Who Is Raghu Sharma: આઈપીએલ 2026ની 44મી મેચમાં ચેન્નઈ સુપર કિંગ્સ (CSK) સામે રમાઈ રહેલી હાઈ-વોલ્ટેજ મેચમાં મુંબઈ ઈન્ડિયન્સે (MI) દરેકને ચોંકાવી દીધા છે. કેપ્ટન હાર્દિક પંડ્યાએ ટોસ દરમિયાન એક એવા ખેલાડીના ડેબ્યૂની જાહેરાત કરી, જેની ચર્ચા સોશિયલ મીડિયા પર તેજ બની છે. આ ખેલાડી છે 33 વર્ષીય અનુભવી લેગ સ્પિનર રઘુ શર્મા છે.
રઘુ શર્માનો જન્મ 11 માર્ચ, 1993ના રોજ પંજાબના જલંધરમાં થયો હતો. તે જમણા હાથનો લેગ-બ્રેક બોલર છે જે તેની સચોટ લાઇન અને પરંપરાગત ઉડાન માટે જાણીતો છે. ઘરેલુ ક્રિકેટમાં તેણે પંજાબ, પુડુચેરી અને તાજેતરમાં ઉત્તરાખંડનું પ્રતિનિધિત્વ કર્યું છે. તેણે 2024-25 રણજી ટ્રોફીમાં પોતાનું ડેબ્યૂ કર્યું હતું, હિમાચલ પ્રદેશ સામેની મેચમાં સાત વિકેટ લીધી હતી.
સંઘર્ષ અને ધીરજનું પરિણામ
સામાન્ય રીતે આઈપીએલમાં ટીમો યુવા પ્રતિભાઓ પર દાવ લગાવતી હોય છે, પરંતુ મુંબઈ ઈન્ડિયન્સે અનુભવ પર ભરોસો મૂક્યો છે. પંજાબ તરફથી ડોમેસ્ટિક ક્રિકેટ રમતા રઘુ શર્મા લાંબા સમયથી મોટા બ્રેકની રાહ જોઈ રહ્યા હતા.
રઘુને 2025માં ઈજાગ્રસ્ત વિગ્નેશ પુથુરના સ્થાને ₹30 લાખમાં ટીમમાં સામેલ કરાયા હતા, પરંતુ આખી સીઝન બેન્ચ પર બેસવું પડ્યું હતું. ફર્સ્ટ ક્લાસ ક્રિકેટમાં રઘુનો દબદબો રહ્યો છે. તેણે 12 મેચમાં 57 વિકેટ ઝડપી છે, જે તેની ક્ષમતાનો પુરાવો આપે છે.
વ્યૂહાત્મક ફેરફાર અને ઈમ્પેક્ટ પ્લેયર
ચેપોકની સ્પિન-ફ્રેન્ડલી પિચને ધ્યાનમાં રાખીને હાર્દિક પંડ્યાએ રઘુ શર્માને 'ઈમ્પેક્ટ સબ' તરીકે ટીમમાં સ્થાન આપ્યું છે. એટલે કે, બીજી ઇનિંગમાં જ્યારે મુંબઈ બોલિંગ કરવા ઉતરશે ત્યારે રઘુ પોતાની કરામત બતાવતા જોવા મળશે. આ ઉપરાંત ટીમમાં ક્રિશ ભગતની વાપસી થઈ છે, જ્યારે અશ્વિની કુમારને પડતા મૂકવામાં આવ્યો છે.
રોહિત શર્મા હજુ પણ બહાર
મુંબઈના ફેન્સ માટે ચિંતાના સમાચાર એ છે કે પૂર્વ કેપ્ટન રોહિત શર્મા હજુ પણ હેમસ્ટ્રિંગની ઈજામાંથી રિકવર થઈ શક્યા નથી. 12 એપ્રિલના રોજ RCB સામેની મેચ બાદ તેઓ મેદાનથી દૂર છે.
CSKની ચોંકાવનારી રણનીતિ
સામે પક્ષે ચેન્નઈએ પણ પોતાની પ્લેઈંગ ઈલેવનમાં મોટો ઉલટફેર કર્યો છે. છેલ્લી મેચમાં 4 વિકેટ લેનાર અકીલ હુસૈનને આશ્ચર્યજનક રીતે બહાર રાખવામાં આવ્યો છે. તેની જગ્યાએ મુકેશ ચૌધરી, રામકૃષ્ણ ઘોષ અને પ્રશાંત વીરની ટીમમાં વાપસી થઈ છે.
રઘુ માટે આ ફક્ત એક મેચ નથી, પરંતુ પોતાને સાબિત કરવાનું પ્લેટફોર્મ છે. પંજાબના આ લેગ-સ્પિનર માટે, 2 મેનો દિવસ તેની કારકિર્દીનો યાદગાર દિવસ બની ગયો છે.