IND vs ENG: ભારત અને ઇંગ્લેન્ડ વચ્ચે લોર્ડ્સના ઐતિહાસિક મેદાન પર રમાયેલી ત્રીજી અને નિર્ણાયક વનડે મેચમાં ઇંગ્લેન્ડે ભારતને 27 રને હરાવીને 3 મેચોની વનડે શ્રેણી 2-1થી પોતાના નામે કરી લીધી છે. ભારતીય ટીમ મોટો ટાર્ગેટ ચેઝ કરતા 50 ઓવરમાં 7 વિકેટે 360 રન જ બનાવી શકી હતી. કેપ્ટન રોહિત શર્માની 138 રનની યાદગાર અને ઐતિહાસિક સદી છતાં ભારતીય બોલરોના નબળા પ્રદર્શન અને મિડલ ઓર્ડરના ધબડકાને કારણે ટીમ ઇન્ડિયાને શ્રેણી ગુમાવવી પડી છે.
અંગ્રેજ બેટ્સમેનોનો બોલરો પર કહેર, બનાવ્યો રેકોર્ડ સ્કોર
આ મેચમાં ઇંગ્લેન્ડના કેપ્ટન હેરી બ્રુકે ટોસ જીતીને પહેલા બેટિંગ કરવાનો નિર્ણય કર્યો હતો. જસપ્રિત બુમરાહની ગેરહાજરીમાં ભારતનો બિનઅનુભવી બોલિંગ અટેક સંપૂર્ણપણે લાચાર દેખાયો હતો. ઇંગ્લેન્ડના ઓપનર બેન ડકેટે લોર્ડ્સના મેદાન પર વનડેનો સર્વોચ્ચ વ્યક્તિગત સ્કોર બનાવતા 141 રનની ધમાકેદાર ઇનિંગ રમી હતી.
આ સિવાય જેકોબ બેથલે 91 રન અને જો રૂટે અણનમ 74 રન ફટકારીને ટીમને મજબૂતી આપી હતી. અંતિમ ઓવરોમાં જોસ બટલરે માત્ર 13 બોલમાં અણનમ 41 રન ઝૂડી કાઢ્યા હતા, જેના કારણે ઇંગ્લેન્ડે 3 વિકેટે 387 રનનો વનડે ઇતિહાસમાં ભારત સામેનો પોતાનો સૌથી મોટો સ્કોર ખડો કર્યો હતો. ભારત તરફથી ગુરનૂર બ્રાર ખૂબ જ મોંઘો સાબિત થયો હતો અને તેણે 10 ઓવરમાં 97 રન લૂંટાવ્યા હતા.
રોહિત શર્માની ઐતિહાસિક સદી અને ગિલની ફિફ્ટી
388 રનના વિશાળ લક્ષ્યાંકનો પીછો કરવા ઉતરેલી ભારતીય ટીમને ઓપનર્સ રોહિત શર્મા અને શુભમન ગિલે શાનદાર શરૂઆત અપાવી હતી. બંનેએ પ્રથમ વિકેટ માટે 147 રનની આક્રમક ભાગીદારી કરી હતી. શુભમન ગિલ 77 રન બનાવીને આઉટ થયો હતો.
બીજી તરફ, છેલ્લા કેટલાક સમયથી ફોર્મ અને નિવૃત્તિના સવાલોનો સામનો કરી રહેલા રોહિત શર્માએ ટીકાકારોને બેટથી જવાબ આપ્યો હતો. રોહિતે 110 બોલમાં 17 ચોગ્ગા અને 5 છગ્ગાની મદદથી 138 રનની શાનદાર ઇનિંગ રમી હતી. આ સાથે જ તેઓ લોર્ડ્સના મેદાન પર વનડે સદી ફટકારનારા ભારતના પ્રથમ ઓપનર અને બેટ્સમેન બની ગયા છે.
સેમ કરનની સ્લોઅર બોલે ભારતીય ઇનિંગ વેરવિખેર કરી
એક સમયે ભારત મેચમાં મજબૂત સ્થિતિમાં હતું, પરંતુ જેકોબ બેથલે રોહિત શર્માને આઉટ કરતા જ મેચનો પલટો થઈ ગયો હતો. મિડલ ઓર્ડરમાં ઇંગ્લેન્ડના ઓલરાઉન્ડર સેમ કરનની સ્લોઅર બોલિંગ સામે ભારતીય બેટ્સમેનો સંપૂર્ણપણે સરન્ડર થઈ ગયા હતા. કરને મિડલ ઓર્ડરને ધ્વસ્ત કરતા 10 ઓવરમાં 75 રન આપીને 4 મહત્વની વિકેટો ઝડપી હતી. રોહિતના આઉટ થયા બાદ ભારતીય ટીમ નિયમિત અંતરે વિકેટો ગુમાવતી રહી અને અંતે 7 વિકેટે 360 રન સુધી જ પહોંચી શકી અને 27 રનથી મેચ સાથે સીરિઝ પણ ગુમાવી દીધી.