IND vs USA News: T20 વર્લ્ડ કપ 2026ના અભિયાનની શરૂઆતમાં ભારતીય ટીમે અમેરિકા સામે રમાયેલી મેચમાં 29 રનથી શાનદાર જીત મેળવી છે. જોકે, શરૂઆતમાં ભારતીય ટીમ મુશ્કેલીમાં મુકાઈ ગઈ હતી, પરંતુ કેપ્ટન સૂર્યકુમાર યાદવની લડાયક ઇનિંગે ટીમને મજબૂત સ્કોર સુધી પહોંચાડી હતી.
સૂર્યાની કેપ્ટન ઇનિંગ અને ગંભીરનો ગુરુમંત્ર
આ પણ વાંચો
મેચમાં પ્રથમ બેટિંગ કરવા ઉતરેલી ભારતીય ટીમની શરૂઆત અત્યંત ખરાબ રહી હતી. પાવરપ્લેમાં જ ભારતે 4 મહત્વની વિકેટો ગુમાવી દીધી હતી અને એક તબક્કે 77 રનમાં 6 બેટ્સમેનો પેવેલિયન ભેગા થઈ ગયા હતા. આ મુશ્કેલ સમયમાં કેપ્ટન સૂર્યકુમાર યાદવે એક છેડો સાચવી રાખ્યો અને અણનમ 84 રન ફટકારી ભારતને 161 રનના સન્માનજનક સ્કોર સુધી પહોંચાડ્યું હતું.
સૂર્યાએ તેની આ સફળતાનો શ્રેય કોચ ગૌતમ ગંભીરને આપતા જણાવ્યું કે, 14 ઓવર પછીના ડ્રિંક્સ બ્રેક દરમિયાન ગંભીરે તેમને સંદેશ આપ્યો હતો કે વિકેટ 180-190 રનની નથી, પણ 140 રનની છે, તેથી બસ અંત સુધી બેટિંગ કરવાનો પ્રયાસ કરો. આ રણનીતિ કામ કરી ગઈ અને ભારત સ્પર્ધાત્મક સ્કોર બનાવી શક્યું.
સિરાજની બોલિંગ અને અમેરિકાનો પરાજય
162 રનના લક્ષ્યાંકનો પીછો કરવા ઉતરેલી અમેરિકન ટીમ ભારતીય બોલરો સામે લાંબો સમય ટકી શકી નહોતી. એક દિવસ પહેલા જ ટીમમાં જોડાયેલા મોહમ્મદ સિરાજે શાનદાર પ્રદર્શન કરતા 3 વિકેટ ઝડપી હતી. અમેરિકન ટીમ 20 ઓવરમાં 8 વિકેટ ગુમાવીને માત્ર 132 રન જ બનાવી શકી હતી. આમ, ભારતે 29 રનથી મેચ જીતી લીધી હતી.
ટીમ અપડેટ અને ખેલાડીઓની સ્થિતિ
મેચ બાદ સૂર્યકુમાર યાદવે ટીમના અન્ય ખેલાડીઓ વિશે પણ અપડેટ આપી હતી. તેમણે જણાવ્યું કે વોશિંગ્ટન સુંદર દિલ્હીમાં ટીમ સાથે જોડાશે, જ્યારે જસપ્રીત બુમરાહને ખૂબ તાવ હોવાને કારણે તે આ મેચમાં રમી શક્યો નહોતો. ત્રણ ભારતીય બેટ્સમેનો શૂન્ય રને આઉટ થયા હોવા છતાં, ટીમે એકતા બતાવીને જીત હાંસલ કરી છે. કેપ્ટન સૂર્યાએ વધુમાં ઉમેર્યું કે મુંબઈના આઝાદ મેદાન પર રમવાનો તેમનો અનુભવ આ મેચમાં ખૂબ કામ આવ્યો. હવે ભારતીય ટીમ પાસે આગામી મેચ માટે 5 દિવસનો આરામ છે, જેમાં તેઓ પોતાની રણનીતિ વધુ મજબૂત બનાવશે.