IND vs ZIM 1st T20 Playing-11: ભારતીય ક્રિકેટ ટીમ ઝિમ્બાબ્વેના પ્રવાસે છે અને શ્રેણીની પ્રથમ T20 મેચ 23 July, ગુરુવારના રોજ હરારે સ્પોર્ટ્સ ક્લબના મેદાનમાં રમાશે. આ 3 મેચની શ્રેણી માટે શ્રેયસ અય્યરના નેતૃત્વમાં એક યુવા ટીમની પસંદગી કરવામાં આવી છે. ભારતીય ટીમમાં સંજુ સેમસન, અર્શદીપ સિંહ અને જસપ્રીત બુમરાહ જેવા અનુભવી ખેલાડીઓને આરામ આપવામાં આવ્યો છે.
ઓપનિંગમાં તોફાની જોડી
આ મેચમાં સૌથી વધુ આકર્ષણ 15 વર્ષના યુવા બેટ્સમેન વૈભવ સૂર્યવંશીનું રહેશે. વૈભવ જેણે ઈંગ્લેન્ડના પ્રવાસે ડેબ્યુ કરીને ઇતિહાસ રચ્યો હતો, તે અભિષેક શર્મા સાથે ઓપનિંગમાં જોવા મળી શકે છે. અભિષેક શર્મા હાલમાં T20I રેન્કિંગમાં બીજા ક્રમે છે અને ઝિમ્બાબ્વે સામે તેનો રેકોર્ડ પણ શાનદાર રહ્યો છે. જોકે, લેટેસ્ટ રેન્કિંગમાં ઈશાન કિશને પ્રથમ સ્થાન મેળવ્યું છે, જે વિકેટકીપર તરીકે મિડલ ઓર્ડરમાં મહત્વની ભૂમિકા ભજવશે.
નવા ખેલાડીઓનું થશે ડેબ્યુ
આ પ્રવાસમાં બે નવા ખેલાડીઓ અશોક શર્મા અને હર્ષ દુબે ભારત માટે ડેબ્યુ કરી શકે છે. ગુજરાત ટાઇટન્સના ફાસ્ટ બોલર અશોક શર્માએ જણાવ્યું છે કે તેનું મુખ્ય લક્ષ્ય ભારતની જર્સી પહેરીને વધુમાં વધુ વિકેટ લેવાનું છે. તેની સાથે લખનૌ સુપર જાયન્ટ્સનો મયંક યાદવ અને પ્રિન્સ યાદવ પણ બોલિંગ આક્રમણને મજબૂત બનાવશે. મયંક અને અશોક બંને 150 કિમી પ્રતિ કલાકથી વધુની ઝડપે બોલિંગ કરવાની ક્ષમતા ધરાવે છે.
મજબૂત મિડલ ઓર્ડર અને ઓલરાઉન્ડર્સ
હાર્દિક પંડ્યાની ગેરહાજરીમાં શિવમ દુબે મુખ્ય પેસ બોલિંગ ઓલરાઉન્ડર તરીકે રમશે, જ્યારે હર્ષ દુબે સ્પિન ઓલરાઉન્ડરની ભૂમિકા ભજવશે. કેપ્ટન શ્રેયસ અય્યર મિડલ ઓર્ડરની જવાબદારી સંભાળશે, જેમાં રિંકુ સિંહ અને ઉપ-કેપ્ટન તિલક વર્મા સાથ આપશે. સ્પીન વિભાગમાં રવિ બિશ્નોઈ મુખ્ય ભૂમિકામાં જોવા મળશે.
ભારતની સંભવિત પ્લેઈંગ-11:
શ્રેયસ અય્યર (કેપ્ટન), વૈભવ સૂર્યવંશી, અભિષેક શર્મા, તિલક વર્મા (ઉપ-કેપ્ટન), ઈશાન કિશન (વિકેટકીપર), શિવમ દુબે, રિંકુ સિંહ, હર્ષ દુબે, પ્રિન્સ યાદવ, અશોક શર્મા અને મયંક યાદવ.