વિરાટ કોહલીને પાછળ છોડનાર યુવા ખેલાડી શ્રીવત્સ, કારકિર્દી બનતા પહેલા જ શા માટે થઈ 'ખત્મ'?

Who is Shreevats Goswami: ભારતીય ક્રિકેટ ટીમમાં એક સમયે વિરાટ કોહલી જેવા દિગ્ગજ ખેલાડીને પણ રનના મામલે પાછળ છોડનાર અંડર-19 વિશ્વ વિજેતા ખેલાડી શ્રીવત્સ ગોસ્વામીનું ઈન્ટરનેશનલ ક્રિકેટ રમવાનું સપનું અધૂરું રહી ગયું. ભારતીય ટીમમાં લાંબા સમય સુધી MS ધોનીની મજબૂત હાજરી અને ઘરેલું ક્રિકેટમાં રિદ્ધિમાન સાહાના કારણે શ્રીવત્સ ક્યારેય પણ ટીમ ઈન્ડિયામાં પોતાની જગ્યા બનાવી શક્યો નહીં.

અંડર-19 વર્લ્ડ કપમાં શાનદાર પ્રદર્શન

વર્ષ 2008માં વિરાટ કોહલીની કેપ્ટનશીપ હેઠળ ભારતીય ટીમે અંડર-19 વિશ્વ કપ જીત્યો, ત્યારે તે ટીમમાં શ્રીવત્સ ગોસ્વામીએ મહત્વની ભૂમિકા ભજવી હતી. ન્યૂઝીલેન્ડ સામે રમાયેલી રોમાંચક સેમિફાઈનલ મેચમાં ગોસ્વામીએ શાનદાર 51 રનની ઈનિંગ રમી હતી, જ્યારે તે જ મેચમાં કેપ્ટન વિરાટ કોહલીએ 43 રન બનાવ્યા હતા. આ શાનદાર પ્રદર્શનના દમ પર ભારત ફાઇનલમાં પહોંચ્યું અને અંતે વિશ્વ વિજેતા બન્યું હતું.

આ શાનદાર પ્રદર્શનના કારણે IPL ની પ્રથમ સિઝનમાં જ તેણે વિરાટ કોહલીની સાથે રોયલ ચેલેન્જર્સ બેંગ્લોર (RCB) ટીમમાં પસંદ કરવામાં આવ્યા હતા. આ સીઝનમાં ઉત્કૃષ્ટ પ્રદર્શન બદલ તેમને 'બેસ્ટ અંડર-19 પ્લેયર', જે હવે ઈમર્જિંગ પ્લેયર એવોર્ડ તરીકે ઓળખાય છે, ખિતાબ પણ મળ્યો હતો. જોકે, તે સમયે એમ. એસ. ધોની ભારતીય ટીમના કેપ્ટન હતા અને તેમને રિપ્લેસ કરવા કોઈ પણ વિકેટકીપર માટે અશક્ય સમાન હતું.

સ્થાનિક ક્રિકેટમાં સાહા બન્યો દીવાલ

શ્રીવત્સ ગોસ્વામીએ સ્થાનિક ક્રિકેટમાં બંગાળની ટીમ તરફથી રમતા 2009-10ની વિજય હજારે ટ્રોફીમાં અદભૂત પ્રદર્શન કર્યું હતું. તેમણે આ ટૂર્નામેન્ટમાં 3 સદી અને 1 અર્ધસદીની મદદથી 567 રન ફટકાર્યા અને ટૂર્નામેન્ટમાં સૌથી વધુ રન બનાવનાર ખેલાડી બન્યા હતા. તમિલનાડુ સામે રમાયેલી ફાઈનલ મેચમાં પણ તેમણે 81 રનની શાનદાર ઈનિંગ રમી હતી, પરંતુ તેમ છતાં તેમને ઈન્ડિયા-એ ટીમમાં સ્થાન મળ્યું ન હતું.

બીજી તરફ, ઘરેલુ ક્રિકેટમાં પણ બંગાળની ટીમમાં રિદ્ધિમાન સાહા મુખ્ય વિકેટકીપર હોવાથી ગોસ્વામીને માત્ર બેકઅપ વિકેટકીપર તરીકે જ ટીમમાં રહેવું પડ્યું હતું. જ્યારે ધોનીની નિવૃત્તિ બાદ સાહા ભારતીય ટેસ્ટ ટીમમાં પસંદ થયા, ત્યારે ગોસ્વામીને બંગાળની ટીમમાં રમવાની તક મળી ખરી, પરંતુ ટીમ ઈન્ડિયા માટે રમવાનું સપનું પૂરું ન થયું. આખરે, પસંદગીકારોની નજરમાં લાંબો સમય ટકી શક્યા નહીં અને વર્ષ 2023માં તેમણે ક્રિકેટના તમામ ફોર્મેટમાંથી સંન્યાસ લેવાની જાહેરાત કરી દીધી.

શ્રીવત્સ ગોસ્વામીનું ક્રિકેટ કરિયર

ડાબા હાથના આ વિકેટકીપર-બેટ્સમેનનું કરિયર શાનદાર રહ્યું છે.

• ફર્સ્ટ ક્લાસ ક્રિકેટ: 61 મેચોમાં 32.46ની સરેરાશથી 4 સદી અને 17 અર્ધસદી સાથે 3019 રન બનાવ્યા હતા.
• લિસ્ટ-એ ક્રિકેટ: 97 મેચોમાં 37.45 ની સરેરાશથી 6 સદી અને 18 અર્ધસદી સાથે 3,371 રન બનાવ્યા હતા.
• T20 ક્રિકેટ: કુલ 111 મેચમાં 2,437 રન બનાવ્યા હતા.
• IPL: IPL માં RCB ઉપરાંત સનરાઇઝર્સ હૈદરાબાદ (SRH), રાજસ્થાન રોયલ્સ (RR) અને કોલકાતા નાઇટ રાઇડર્સ (KKR) જેવી ટીમો તરફથી રમી ચૂક્યા છે.