Kuldeep Yadav-Vanshika Wedding: ભારતીય ક્રિકેટ ટીમે 8 માર્ચના રોજ ન્યૂઝીલેન્ડને હરાવીને રેકોર્ડબ્રેક ત્રીજી વખત ટી20 વર્લ્ડ કપનો ખિતાબ જીત્યો છે. વિશ્વ વિજેતા બન્યાના ગણતરીના દિવસોમાં જ ટીમ ઇન્ડિયાનો સ્ટાર ચાઇનામેન સ્પિનર કુલદીપ યાદવ હવે તેના જીવનની સૌથી મહત્વની અને નવી ઇનિંગ્સની શરૂઆત કરવા જઈ રહ્યો છે. કુલદીપ યાદવ 14 માર્ચ 2026 ના રોજ તેની મંગેતર વંશિકા સાથે લગ્નના બંધનમાં બંધાશે.
મસૂરીમાં શાહી લગ્ન અને લખનૌમાં ભવ્ય રિસેપ્શન
કુલદીપ અને વંશિકાના લગ્ન ઉત્તરાખંડના સુંદર હિલ સ્ટેશન મસૂરીના એક લક્ઝરી રિસોર્ટમાં યોજાશે. લગ્નની વિધિઓ 13 માર્ચથી શરૂ થશે, જેમાં હલ્દી અને મહેંદીના કાર્યક્રમો યોજાશે. ત્યારબાદ 14 માર્ચના રોજ આ જોડી સાત ફેરે લેશે. લગ્ન બાદ 17 માર્ચ 2026 ના રોજ લખનૌની હોટલ સેન્ટ્રમમાં એક ભવ્ય રિસેપ્શન પાર્ટીનું આયોજન કરવામાં આવ્યું છે. આ કાર્યક્રમમાં ભારતીય ક્રિકેટ ટીમના ખેલાડીઓ ઉપરાંત બીસીસીઆઈ અને યુપીસીએના અધિકારીઓ, રાજકારણીઓ અને બોલિવૂડની હસ્તીઓ પણ હાજરી આપે તેવી શક્યતા છે.
સીએમ યોગી આદિત્યનાથને અપાયું આમંત્રણ
કુલદીપ યાદવના પિતા રામ સિંહ યાદવે તાજેતરમાં જ ઉત્તર પ્રદેશના મુખ્યમંત્રી યોગી આદિત્યનાથની મુલાકાત લીધી હતી. તેમણે મુખ્યમંત્રીને કુલદીપ અને વંશિકાના લગ્ન તથા રિસેપ્શનનું સત્તાવાર આમંત્રણ પાઠવ્યું હતું. અગાઉ આ લગ્ન નવેમ્બર 2025 માં થવાના હતા, પરંતુ ભારતીય ટીમના વ્યસ્ત શિડ્યુઅલ અને ટી20 વર્લ્ડ કપને કારણે તારીખ આગળ લંબાવવામાં આવી હતી.
બાળપણની મિત્રતા હવે પ્રેમ અને લગ્નમાં પરિણમશે
કુલદીપ અને વંશિકા એકબીજાને બાળપણથી ઓળખે છે. બંને મૂળ કાનપુરના રહેવાસી છે અને તેમની વર્ષો જૂની મિત્રતા ધીમે ધીમે પ્રેમમાં બદલાઈ હતી. વંશિકા કાનપુરના શ્યામ નગરની રહેવાસી છે અને હાલમાં તે ઓસ્ટ્રેલિયામાં નોકરી કરે છે. તેના પિતા યોગેન્દ્ર સિંહ ચઢ્ઢા એલઆઈસીમાં કાર્યરત છે. કુલદીપ અને વંશિકાની સગાઈ 4 જૂન 2025 ના રોજ લખનૌમાં એક ખાનગી સમારોહમાં થઈ હતી, જેમાં ક્રિકેટર રિંકુ સિંહ પણ હાજર રહ્યો હતો.
ક્રિકેટ કરિયરમાં શાનદાર સફર
31 વર્ષીય કુલદીપ યાદવે અત્યાર સુધી ભારત માટે ત્રણેય ફોર્મેટમાં કુલ 191 મેચ રમી છે, જેમાં તેણે 22.50 ની સરેરાશથી 365 વિકેટ ઝડપી છે. 2026 ના ટી20 વર્લ્ડ કપની વાત કરીએ તો, તેને પાકિસ્તાન સામેની મહત્વની મેચમાં રમવાની તક મળી હતી, જેમાં તેણે 14 રન આપીને 1 વિકેટ લીધી હતી. હવે વિશ્વ વિજેતા બન્યા બાદ તે મસૂરીની સુંદર વાદીઓમાં પોતાની નવી જીંદગીની શરૂઆત કરવા જઈ રહ્યો છે.