Gujarat Titans Captain Shubman Gill: વિશ્વની સૌથી લોકપ્રિય ક્રિકેટ લીગ IPL 2026નો પ્રારંભ 28 માર્ચથી થવા જઈ રહ્યો છે. આ નવી સીઝન પહેલા તમામ ટીમો મેદાન પર પરસેવો પાડી રહી છે. આ દરમિયાન, ગુજરાત ટાઇટન્સના કેપ્ટન શુભમન ગિલ અને હેડ કોચ આશિષ નેહરાએ મીડિયા સાથે વાતચીત કરી હતી. જેમાં ગિલે 'ઇમ્પેક્ટ પ્લેયર' નિયમ અંગે પોતાનો આકરો વિરોધ વ્યક્ત કરીને ક્રિકેટ જગતમાં નવી ચર્ચા છેડી દીધી છે.
કેપ્ટન ગિલનો ઇમ્પેક્ટ પ્લેયર નિયમ પર અસંતોષ
IPLમાં રમતને વધુ રોમાંચક બનાવવા માટે લાવવામાં આવેલા 'ઇમ્પેક્ટ પ્લેયર' નિયમને 2027 સુધી ચાલુ રાખવાના નિર્ણય પર શુભમન ગિલે ગંભીર સવાલો ઉઠાવ્યા છે. ગિલે સ્પષ્ટપણે જણાવ્યું કે, "વ્યક્તિગત રીતે, મને નથી લાગતું કે ઇમ્પેક્ટ પ્લેયરનો નિયમ હોવો જોઈએ. ક્રિકેટ મૂળભૂત રીતે 11 ખેલાડીઓની રમત છે. મેચમાં એક વધારાનો બેટ્સમેન ઉમેરવાથી રમતની અસલી કુશળતા (Skill) પર અસર પડે છે." ગિલના મતે, આ નિયમથી ઓલરાઉન્ડરોની ભૂમિકા ઘટે છે અને રમતનું સંતુલન બગડે છે, કારણ કે મેચ રમવા માટે એક વિશિષ્ટ કૌશલ્યની જરૂર હોય છે જે 11 ખેલાડીઓ પૂરતું મર્યાદિત રહેવું જોઈએ.
પિચ અને રણનીતિ પર નેહરા-ગિલનો મત
ટીમના કોચ અને ભારતના પૂર્વ ફાસ્ટ બોલર આશિષ નેહરાએ પિચની પરિસ્થિતિઓ અંગે વાત કરતા સ્વીકાર્યું હતું કે, એક કોચ તરીકે તેઓ પોતાની પસંદગી મુજબની પિચ તૈયાર કરવા માંગતા હોય છે, પરંતુ વ્યવહારિક રીતે તે હંમેશા શક્ય નથી હોતું. આ મુદ્દે ગિલે ઉમેર્યું કે, પિચ ગમે તેવી હોય, અમારો ઉદ્દેશ્ય સતત રન બનાવવાનો અને તમામ પરિસ્થિતિઓમાં સારું પ્રદર્શન કરવાનો છે.
ગિલે ટીમની માનસિકતા સ્પષ્ટ કરતા કહ્યું કે, "અમે માત્ર એક જ મેચમાં 300-350 રન બનાવવા જેવી સિદ્ધિઓ પાછળ ભાગવા માંગતા નથી. અમારો હેતુ એવી ટીમ બનવાનો છે કે જે પિચ અને પરિસ્થિતિ મુજબનો 'પાર સ્કોર' (Par Score) હાંસલ કરે અને વિરોધી ટીમ કરતા વધુ રન બનાવીને મેચ જીતે." ગિલે એ પણ સ્પષ્ટ કર્યું કે તે પોતાની વ્યક્તિગત સિદ્ધિઓ કરતા ટીમની સફળતાને વધુ મહત્વ આપે છે.
31 માર્ચે પ્રથમ મુકાબલો
ગુજરાત ટાઇટન્સ આ સીઝનમાં પોતાના અભિયાનની શરૂઆત 31 માર્ચે પંજાબના મલ્લાનપુર ખાતે પંજાબ કિંગ્સ સામે કરશે. આશિષ નેહરાના માર્ગદર્શન હેઠળ ગિલની સેના આ વખતે ફરી એકવાર ચેમ્પિયન બનવાના ઈરાદે મેદાનમાં ઉતરશે.