Rohit-Virat World Cup 2027 Selection: World Cup 2027 માં ભારતીય ક્રિકેટ ટીમના બે દિગ્ગજ બેટ્સમેનો રોહિત શર્મા અને વિરાટ કોહલી રમશે કે નહીં તે અંગે હજુ સુધી સંશય બનેલો છે. આ દરમિયાન પૂર્વ ભારતીય કોચ સંદીપ પાટિલના એક નિવેદને ક્રિકેટ જગતમાં સનસનાટી મચાવી દીધી છે.
ટીમ ઈન્ડિયાની બેન્ચ સ્ટ્રેન્થ મજબૂત: સંદીપ પાટીલ
સંદીપ પાટીલે 'સ્પોર્ટ્સ નેક્સ્ટ' (SportsNext) સાથે વાતચીત કરતા જણાવ્યું હતું કે, વિશ્વ કપ 2027 ની ભારતીય ટીમમાં રોહિત શર્મા અને વિરાટ કોહલી હોય કે ન હોય તેનાથી ટીમ ઈન્ડિયા પર કોઈ ખાસ અસર પડશે નહીં. તેમણે સ્પષ્ટ કર્યું હતું કે ભારતીય ટીમની મજબૂત બેન્ચ સ્ટ્રેન્થને જોતાં રોહિત અને વિરાટના ટીમમાં હોવા કે ન હોવાથી કોઈ ફરક પડતો નથી.
ફિટનેસ, સિલેક્ટર્સ અને વધુ રમવાની ઈચ્છા પર નિર્ભર
પૂર્વ કોચ સંદીપ પાટીલે વધુમાં જણાવ્યું હતું કે, આ બંને ખેલાડીઓ ભવિષ્યમાં રમવાનું ચાલુ રાખવા માંગે છે કે નહીં તેનો નિર્ણય મુખ્યત્વે તેમના પોતાના પર નિર્ભર કરે છે. આ ઉપરાંત, કેટલાક અન્ય મુદ્દા પણ કેન્દ્રમાં રહેશે, જેમ કે શું બંને ખેલાડીઓ પોતાની ફિટનેસ જાળવી શકશે? સિલેક્ટર્સ રોહિત અને વિરાટ અંગે શું વિચારે છે? તથા જો આ દિગ્ગજ ખેલાડીઓ બહાર થાય છે, તો તેમની જગ્યા લેવા માટે કયા ખેલાડીઓ તૈયાર છે?
વેસ્ટ ઈન્ડિઝ પ્રવાસ અને RoKo નિવૃત્તિ અંગે અફવા
જોકે, આ જ મહિને શરૂ થઈ રહેલી વેસ્ટ ઈન્ડિઝ સામેની વનડે (ODI) સિરીઝમાં રોહિત શર્મા અને વિરાટ કોહલી રમતા જોવા મળશે, પરંતુ વિશ્વ કપ 2027 માટે તેમની ઉપસ્થિતિ અંગે હજુ સુધી સત્તાવાર પુષ્ટિ થઈ નથી.
અગાઉ જુલાઈ મહિનામાં ઈંગ્લેન્ડ સામેની બીજી વનડે મેચમાં નિષ્ફળ રહ્યા બાદ નિવૃત્તિ અંગે અફવાઓ વહેતી થઈ હતી. પરંતુ લોર્ડ્સ ખાતે રમાયેલી ત્રીજી વનડે મેચમાં સદી ફટકારીને આ અફવા પર વિરામ લગાવી દેવામાં આવ્યો હતો. હવે સંદીપ પાટીલના આ તાજેતરના નિવેદન બાદ બંને દિગ્ગજોના ભવિષ્ય અંગે ફરી એકવાર ચર્ચા જાગી છે.