WI vs PAK 3rd ODI: વેસ્ટ ઇન્ડીઝે ત્રીજી વનડેમાં પાકિસ્તાનને 202 રનના વિશાળ અંતરથી હરાવીને ત્રણ મેચની વનડે શ્રેણી 2-1થી પોતાના નામે કરી છે. સાલ 1991 પછી આ પહેલીવાર બન્યું છે જ્યારે વેસ્ટ ઇન્ડીઝે પાકિસ્તાન સામે કોઈ વનડે શ્રેણી જીતી હોય, જે એક ઐતિહાસિક સિદ્ધિ છે. આ મેચમાં વેસ્ટ ઇન્ડીઝની ટીમના અસલી હીરો કેપ્ટન શાઈ હોપ અને ફાસ્ટ બોલર જેડન સીલ્સ રહ્યા, જેમણે પ્લેયર ઓફ ધ મેચનો એવોર્ડ પણ જીત્યો.
પ્રથમ બેટિંગ કરતા વેસ્ટ ઇન્ડીઝની શરૂઆત ખરાબ રહી અને ટીમે ત્રણ વિકેટો સસ્તામાં ગુમાવી દીધી હતી. જોકે, કેપ્ટન શાઈ હોપે ટીમની ઇનિંગ્સને સંભાળી અને 120 રનની અણનમ અને શાનદાર ઇનિંગ રમીને ટીમને 50 ઓવરમાં 6 વિકેટે 294 રનના મજબૂત સ્કોર સુધી પહોંચાડી હતી.
પાકિસ્તાનની ટીમ માત્ર 92 રનમાં જ ઓલઆઉટ
વેસ્ટ ઇન્ડીઝના બોલર જેડન સીલ્સે 6 વિકેટ લઈને પાકિસ્તાનની બેટિંગ લાઇન-અપને સંપૂર્ણપણે વેરવિખેર કરી દીધી. આ મેચમાં પાકિસ્તાનના પાંચ ખેલાડી પોતાનું ખાતું પણ ખોલી શક્યા ન હતા અને માત્ર ત્રણ બેટ્સમેનો જ બે આંકડા સુધી પહોંચી શક્યા.
પાકિસ્તાનની ટીમ માત્ર 92 રનમાં જ ઓલઆઉટ થઈ ગઈ હતી, જે વનડેમાં પાકિસ્તાનની ચોથી સૌથી મોટી હાર છે. આ પહેલા પાકિસ્તાનની વનડે ક્રિકેટમાં સૌથી મોટી હાર 2009માં શ્રીલંકા સામે 234 રનથી હતી, જ્યારે 2023માં ભારત સામે 228 રનથી અને 2002માં ઓસ્ટ્રેલિયા સામે 224 રનથી હાર મળી હતી.