Mirabai Chanu Asian Games 2026: ભારતીય વેઇટલિફ્ટર મિરાબાઈ ચાનુએ જાપાનના નાગોયા ખાતે રમાઈ રહેલી એશિયન ગેમ્સમાં ઐતિહાસિક પ્રદર્શન કરતા સિલ્વર મેડલ જીત્યો છે. આ જીત સાથે તેમણે 28 વર્ષ બાદ એશિયન ગેમ્સમાં ભારતને વેઇટલિફ્ટિંગમાં મેડલ અપાવ્યો છે. મિરાબાઈ અગાઉ ઓલિમ્પિક, વર્લ્ડ ચેમ્પિયનશિપ અને કોમનવેલ્થ ગેમ્સમાં મેડલ જીતી ચૂક્યા હતા. તેમની શાનદાર કારકિર્દીમાં એશિયન ગેમ્સના મેડલની જે એકમાત્ર ખોટ હતી, તે હવે આ જીત સાથે પૂરી થઈ ગઈ છે.
નાગોયા એશિયન ગેમ્સમાં કેવું રહ્યું પ્રદર્શન?
બુધવારે નાગોયામાં યોજાયેલી મહિલાઓની 49 કિલોગ્રામ વજન શ્રેણીમાં 32 વર્ષીય ચાનુએ શાનદાર પ્રદર્શન કર્યું હતું. તેમણે સ્નેચમાં 87 કિલોગ્રામ અને ક્લીન એન્ડ જર્કમાં 111 કિલોગ્રામ મળીને કુલ 198 કિલોગ્રામ વજન ઉઠાવીને બીજું સ્થાન પ્રાપ્ત કર્યું અને સિલ્વર મેડલ પોતાના નામે કર્યો. નોંધનીય છે કે, આ સ્પર્ધામાં ભાગ લેનાર 7 ખેલાડીઓમાં મિરાબાઈ સૌથી મોટી ઉંમરના ખેલાડી હતા.
28 વર્ષ બાદ ભારતને મળી સફળતા
આ સિલ્વર મેડલ ભારતીય રમતજગત માટે અત્યંત ખાસ છે. છેલ્લે 1998 ની બેંગકોક એશિયન ગેમ્સમાં કર્ણમ મલ્લેશ્વરીએ વેઇટલિફ્ટિંગમાં સિલ્વર મેડલ જીત્યો હતો. મલ્લેશ્વરી બાદ એશિયન ગેમ્સમાં વેઇટલિફ્ટિંગ મેડલ જીતનાર મિરાબાઈ ચાનુ પ્રથમ ભારતીય ખેલાડી બની ગયા છે. આ મેડલ સાથે જ તેમના તમામ મોટા આંતરરાષ્ટ્રીય સ્પર્ધાઓના મેડલ કલેક્શનની યાદી પણ પૂર્ણ થઈ ગઈ છે.
સંઘર્ષથી સફળતા સુધીની સફર
મિરાબાઈ ચાનુની કારકિર્દી સંઘર્ષ અને સતત આગળ વધવાની ક્ષમતાનું ઉત્તમ ઉદાહરણ છે. રિયો ઓલિમ્પિક્સમાં તેઓ એક પણ માન્ય લિફ્ટ નોંધાવી શક્યા ન હતા. આ નિષ્ફળતાના 5 વર્ષ બાદ ટોક્યો ઓલિમ્પિકમાં તેમણે શાનદાર વાપસી કરી અને સિલ્વર મેડલ જીત્યો. તેવી જ રીતે, અગાઉ હાંગઝોઉ એશિયન ગેમ્સમાં તેઓ ચોથા સ્થાને રહીને મેડલ ચૂકી ગયા હતા, પરંતુ 3 વર્ષ બાદ નાગોયામાં હાર ન માનતા સિલ્વર મેડલ હાંસલ કર્યો છે.
ગોલ્ડ અને બ્રોન્ઝ મેડલ કોણે જીત્યા?
આ ઈવેન્ટમાં ઉત્તર કોરિયાની રિ સોંગ-ગમે શ્રેષ્ઠ પ્રદર્શન કરતા ગોલ્ડ મેડલ જીત્યો હતો. આ સાથે તેણે એશિયન ગેમ્સમાં સતત ત્રીજી વખત ગોલ્ડ મેડલ જીતીને ગોલ્ડન હેટ્રિક પૂર્ણ કરી છે. બીજી તરફ, ઇન્ડોનેશિયાની લુલુક દિયાની ત્રીએ કુલ 191 કિલોગ્રામ (સ્નેચમાં 87 કિલોગ્રામ અને ક્લીન એન્ડ જર્કમાં 103 કિલોગ્રામ) વજન ઉઠાવીને બ્રોન્ઝ મેડલ મેળવ્યો હતો.