Methi Mathri Recipe: દિવાળીના તહેવારમાં ઘરે વિવિધ પ્રકારના નાસ્તા બનાવવાની પરંપરા છે. ચકરી, શક્કરપારા અને ચેવડાની સાથે મેથી મઠરી પણ એક લોકપ્રિય નાસ્તો છે. મેથીની સુગંધ અને મસાલેદાર સ્વાદવાળી મઠરી ચા સાથે ખાવામાં ખૂબ જ સ્વાદિષ્ટ લાગે છે. જો તમે આ દિવાળીએ બજારમાંથી મઠરી ખરીદવાને બદલે ઘરે જ ગુજરાતી સ્ટાઇલમાં બનાવવાનું વિચારી રહ્યા છો, તો આ રેસીપી તમારા માટે ઉપયોગી છે. લોટ બાંધવાની યોગ્ય રીત અને ધીમા તાપે તળવાની ટિપ્સથી તમે ઘરે જ ક્રિસ્પી અને ખસ્તી મેથી મઠરી બનાવી શકો છો.
મેથી મઠરી બનાવવાની સામગ્રી
- 2 કપ ઘઉંનો લોટ
- 2 ચમચી સૂકી કસૂરી મેથી અથવા 3 ચમચી બારીક સમારેલી તાજી મેથી
- 3 ચમચી મોણ માટે તેલ અથવા ઘી
- 1/2 ચમચી અજમો
- 1/2 ચમચી જીરું
- 1/2 ચમચી લાલ મરચું પાઉડર
- 1/4 ચમચી હળદર
- સ્વાદ પ્રમાણે મીઠું
- જરૂર મુજબ પાણી
- મઠરી તળવા માટે તેલ
મેથી મઠરી બનાવવાની રીત
સૌપ્રથમ એક મોટા વાસણમાં ઘઉંનો લોટ લો. તેમાં કસૂરી મેથી, અજમો, જીરું, લાલ મરચું પાઉડર, હળદર અને સ્વાદ પ્રમાણે મીઠું ઉમેરો. હવે તેમાં મોણ માટે તેલ અથવા ઘી નાખો. બધી સામગ્રીને હાથથી બરાબર મિક્સ કરો, જેથી લોટમાં તેલ સરખી રીતે ભળી જાય.
હવે થોડું-થોડું પાણી ઉમેરીને કઠણ લોટ બાંધો. ધ્યાન રાખો કે મઠરીનો લોટ રોટલીના લોટ જેટલો નરમ ન હોવો જોઈએ. લોટ બાંધી લીધા પછી તેને ઢાંકીને 10થી 15 મિનિટ માટે બાજુ પર રાખો, જેથી મેથી અને મસાલાનો સ્વાદ લોટમાં સારી રીતે ભળી જાય.
ત્યારબાદ લોટમાંથી નાના-નાના લૂઆ બનાવો. દરેક લૂઆને હાથથી અથવા વેલણની મદદથી નાની, જાડી પૂરી જેવો આકાર આપો. કાંટાની મદદથી મઠરી પર થોડાં કાણાં કરી દો, જેથી તળતી વખતે તે ફૂલીને પૂરી જેવી ન બને અને અંદર સુધી સારી રીતે શેકાય.
હવે એક કડાઈમાં તેલ ગરમ કરો. તેલ વધારે ગરમ થઈ જાય ત્યારે ગેસ ધીમો કરી દો અને મઠરીને થોડા-થોડા જથ્થામાં તળો. મઠરીને ધીમા તાપે તળવી જરૂરી છે, જેથી તે અંદરથી પણ બરાબર પાકે અને બહારથી સરસ ગોલ્ડન બ્રાઉન તથા ક્રિસ્પી બને. વચ્ચે વચ્ચે તેને ફેરવતા રહો.
મઠરી ગોલ્ડન બ્રાઉન થાય ત્યારે તેને તેલમાંથી કાઢીને જાળી અથવા ટિશ્યુ પેપર પર મૂકો. તેને સંપૂર્ણપણે ઠંડી થવા દો. આ રીતે તમારી સ્વાદિષ્ટ ગુજરાતી મેથી મઠરી તૈયાર થઈ જશે. તેને ચા સાથે સર્વ કરો અથવા દિવાળીના નાસ્તાની થાળીમાં સામેલ કરો.
મેથી મઠરીને ખસ્તી બનાવવાની ખાસ ટિપ્સ
મઠરીને ક્રિસ્પી બનાવવા માટે લોટમાં યોગ્ય પ્રમાણમાં મોણ નાખવું જરૂરી છે. લોટ નરમ બાંધશો તો મઠરી ખસ્તી બનવાને બદલે કઠણ થઈ શકે છે. મઠરીને હંમેશાં ધીમા અથવા મધ્યમથી ધીમા તાપે તળો, જેથી તે અંદર સુધી બરાબર પાકે. તળ્યા પછી તેને સંપૂર્ણ ઠંડી કરીને જ હવાચુસ્ત ડબ્બામાં ભરો. આ રીતે મઠરી લાંબા સમય સુધી ક્રિસ્પી રહેવામાં મદદ મળશે.