ODI World Cup 2023: આ વર્ષે ભારતમાં ઓક્ટોબર-નવેમ્બરમાં ICC વર્લ્ડ કપ 2023 રમાવાનો છે. ક્રિકેટના આ તહેવારમાં 8 ટીમોએ સીધું ક્વોલિફાઈ કર્યું છે. આ નામ મંગળવારે મોડી રાતે જાહેર થયા હતા. યજમાન ભારત સિવાય ઓસ્ટ્રેલિયા, ઈંગ્લેન્ડ, પાકિસ્તાન, અફઘાનિસ્તાન, બાંગ્લાદેશ, દક્ષિણ આફ્રિકા અને ન્યૂઝીલેન્ડની ટીમો ટૂર્નામેન્ટમાં સીધી પ્રવેશ કરવામાં સફળ રહી છે. 1975 અને 1979ની વિશ્વ ચેમ્પિયન ટીમ વેસ્ટઈન્ડિઝ આ વર્ષે પણ સીધા ક્વોલિફાઈ કરવામાં નિષ્ફળ રહી છે. 1996ની વિનર અને ચાર વારની ફાઈનાલિસ્ટ ટીમ શ્રીલંકા ક્વોલિફાઈ કરવામાં નિષ્ફળ સાબિત થઈ છે.
વરસાદે આયરલેન્ડનો ખેલ બગાડ્યો
મંગળવારે ચેમ્સફોર્ડ ખાતે બાંગ્લાદેશ અને આયર્લેન્ડ વચ્ચેની વનડે વરસાદને કારણે ધોવાઈ જતાં આયર્લેન્ડની ટૂર્નામેન્ટ માટે સીધા ક્વોલિફાય થવાની આશાઓ પર પાણી ફરી વળ્યું હતું. આવી સ્થિતિમાં, ટેમ્બા બાવુમાની કેપ્ટન્સીમાં દક્ષિણ આફ્રિકાની ટીમને ટૂર્નામેન્ટમાં સીધી એન્ટ્રી મળી.
નેધરલેન્ડ સામેની જીતનો ફાયદો દક્ષિણ આફ્રિકાને મળ્યો
દક્ષિણ આફ્રિકાને નેધરલેન્ડ સામે તાજેતરમાં ઘરઆંગણે મળેલી જીતનો ફાયદો છે. દક્ષિણ આફ્રિકાની ટીમે નેધરલેન્ડ સામેની સિરીઝમાં વર્લ્ડ કપની ટિકિટ મેળવવાનો શ્રેષ્ઠ પ્રયાસ કર્યો અને ICC મેન્સ ક્રિકેટ વર્લ્ડ કપ સુપર લીગ પોઈન્ટ ટેબલમાં વેસ્ટ ઈન્ડિઝને આઠમા સ્થાને ધકેલવામાં સફળ રહી.
જૂનમાં ઝિમ્બાબ્વે દ્વારા ક્વોલિફાઇંગ ટુર્નામેન્ટ યોજાશે
આવી સ્થિતિમાં હવે ટેસ્ટ રમતા શ્રીલંકા, વેસ્ટ ઈન્ડિઝ અને આયર્લેન્ડ અને ઝિમ્બાબ્વેને જૂનમાં ઝિમ્બાબ્વેમાં યોજાનારી વર્લ્ડ કપ ક્વોલિફાયર ટૂર્નામેન્ટ દ્વારા ટિકિટ મેળવવી પડશે. આ ચાર ટીમો ઉપરાંત નેધરલેન્ડ, સ્કોટલેન્ડ, ઓમાન, નેપાળ, યુએસએ અને યુએઈની ટીમો પણ ક્વોલિફાયરમાં પોતાનું નસીબ અજમાવશે અને વર્લ્ડ કપની ટિકિટ મેળવવાનો પ્રયાસ કરશે.
વર્લ્ડ કપ દરમિયાન 10 ટીમો રાઉન્ડ રોબિન આધારે એકબીજા સામે ટકરાશે. આ પછી ટોચની 4 ટીમો સેમિફાઇનલમાં પ્રવેશ કરશે.