IND vs NZ 1st T20: ભારતીય વિકેટકીપર બેટ્સમેન સંજુ સેમસને ખુલાસો કર્યો છે કે, ટીમ ઈન્ડિયા પાવરપ્લેમાં જ મેચ પોતાના નામે કરી લેવાનો ખાસ અભિગમ ધરાવે છે. ન્યૂઝીલેન્ડ સામે ક્રાઇસ્ટચર્ચ ખાતે રમાયેલી પ્રથમ T20 મેચમાં ભારતે 226 રનનો ઐતિહાસિક રન ચેઝ કરીને મેળવેલી શાનદાર જીત બાદ સેમસને આ વિગતો આપી હતી.
શ્રેયસ અય્યરની કપ્તાની હેઠળ ભારતીય ટીમે T20 આંતરરાષ્ટ્રીય ક્રિકેટમાં પોતાનો અત્યાર સુધીનો સૌથી મોટો સફળ રન ચેઝ નોંધાવ્યો છે, જ્યારે આ અગાઉ ભારતનો સૌથી મોટો સફળ રન ચેઝ 209 રનનો હતો. આ મેચમાં કીવી બોલરો પર શરૂઆતથી જ દબાણ બનાવીને ભારતે પાવરપ્લેમાં જ 94 રન ઠોકી દીધા, જેના બળે 226 રનનો વિશાળ લક્ષ્યાંક હાંસલ કરવામાં સરળતા રહી હતી.
ઐતિહાસિક જીત બાદ પ્રેસ કોન્ફરન્સમાં સંજુ સેમસને ટીમ ઈન્ડિયાની આક્રમક રણનીતિ અંગે વિગતવાર વાત કરતા જણાવ્યું હતું કે, "મેચના અલગ-અલગ તબક્કા હોય છે. અમે પાવરપ્લે, મિડલ ઓવર્સ અને ડેથ ઓવર્સને તદ્દન અલગ રીતે જોઈએ છીએ. જો તમે 170 રનના સ્કોરનો પીછો કરી રહ્યા હોવ અને પાવરપ્લેમાં સારી તથા ઝડપી શરૂઆત મળે, તો અમે પાવરપ્લેમાં જ મેચ જીતી લેવાનું સુનિશ્ચિત કરીએ છીએ. છેલ્લા કેટલાક વર્ષોથી અમારી ટીમ આ જ ખાસ એપ્રોચના કારણે સતત ઉત્કૃષ્ટ પ્રદર્શન કરી રહી છે."
ન્યૂઝીલેન્ડ સામેના આ વિશાળ લક્ષ્યાંકને હાંસલ કરવામાં સંજુ સેમસને પોતે પણ વિસ્ફોટક બેટિંગ કરીને મુખ્ય ભૂમિકા ભજવી હતી. તેણે તોફાની બેટિંગ કરતા પાવરપ્લેમાં જ પોતાની અર્ધસદી પૂરી કરી લીધી અને માત્ર 33 બોલમાં 8 ચોગ્ગા તથા 4 છગ્ગાની મદદથી 67 રનની આક્રમક ઇનિંગ રમી હતી. આ શાનદાર ઇનિંગ માટે તેને 'પ્લેયર ઓફ ધ મેચ' પસંદ કરવામાં આવ્યો હતો. ભારતે 226 રનનો લક્ષ્યાંક 19.4 ઓવરમાં 6 વિકેટ ગુમાવીને પ્રાપ્ત કરી લીધો અને આ જીત સાથે શ્રેણીમાં 1-0 થી સરસાઈ મેળવી લીધી છે.