IPL Player Trade Deal: આગામી IPL સિઝનની ઓક્શન પહેલાં મુંબઈ ઈન્ડિયન્સ (Mumbai Indians) અને પંજાબ કિંગ્સ (Punjab Kings) વચ્ચે ખેલાડીઓની અદલા-બદલી પર સત્તાવાર સહમતી બની ગઈ છે. આ ટ્રેડ ડીલ હેઠળ ભારતીય ટીમના સ્ટાર ઓલરાઉન્ડર હાર્દિક પંડ્યા પંજાબ કિંગ્સમાં સામેલ થશે, જ્યારે પંજાબના સ્ટાર ઝડપી બોલર અર્શદીપ સિંહ મુંબઈ ઈન્ડિયન્સ સાથે જોડાશે.
સૂત્રો દ્વારા મળતી માહિતી અનુસાર, શ્રેયસ અય્યરની કેપ્ટનશીપ હેઠળ રમવા અંગે હાર્દિક પંડ્યા ખૂબ જ ખુશ છે. ખેલાડીઓની ટ્રેડ ડીલ પ્રક્રિયા પૂર્ણ થઈ ચૂકી છે, જેમાં હાર્દિક પંડ્યા પંજાબ કિંગ્સ તરફ પ્રયાણ કરી રહ્યા છે અને અર્શદીપ સિંહ મુંબઈ ઈન્ડિયન્સની ટીમમાં સામેલ થઈ રહ્યા છે. જોકે, આ ડીલ હાલમાં પ્રસ્તાવિત છે અને ભારતીય ક્રિકેટ કંટ્રોલ બોર્ડ (BCCI) તરફથી આખરી મંજૂરી મળવાની બાકી છે.
સૂત્રોના જણાવ્યા મુજબ, અર્શદીપ સિંહના બદલામાં હાર્દિક પંડ્યાને ટ્રેડ કરવાનો મહત્વપૂર્ણ નિર્ણય પંજાબ કિંગ્સના કેપ્ટન અને કોચનો હતો. અર્શદીપ સિંહ લાંબા સમયથી પંજાબ કિંગ્સની ફ્રેન્ચાઈઝી સાથે રહ્યા છે અને ટીમ માટે સતત શાનદાર પ્રદર્શન કરીને આજે આ શ્રેષ્ઠ મુકામ સુધી પહોંચ્યા છે. આથી ફ્રેન્ચાઈઝીના માલિકો માટે અર્શદીપને છોડવાનો નિર્ણય સરળ ન હતો. છતાં, કેપ્ટન અને કોચે આ નિર્ણયને આગળ વધાર્યો અને હવે ટ્રેડ ડીલ થઈ છે.
આ ટ્રેડ ડીલની સાથે જ મુંબઈ ઈન્ડિયન્સ સાથે હાર્દિક પંડ્યાનો બીજો કાર્યકાળ સમાપ્ત થઈ જશે. ઉલ્લેખનીય છે કે, હાર્દિક પંડ્યા 2024 IPL સિઝનમાં જ મુંબઈ ઈન્ડિયન્સમાં પરત ફર્યા હતા, જ્યાં તેમને લાંબા સમયથી ટીમના સફળ કેપ્ટન રહેલા રોહિત શર્માના સ્થાને કેપ્ટન બનાવવામાં આવ્યા હતા. આ ઉપરાંત, સૂત્રોના જણાવ્યા અનુસાર IPL 2027 મિની ઓક્શન પહેલા પંજાબ કિંગ્સની ટીમ ઓસ્ટ્રેલિયન ઓલરાઉન્ડર માર્કસ સ્ટોઈનિસ અને ભારતીય યુવા બેટ્સમેન નેહાલ વઢેરાને પણ ટીમમાંથી રિલીઝ કરી શકે છે.