નેપાળ માત્ર 26 રનમાં ઓલઆઉટ! તિલક-કુશાગ્રના તોફાન બાદ પ્રિન્સ અને હર્ષિતે મચાવી તબાહી, ભારતની ઐતિહાસિક જીત

રાઇઝિંગ સ્ટાર્સ એશિયા કપ 2026માં તિલક વર્મા અને કુમાર કુશાગ્રની સેન્ચુરી બાદ પ્રિન્સ યાદવ અને હર્ષિત રાણાની ઘાતક બોલિંગથી ભારત-Aની નેપાળ સામે 306 રને ભવ્ય જીત.

By: Jignesh TrivediEdited By:Jignesh TrivediPublish Date: Fri, 20 Nov 2026 11:05 PM (IST)Updated: Fri, 20 Nov 2026 11:05 PM (IST)
indiaa-crushes-nepal-by-306-runs-in-acc-asia-cup-opener

IND A vs NEP: શુક્રવારે રમાયેલા એસીસી મેન્સ રાઇઝિંગ સ્ટાર્સ એશિયા કપ 2026ના મુકાબલામાં ભારત-A ટીમે નેપાળ સામે 306 રનના વિશાળ અંતરથી એકતરફી અને ઐતિહાસિક જીત મેળવી છે. વેસ્ટ એન્ડ પાર્ક ઇન્ટરનેશનલ ક્રિકેટ સ્ટેડિયમમાં રમાયેલી આ મેચમાં પહેલા બેટિંગ કરતા ભારત-A એ 332 રન બનાવ્યા હતા, જેના જવાબમાં નેપાળની આખી ટીમ માત્ર 11.3 ઓવરમાં 26 રનના નજીવા સ્કોર પર સમેટાઈ ગઈ હતી. આ જીત સાથે ભારત-A એ ટુર્નામેન્ટમાં ધમાકેદાર શરૂઆત કરી છે.

તિલક-કુશાગ્રની શતકીય ભાગીદારી

નેપાળે ટોસ જીતીને ભારત-Aને પહેલા બેટિંગ કરવાનું આમંત્રણ આપ્યું હતું. ઓપનિંગમાં અભિષેક શર્મા અને વૈભવ સૂર્યવંશીએ સાવચેતીભરી શરૂઆત કરી, પરંતુ છઠ્ઠી ઓવરમાં નંદન યાદવે અભિષેક શર્માને આઉટ કરીને નેપાળને પહેલી સફળતા અપાવી. ત્યારબાદ આવેલો આયુષ બદોની પણ માત્ર 2 રન બનાવીને પેવેલિયન ભેગો થયો હતો. 11મી ઓવરમાં વૈભવ સૂર્યવંશી 32 બોલમાં 26 રન બનાવીને પવન સર્રાફનો શિકાર બન્યો, જેનાથી એક સમયે ભારત-Aની શરૂઆત ધીમી અને મુશ્કેલ દેખાતી હતી.

આ મુશ્કેલ તબક્કે કેપ્ટન તિલક વર્મા અને વિકેટકીપર-બેટર કુમાર કુશાગ્રએ બાજી સંભાળી. બંને વચ્ચે ચોથી વિકેટ માટે 206 રનની નિર્ણાયક ભાગીદારી નોંધાઈ, જેણે મેચનો રંગ જ બદલી નાખ્યો. કુમાર કુશાગ્રએ આક્રમક અંદાજમાં બેટિંગ કરતા 102 બોલમાં 117 રન ફટકાર્યા, જેમાં 10 ચોગ્ગા અને 5 છગ્ગા સામેલ હતા. તેને લલિત રાજબંશીએ આઉટ કર્યો. બીજી તરફ કેપ્ટન તિલક વર્માએ પણ સંયમ અને આક્રમકતાનો સમન્વય સાધતા 113 બોલમાં 107 રન બનાવ્યા, જેમાં 6 ચોગ્ગા અને 4 છગ્ગા રહ્યા. તે 46મી ઓવરમાં આઉટ થયો હતો.

અંતિમ ઓવરોમાં રિંકુ સિંહ (9 રન) અને શાહબાઝ અહેમદ (8 રન) ઝડપી રન કરવામાં નિષ્ફળ રહ્યા, પરંતુ સૂર્યાંશ શેડગેએ અંતમાં તોફાની બેટિંગ કરીને સ્કોરબોર્ડમાં મોટો ઉમેરો કર્યો. સૂર્યાંશે માત્ર 14 બોલમાં અણનમ 36 રન બનાવ્યા, જેમાં 4 ચોગ્ગા અને 4 છગ્ગા ફટકાર્યા. આખરે ભારત-A એ નિર્ધારિત ઓવરમાં 9 વિકેટના નુકસાન પર 332 રનનો મજબૂત સ્કોર ઊભો કર્યો. નેપાળ તરફથી લલિત રાજબંશી અને કેપ્ટન સંદીપ લામિછાનેએ 3-3 વિકેટ ઝડપી હતી.

નેપાળની બેટિંગ લાઈનઅપ પત્તાના મહેલની જેમ તૂટી

333 રનના વિશાળ લક્ષ્યનો પીછો કરવા ઉતરેલી નેપાળની ટીમ પહેલા જ બોલથી દબાણમાં આવી ગઈ હતી. હર્ષિત રાણાએ પ્રથમ ઓવરમાં જ વિકેટ લઈને નેપાળને શરૂઆતી ફટકો આપ્યો. ત્યારબાદ બીજી ઓવરમાં પ્રિન્સ યાદવે સતત બે વિકેટ ખેરવી અને ત્રીજી ઓવરમાં હર્ષિત રાણાએ વધુ એક વિકેટ લીધી.

નેપાળના બેટ્સમેનો ભારતીય ઝડપી બોલરોની ગતિ અને સ્વિંગ સામે લાચાર દેખાયા. પ્રિન્સ યાદવે અત્યંત ઘાતક બોલિંગ કરતા માત્ર 6 રન આપીને 5 વિકેટ પોતાના નામે કરી, જ્યારે હર્ષિત રાણાએ 16 રન ખર્ચીને 4 વિકેટ ઝડપી. બંને બોલરોની આક્રમકતા સામે નેપાળની ટીમ માત્ર 11.3 ઓવરમાં 26 રનના સ્કોર પર ઓલઆઉટ થઈ ગઈ અને ભારત-A એ 306 રનથી યાદગાર વિજય મેળવ્યો.