાળને ધીમા તાપે સારી રીતે શેકવી, આથી હલવામાં હલવાઈ જેવી સુગંધ આવશે.
- ગોળ હંમેશા ગેસ ધીમો કર્યા બાદ ઉમેરવો.
- વધુ રિચ સ્વાદ માટે થોડો વધારાનો માવો ઉમેરી શકો છો.
- હલવો ચોંટે નહીં તે માટે તેને સતત હલાવતા રહેવું.