India T20I Captaincy Change: ભારતીય T20 ક્રિકેટ ટીમમાં નેતૃત્વ પરિવર્તનને લઈને ચાલી રહેલી તમામ અટકળો પર વિરામ મુકાઈ ગયો છે. ખરાબ ફોર્મ સામે ઝઝૂમી રહેલા સૂર્યકુમાર યાદવને કેપ્ટન પદ પરથી હટાવવાનો નિર્ણય લેવાઈ ચૂક્યો છે અને તેના સ્થાને સ્ટાર બેટ્સમેન શ્રેયસ ઐયર ટીમ ઈન્ડિયાનો નવો T20 કેપ્ટન બનશે. આ મહિને યોજાનારા આયર્લેન્ડ પ્રવાસ (26 જૂનથી) અને ઇંગ્લેન્ડ પ્રવાસ (1 જુલાઇથી) દરમિયાન શ્રેયસ ઐયર ભારતીય ટીમની કમાન સંભાળશે.
ગુરુવારે યોજાનારી BCCI એપેક્સ કાઉન્સિલની ઓનલાઈન બેઠકમાં આ નિર્ણય પર સત્તાવાર મહોર મારવામાં આવશે અને ત્યારબાદ સૂર્યાને આ અંગે સત્તાવાર જાણ કરાશે.
કેપ્ટનશીપની રેસમાં કોચ ગંભીર અને પસંદગીકારો આમને-સામને
નવા કેપ્ટનની પસંદગી પ્રક્રિયા દરમિયાન રસપ્રદ વળાંક જોવા મળ્યો હતો. મુખ્ય કોચ ગૌતમ ગંભીર સંજુ સેમસનને કેપ્ટન બનાવવાની તરફેણમાં હતો. જોકે, મુખ્ય પસંદગીકાર અજિત અગરકર અને પસંદગી સમિતિના અન્ય સભ્યો આ પ્રસ્તાવ સાથે સહમત ન હતા. પસંદગીકારોનું માનવું છે કે સંજુ સેમસને તાજેતરના T20 વર્લ્ડ કપની છેલ્લી 3 મેચોમાં ઉપયોગી ઇનિંગ્સ રમી હોવા છતાં, તેના પ્રદર્શનમાં સાતત્યનો અભાવ છે. લાંબા ગાળાના કેપ્ટન તરીકે શ્રેયસ ઐયર વધુ સ્થિર અને યોગ્ય વિકલ્પ હોવાથી તેમના નામ પર સર્વસંમતિ સાધવામાં આવી છે.
તિલક વર્મા નવો વાઇસ-કેપ્ટન, પાટીદારની અવગણના
ટીમમાં વાઇસ-કેપ્ટન પદ પર પણ મોટો ફેરફાર કરાયો છે, જ્યાં ઓલરાઉન્ડર અક્ષર પટેલના સ્થાને યુવા ખેલાડી તિલક વર્માને વાઇસ-કેપ્ટન બનાવવામાં આવ્યો છે. બીજી તરફ, રોયલ ચેલેન્જર્સ બેંગ્લુરુ (RCB) ને સતત 2 IPL ટાઇટલ જીતાડનાર રજત પાટીદારના નામ પર કેપ્ટનશીપ માટે કોઈ ચર્ચા થઈ નથી. તિલક વર્માને આ જવાબદારી સોંપાતા પાટીદાર માટે ભવિષ્યમાં નેતૃત્વ મેળવવાનો માર્ગ હાલ પૂરતો બંધ થઈ ગયો છે.
સૂર્યા ફ્લોપ, શ્રેયસ હિટ
તાજેતરમાં ભારતને T20 વર્લ્ડ કપ જીતાડનાર સૂર્યકુમાર યાદવનું વ્યક્તિગત ફોર્મ ચિંતાનો વિષય બન્યું છે. IPL 2026માં સૂર્યા 13 મેચોમાં 20.76ની સામાન્ય સરેરાશથી માત્ર 270 રન જ બનાવી શક્યો હતો.
બીજી તરફ, ભલે પંજાબ કિંગ્સ પ્લેઓફમાં ન પહોંચી શકી, પરંતુ કેપ્ટન શ્રેયસ ઐયરે બેટિંગમાં શાનદાર પ્રદર્શન કર્યું હતું. તેણે 14 મેચોમાં 168.81ના ધમાકેદાર સ્ટ્રાઈક રેટથી 498 રન ફટકાર્યા હતા, જેમાં 1 સદી અને 5 અડધી સદી સામેલ છે. અગાઉ પંજાબને રનર-અપ બનાવનાર ઐયરના આ શાનદાર ફોર્મના કારણે પસંદગીકારોએ તેમના પર ભરોસો મૂક્યો છે. કેપ્ટન બનવાની સાથે જ ઐયર ટીમમાં ચોથા નંબરના સ્લોટ પર બેટિંગ કરવા માટે પણ ઉતરશે.